ထိုင်းနိုင်ငံရောက် ရွှေ့ပြောင်းအလုပ်သမားများကို ထိုင်းအာဏာပိုင်မှ စစ်ဆေးမှုတင်းကြပ်သွားမည်ဖြစ်ကြောင်း ဇန်နဝါရီ ၇ ရက်က ထုတ်ပြန်ကြောညာခဲ့သည်။

အဆိုပါ ထုတ်ပြန်ချက်တွင် ရွှေ့ပြောင်းအလုပ်သမားများကို ထိုင်းအာဏာပိုင်များ တားမြစ်ထားသည့် အလုပ်များကို လုပ်ကိုင်ခြင်းရှိ၊ မရှိကို စစ်ဆေးသွားမှာဖြစ်ပြီး တွေ့ရှိပါက ပြင်းထန်သည့် ပြစ်ဒဏ်ချမှတ် သွားမည် ဖြစ်ကြောင်း သိရသည်။

အဆိုပါ ထိုင်းအစိုးရမှ တားမြစ်ထားသည့် အလုပ်လုပ်ကိုင်ခြင်း တွေ့ရှိပါက ဘတ် ၅ထောင် မှ ဘတ် ၅ သောင်း အထိ ဒဏ်ငွေ ရိုက်သွားမှာဖြစ်ပြီး ပြည်တွင်းသို့ ပြန်ပို့ဆောင်သွားမည်ဖြစ်ကြောင်း ထုတ်ပြန်ချက်တွင် ရေးသားထားသည်။

ထိုသို့ စစ်ဆေးမှုကြောင့် ရွှေ့ပြောင်းအလုပ်သမားများအတွက် လုပ်ကိုင်နေသည့် အလုပ် နှင့် လုပ်ခွင့်ရထားသည့် အလုပ်မတူညီသည့်အတွက် စိုးရိမ်နေရကြောင်း ရွှေ့ပြောင်းအလုပ်သမားများကို ကူညီပေးနေသည့်သူက ပြောသည်။

“ တစ်ချို့ အလုပ်လုပ်ပိုင်ခွင့်နဲ့ သူတို့လုပ်နေတဲ့ အလုပ်က မကိုက်ညီတာရှိတယ်။ သူတို့က အလုပ်ဗီဇာ လုပ်တုန်းက အလုပ်တစ်မျိုးလုပ်နေတာက တစ်မျိုးဆိုတော့ မတူညီရင်လည်း သူတို့ ဖမ်းခံရနိုင်တယ်လေ။ ဖမ်းခံရရင်လည်း ပိုက်ဆံပေးရတယ်။ ကံမကောင်းရင် ပြည်နှင်ဒဏ်ပါ ခံရတက်တယ်။ ဒါကြောင့် ဒီလိုမျိုးအလုပ်မတူ လုပ်နေတဲ့သူကို ပိုပြီးစိုးရိမ်ရတယ်” ဟု ၎င်းက ပြောသည်။

ထိုင်းနိုင်ငံသားမှ မြန်မာရွှေ့ပြောင်းအလုပ်သမားများကို တားမြစ်ထားသည့် အလုပ်များကို ငှားရမ်းပြီး လုပ်ကိုင်ခွင့်ပေးထားပါက ဒဏ်ငွေ ဘတ်၁သောင်းမှ ဘတ် ၁ သိန်းထိ ချမှတ်သွားမှာဖြစ်ကြောင်း သိရသည်။

ထို့အပြင် ပထမ တစ်ကြိမ်ဒဏ်ငွေ ဆောင်ထားဖူးသည့် ထိုင်းနိုင်ငံသား က ဒုတိယ တစ်ကြိမ်ထပ်မံ ပြစ်မှားပါက ဒဏ်ငွေ အမြင့်ဆုံး ဘတ်ငွေ ၂ သိန်း ချမှတ်သွားမှာဖြစ်ပြီး ထောင်ဒဏ် ၁ နှစ်ချမှတ်သွားမှာဖြစ်ကြောင်း ထုတ်ပြန် ရေးသားထားသည်။

လက်ရှိတွင် မြန်မာနိုင်ငံ နှင့် ထိုင်း ကောင်စစ်ဝန်ရုံးတို့က passport ရုံးများကို ပိတ်ထားသည့်အတွက်ကြောင့် ထိုင်းနိုင်ငံတွင် Passport စာအုပ်ကို အသစ်ပြောင်းလဲမည့်သူက မပြောင်းလဲနိုင်တော့ကြောင့် ခက်ခဲနေကြောင်း သိရသည်။