သျှမ်းပြည် မူဆယ်ခရိုင် မူဆယ်မြို့နယ် စွမ်စော်ရပ်ကွက် (၁) လမ်းတွင် ဖွင့်လှစ်နေသော လောင်းကစားရုံ တစ်ခု၌ ဗုံး ၂ လုံး ရှေ့ဆင့်နောက်ဆင့် ပေါက်ကွဲခဲ့ကြောင်း စုံစမ်း သိရှိရသည်။
ယမန်နေ့ (ဇန်နဝါရီ ၉) ရက် ည ၇ နာရီခွဲဝန်းကျင်တွင် မူဆယ်မြို့ စွမ်စော် (၁) လမ်းရှိ လောင်းကစားရုံ၌ ဗုံးနှစ်လုံး ပေါက်ကွဲခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“၇ နာရီခွဲဖို့ ၃ မိနစ်လောက်အလိုမှာ ဗုံးတစ်လုံးကွဲတယ်၊ နောက် ၄ – ၅ မိနစ်လောက်ခြားပြီး နောက်ထပ် ၁ လုံး ထပ်ပေါက်ကွဲတယ်၊ ရှေ့က ပေါက်တဲ့ တစ်လုံးကတော့ အသံအကျယ်ကြီးပဲ၊ ဒုတိယ တစ်လုံးကတော့ အသံ သိပ်မကျယ်ဘူး” ဟု မူဆယ်မြို့နေ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းဗုံး ၂ လုံးပေါက်ကွဲမှု နှင့် ပတ်သက်ပြီး မည်သည့်အဖွဲ့အစည်းက လုပ်ဆောင်သည်ကို မသိရကြောင်း နှင့် ထိခိုက်ပျက်စီးမှု များကိုလည်း မသိရသေးပေ။
ပြီးခဲ့သည့် ၂၀၂၂ ခုနှစ် ဩဂုတ် ၁ ရက်တွင်လည်း ဗုံးပေါက်ကွဲမှု နှစ်ကြိမ်ဖြစ်ပွားခဲ့ပြီး ရဲ ၂ ဦး သေဆုံးကာ ၄ ဦး ဒဏ်ရာရရှိခဲ့သည့် ဖြစ်စဥ် ဖြစ်ပွားခဲ့သည်။
သျှမ်းပြည် မူဆယ်ခရိုင် မူဆယ်မြို့နယ်သည် TNLA တအာင်း (ပလောင်) အမျိုးသားလွတ်မြောက်ရေး တပ်မတော်၊ ကချင်လွတ်မြောက်ရေး တပ်မတော် (KIA)၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)၊ သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)၊ စစ်ကောင်စီ နှင့် စစ်ကောင်စီ လက်အောက်ခံ ပြည်သူ့စစ်များ၊ မူဆယ် PDF တို့ လှုပ်ရှားနေပြီး မကြာခဏ ဗုံးပေါက်ကွဲမှု ဖြစ်ပွားခဲ့သည်။
Leave a Comments