သျှမ်းပြည် ကျိုင်းတုံခရိုင် မိုင်းလား ဒေသအတွင်း စစ်ရေး နှင့် ကိုဗစ် ကူးစက်ပျံ့နှံ့မှုများကြောင့် ၅ နှစ်ကျော်ကြာ ပိတ်ထားရသည့် ကျိုင်းတုံ – မိုင်းလားလမ်းပေါ်ရှိ တာပင်းဂိတ် ပြန်လည်ဖွင့်လှစ်ကြောင်း စုံစမ်းသိရသည်။
ကျိုင်းတုံခရိုင် ကျိုင်းတုံမြို့ နှင့် မိုင်းလားဒေသ အတွက် အထူးအရေးပါသော လမ်းကြောင်းဖြစ်သည့် တာပင်းဂိတ် သည် ပြီးခဲ့သည့် ၂၀၁၇ ခုနှစ်အတွင်း အစိုးရတပ် နှင့်”၀”တပ် တို့ စစ်ရေးတင်းမာမှုများ မိုင်းလားနယ်မြေ အတွင်းသို့ ကူးစက်လာမည်ကို စိုးရိမ်သဖြင့် ပိတ်ထားရခြင်းဖြစ်ပြီး ယခုနှစ် ဇန်နဝါရီလဆန်းပိုင်းမှ စတင်ကာ ပြန်လည် ဖွင့်လှစ်ခြင်း ဖြစ်သည်။
အဆိုပါ တာပင်း တံတား ပြန်လည်ဖွင့်လှစ်ခြင်း နှင့် ပတ်သက်ပြီး ဒေသအတွင်း ကူးသန်းရောင်းဝယ်ရေး နှင့် သွားလာရေး အတွက် အဆင်ပြေကြောင်းလည်း ဒေသအတွင်းမှ ကားသမားတစ်ဦးက သျှမ်းသံတော်ဆင့်ကို ပြောသည်။
“အခုလို တာပင်းဂိတ် တံတားလမ်းပြန်ဖွင့်တာက အစစ အရာရာ ဘက်က ကောင်းတယ်၊ ဘယ်လိုလဲဆို ကျိုင်းတုံ ကနေ မိုင်းလား သွားဖို့ ၂ နာရီပဲ မောင်းရတော့မယ်။ အရင် ဒီလမ်း မဖွင့်တုန်းက မိုင်းလားသွားဖို့ဆို ကျိုင်းတုံကနေ မိုင်းခတ် – မိုင်းယန်း – မိုင်းလား ဆိုပြီးတော့ သွားရတယ်၊ အဲ့ဒါက တစ်နေ့လောက်ကြာတယ်၊ လမ်းကလည်းကြမ်း၊ ငွေကုန်ကြေးကျလည်းများတဲ့လမ်းပေါ့” ဟု ကျိုင်းတုံ – မိုင်းလား ကားမောင်းသူ တစ်ဦးက သျှမ်းသံတော်ဆင့်ကို ပြောသည်။
ယခင် တာပင်းလမ်းတံတားဂိတ် ပိတ်ထားသည့် အချိန်တွင် ကျိုင်းတုံ – မိုင်းလား ကားမောင်းသည့် ကားသမား များသည် တစ်နေ့တာ လမ်းကို အသုံးပြုပြီး လမ်းကြမ်းသည့်အပြင် ငွေကုန်ကြေးကျလည်းများသည့်အတွက် တွက်ခြေမကိုက်ကြောင်းလည်း သိရသည်။
လက်ရှိ တာပင်းတံတားဂိတ် ပြန်လည်ဖွင့်လှစ်ခြင်း နှင့် ပတ်သက်ပြီး ကျိုင်းတုံ – မိုင်းလား သွားလာရေး လွယ်ကူ သည့်အပြင် ကုန်သွယ်ရေးကဏ္ဍနှင့် ကုန်စည်ဈေးနှုန်းများလည်း ပိုမိုလွယ်ကူလာနိုင်ကြောင်း ကျိုင်းတုံ ကားသမားက သျှမ်းသံတော်ဆင့်ကိုပြောသည်။
“အရင်က ကျိုင်းတုံသွားဖို့ဆိုရင် မိုင်းခတ်ကနေပြီးတော့ ဆီလူးရွာ – မိုင်းလား ပြီးတော့မှ ကျိုင်းတုံကို ရောက်တာ၊ အဲ့လမ်းအတွက် ကားခက တရုတ်ငွေ ၈၀၀ ယွမ်နီးနီး ကုန်တယ်၊ အခု တာပင်း တံတားလမ်းကနေ ကျိုင်းတုံ – မိုင်းလားဆိုရင် ကားခက ၄၀၀ ယွမ်လောက်ပဲကုန်တယ်၊ ဒီ တာပင်းတံတား မဖွင့်ခင်မှာ ယုဇန တစ်ထုပ်ကို ၅၀ ယွမ်လောက်ပေးရတယ်၊ ဒီဂိတ်ဖွင့်တော့ တစ်ထုပ်ကို ၁၅/၁၆ ယွမ်လောက်ပဲ” ဟု အထက်ပါ ကားသမားက ဆက်ပြောသည်။
တာပင်းဂိတ်ကို စစ်အာဏာသိမ်းပြီးနောက် ၂၀၂၁ ခုနှစ် စက်တင်ဘာ (၁၆) ရက်တွင် ပြန်လည်ဖွင့်ပေးခဲ့ကြောင်း စစ်ကောင်စီဘက်မှ ထုတ်ပြန်ခဲ့သော်လည်း ကိုဗစ် – ၁၉ ကူးစက်ပျံ့နှံ့မှု အကြောင်းပြချက်ဖြင့် မိုင်းလားဘက်မှ ဖွင့်ပေးမှု မရှိဘဲ ယခုနှစ်မှ နှစ်ဖက်စလုံး ပြန်လည်ဖွင့်လှစ်ခဲ့ကြောင်း သိရသည်။
ပြီးခဲ့သည့် ၂၀၁၇ ခုနှစ် စက်တင်ဘာ ၂၈ ရက်နေ့ ဝ တပ်ဖွဲ့ UWSA မှ စစ်အင်အား အပြည့်ဖြင့် မိုင်းလား – ကျိုင်းတုံ နယ်စပ်ဖက်တွင် လုံခြုံရေးအရ တပ်စခန်းများကို ချခဲ့ပြီးနောက် အောက်တိုဘာ ၂၅ ရက်တွင် စစ်ကောင်စီတပ်မှ တာပင်း စစ်ဆေးရေးဂိတ်ကို ပိတ်ချခဲ့ပြီး ယခု ၅ နှစ် အကြာ ပြန်လည်ဖွင့်လှစ်ခြင်းဖြစ်သည်။
