သျှမ်းပြည် တောင်ကြီးခရိုင် ဆီဆိုင်မြို့နယ်အတွင်းရှိ ကယားပြည် (ကရင်နီ) စစ်ရှောင်များထဲမှ ကိုယ်ဝန်သည် အမျိုးသမီး (၅) ဦး သည် မွေးဖွားစားရိတ် ခက်ခဲနေကြောင်း သတင်းရရှိသည်။
ဆီဆိုင်မြို့နယ်အတွင်းရှိ စစ်ရှောင်များသည် လက်ရှိမှာ အလှူရှင်များနည်းလာကြောင်း၊ တဖက်မှာ နေ့စားအလုပ် ဖြစ်သည့် ပြောင်းချိုးလုပ်ကိုင်သော်လည်း အသုံးစားရိတ် မလုံလောက်ကြောင်း သိရသည်။
ထို့ကြောင့် ကိုယ်ဝန်သည်များအတွက် ယခုကာလအတွင်း ကလေးမွေးဖွားရန် စားရိတ် မတက်နိုင်သဖြင့် အခက်အခဲကြုံတွေ့နေရကြောင်း စစ်ရှောင်ကူညီသူ ဒေသခံတစ်ဦးက သျှမ်းသံတော်ဆင့်ကို ပြောသည်။
ဆီဆိုင်မြို့နယ် စစ်ရှောင်စခန်းတစ်ခုတွင် ကိုယ်ဝန် ၈ လ လွယ်ထားသည့်အမျိုးသမီးတစ်ဦးက “ ကျမက ကိုယ်ဝန်ဆောင် ၈ လ ရှိနေပြီ၊ နောက်လဆိုရင် ကလေးမွေးတော့မယ်။ အခြေနေ ပြန်ကောင်းရင်တော့ အိမ်မှာ ကလေးပြန်မွေးမယ်လို့ စဉ်းစားထားတယ်။ ဒါပေမယ့်လည်း လွိုင်ကော်ဘက်ကို မသွားရဲဘူး၊ ဒီ ဆီဆိုင်ဘက်မှာ မွေးမယ် ဆိုလည်း ဆွေးမျိုးတွေက မရှိတော့ မွေးတဲ့အချိန်ကြရင် သားဖွားဆရာနဲ့ မွေးရမလားမသိသေးဘူး “ ဟု ၎င်း ကိုယ်ဝန်သည် အမျိုးသမီးတစ်ဦးက ပြောသည်။
ကိုယ်ဝန်သည် တစ်ဦး ကလေးမွေးဖွားလာသည့်ချိန်တွင် လိုအပ်သော ငွေရေးကြေးရေးများနှင့် ဝမ်းဗိုက်ခွဲပြီး မွေးဖွားရသည့် ကိုယ်ဝန်သည် မိခင်တချို့သည် ကုန်ကျစရိတ် ပိုကုန်ကျလာကြောင်း စစ်ရှောင်ကူညီသူ ဒေသခံတစ်ဦးက ပြောသည်။
“ အခု ကလေးမွေးမယ်ဆိုရင်လည်း အဓိကတော့ ပိုက်ဆံလိုတာပေါ့။ တချို့ ကိုယ်ဝန်သည်တွေက ရိုးရိုးမွေးလို့ မရတော့ ဝမ်းဗိုက်ခွဲပြီး မွေးရတယ်။ ဝမ်းဗိုက်ခွဲပြီး မွေးမယ်ဆိုတော့လည်း ဆီဆိုင်ဆေးရုံမှာက မွေးလို့မရဘူး။ တောင်ကြီး ဆေးရုံကို တက်ပြီး မွေးရတယ်။ ဒီထဲ သူတို့ ဆေးရုံမှာနေရင် စားစရိတ်၊ ဆေးဝါးစရိတ်တွေ အများကြီးကုန်တာပေါ့ “ ဟု ၎င်း စစ်ရှောင်ကူညီသူ တစ်ဦးက ပြောသည်။
တောင်ကြီးဆေးရုံထံသို့ ကလေးမွေးဖွားရသည့် ကိုယ်ဝန်သည်များသည် အသွားအလာ ကားခစရိတ်၊ ကလေးမွေးဖွားရာ ကုန်ကျစရိတ် နှင့် စားသောက်ကုန်ကျစရိတ်များကြောင့် ကိုယ်ဝန်သည်တစ်ဦးလျှင် ကျပ် (၅) သိန်းဝန်းကျင် ကုန်ကျကြောင်း ဆိုသည်။
အလားတူ ကိုယ်ဝန်သည် အမျိုးသမီးများသည် ကလေးမွေးဖွားပြီးနောက်ပိုင်း လိုအပ်သော အစာအာဟာရဖြစ်သည့် အစားအစာများနှင့် ဆောင်းတွင်းကာလမှာ ကလေးငယ်များ၏ ကျန်းမာရေး စောင့်ရှောက်မှုမှာလည်း အထူးလိုအပ်လာနေကြောင်း သိရသည်။
