သျှမ်းပြည် တောင်ကြီးခရိုင် ညောင်ရွှေမြို့နယ် အင်းလေး အနောက်ဘက်ခြမ်းရှိ အင်းတိမ်ရွာ ဒေသခံများကို စစ်ကောင်စီတပ်ဖွဲ့ နှင့် ပအိုဝ်းပြည်သူ့စစ်တပ်ဖွဲ့ (PNO/PNA) တို့ ပူးပေါင်းပြီး ဆက်ကြေးကောက်ခံ ခဲ့ကြောင်း စုံစမ်း သိရှိရသည်။
အင်းလေးဒေသ အနောက်ဘက်ခြမ်းတွင် စစ်ကောင်စီတပ်ဖွဲ့ နှင့် သျှမ်းတောင် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားပြီးနောက်ပိုင်း စစ်ကောင်စီ နှင့် ပအိုဝ်းပြည်သူ့စစ်တပ်ဖွဲ့ (PNO/PNA) ပူးပေါင်းတပ်ဖွဲ့ (၂) ဖွဲ့သည် ဂိတ်များကို တင်းကြပ်စွာ စစ်ဆေး ပြုလုပ်နေကြောင်း သိရှိရသည်။
ယခု သီတင်းပတ်အတွင်း အင်းလေးဒေသ အနောက်ဘက်ခြမ်းရှိ အင်းတိမ်ရွာ နှင့် ကျားတွန်ရွာမှ ကားရှိသည့် ဒေသခံများ၏ နေအိမ်ကို တစ်အိမ်လျှင် ကျပ်ငွေ (၇၀,၀၀၀) ရိက္ခာထောက်ပံ့ကြေးဟုဆိုပြီး စစ်ကောင်စီ နှင့် ပအိုဝ်းပြည်သူ့စစ် (PNO/PNA) တို့က ဆက်ကြေး ကောက်ခံနေကြောင်း အင်းလေးဒေသခံ အသက် ၂၀ နှစ်ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ တိုက်ပွဲဖြစ်ပြီးကတည်းက သူတို့ စစ်ဆေးရေး တင်းကြပ်ထားတာပါ။ အင်းအနောက်ဘက်ခြမ်းက ပြည်သူတွေကို ဆက်ကြေးကောက်တယ်။ ရိက္ခာထောက်ပံ့ကြေးဆိုပြီး ကားရှိတဲ့အိမ်ကို တစ်အိမ် (၇၀,၀၀၀) ကျပ် တောင်းသွားတယ်။ ဂိတ်တွေမှာလည်း ကြုံရင်ကြုံသလို တောင်းနေတယ် “ ဟု ၎င်းအမျိုးသားက ပြောသည်။
ထို့အပြင် ညောင်ရွှေမြို့နယ်အတွင်းရှိ အင်းတိမ်ရွာရှိဂိတ်၊ မှော်ဘီဂိတ်၊ ထီရီးဂိတ် နှင့် ရွေဥဒေါင်း ဘုရားအနီးဂိတ်တွင် စစ်ကောင်စီ နှင့် ပအိုဝ်းပြည်သူ့စစ် (PNO/PNA) က ယခင်ထက် စစ်ဆေးရေးများ ပြုလုပ်လာနေကြောင်း သိရသည်။
“ တိုက်ပွဲက ငြိမ်နေတယ်ဆိုပေမယ့် ဂိတ်တွေမှာတော့ စစ်ကောင်စီနဲ့ (PNO/PNA) တပ်သားတွေက စစ်ဆေးရေးတွေ တင်းကြပ်နေတယ်။ ဂိတ်ဖြတ်ပြီး သွားလာတဲ့ သူကို ကြုံရင်ကြုံသလို ပိုက်ဆံ ကောက်နေတာတွေ့ရတယ် “ ဟု ၎င်း အမျိုးသားတစ်ဦးက ပြောသည်။
ပြီးခဲ့သည့် (ဇန်နဝါရီ ၃ ရက်) မွန်းလွဲပိုင်း ၁ နာရီဝန်းကျင်တွင် စစ်ကောင်စီ နှင့် သျှမ်းတောင် – ပြည်သူ့ကာကွယ်ရေး PDF တို့ အင်းလေးကန် အနောက်ဘက်ခြမ်း ဘုရားနီကျေးရွာ နှင့် သန်းတောင်ကျေးရွာကြားတွင် တိုက်ပွဲ ဖြစ်ပွားခဲ့ကြောင်း သိရသည်။
