သျှမ်းပြည် တောင်ကြီးခရိုင် ရွှေညောင်မြို့ အောင်သပြေဂိတ် အနီးရှိ ဆည်မြောင်းဝန်ထမ်း အိမ်ရာလိုင်းခန်းတွင် လင်မယား နှစ်ဦး အိမ်ထောင်ရေး ပြဿနာတက်ရာမှ ခင်ပွန်းဖြစ်သူက ဇနီးကို ဓားဖြင့် ထိုးသတ်မှုဖြစ်ပွား ခဲ့ကြောင်း သိရသည်။
ယမန်နေ့ ဇန်နဝါရီ ၉ ရက် ညနေ ၉ နာရီဝန်းကျင်တွင် ရွှေညောင်မြို့ ဆည်မြောင်းဝန်းထမ်း အိမ်ရာလိုင်းခန်းတွင် နေထိုင်သည့် လင်မယားနှစ်ဦးသည် စကားများ ရန်ဖြစ်ပွားရာမှ ခင်ပွန်းဖြစ်သူ ကိုစည်သူသည် ၎င်း၏ ဇနီးကို ဓားဖြင့် အကြိမ်ပေါင်း ၉ ကြိမ် ထိုးသတ်မှု ဖြစ်ပွားခဲ့ကြောင်း ရွှေညောင်မြို့ဒေသခံ အသက် ၃၆ နှစ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ သူတို့ လင်မယားနှစ်ဦးက ဆည်မြောင်းဝန်ထမ်း အိမ်ရာလိုင်းခန်းမှာ နေတာ။ သူတို့ လင်မယား စကားများ ရန်ဖြစ်တဲ့ချိန်မှာ ဘေးပတ်ဝန်းကျင်ကို အနှောက်အယှက်ဖြစ်မှာကို ကြောက်လို့ထင်တယ်။ အိမ်ပြင်ထွက်ပြီး စကားများကြတာ။ စကားများ ရန်ဖြစ်ရင်းနဲ့ ကိုစည်သူက လက်လွန်ပြီး သူ့မိန်းမကို ဓားနဲ့ထိုးသတ်လိုက်တယ်။ သူ့မိန်းမကို သတ် ပြီးတော့မှ သူလည်း စိတ္တစ ဖြစ်သွားတာလား မပြောတတ်ဘူး။ သူ့ကိုယ်သူ ဓားနဲ့ ပြန်ထိုးသတ် သေးတယ်“ ဟု ၎င်း အမျိုးသမီးတစ်ဦးက ပြောသည်။
ဓားဖြင့် အကြိမ်ပေါင်း ၉ ကြိမ်ထိ ထိုးခံရသောကြောင့် အသက် ၂၃ နှစ်အရွယ်ရှိ မမြတ်နိုးမှာ ပွဲချင်းပြီးသေဆုံးသွားခဲ့ပြီး၊ အသက် ၂၇ နှစ် ကိုစည်သူ သည် ဓားဒဏ်ရာ ၃ ချက်ဖြင့် တောင်ကြီးမြို့ စဝ်စံထွန်းဆေးရုံသို့ ဆေးဝါးကုသမှု ခံယူနေကြောင်း သိရသည်။
အဆိုပါ ခင်ပွန်းဖြစ်သူ ကိုစည်သူသည် မူးယစ်ဆေးဝါးနှင့် ပတ်သက်၍ သုံးစွဲခဲ့ဖူးကြောင်း မူးယစ်ဆေးဝါးကြောင့် ဇနီးဖြစ်သူကို ဓားဖြင့် ထိုးသတ်ခဲ့ကြောင်း သိရသည်။
ပြီးခဲ့သည့် ဇန်နဝါရီ ၇ ရက် ညနေ ၉ နာရီခွဲတွင် သျှမ်းပြည် တာချီလိတ်မြို့နယ် တာလေမြို့ နားယောင်းအုပ်စု ရန်အောင်ကျေးရွာတွင် နေထိုင်သည့် အမျိုးသားတစ်ဦးသည် မူးယစ်ဆေးဝါး သုံးစွဲပြီး အသိစိတ်လွှတ်ရာမှ မီးလှုံနေသည့် အိမ်နီးနားချင်း သားအမိ နှစ်ဦးကို ဓားဖြင့်ခုတ်ရာ အမျိုးသမီး ထိခိုက်ဒဏ်ရာ ရရှိပြီး၊ ကလေးငယ် သေဆုံးခဲ့ကြောင်း သိရသည်။
