သျှမ်းပြည်တစ်ဝှမ်းတွင် ယနေ့ ဇန်နဝါရီ ၉ ရက်နေ့ကစပြီး စစ်ကောင်စီ၏ ရွေးကောက်ပွဲအတွက် လူစာရင်းများ လိုက်လံကောက်နေကြောင်း စုံစမ်းသိရှိရသည်။
လာမည့် ဩဂုတ်လတွင် စစ်ကောင်စီက ကျင်းပမည့် ရွေးကောက်ပွဲအတွက် တစ်အိမ်တွင် လူဦးရေ မည်မျှရှိသည်ကို လိုက်လံကောက်ယူနေပြီး ဧည့်စာရင်းများလည်း တိုင်ကြားနေရကြောင်း သျှမ်းပြည်တွင်း နေထိုင်သူများထံမှ သိရသည်။
တစ်ချို့မြို့နယ်တွင် ဇန်နဝါရီလ ကစပြီး လိုက်လံ ကောက်ယူနေကြောင်း သိရသည်။
“တကယ် တရားဝင် ကောက်ခိုင်းတာတော့ ဒီနေ့ ဇန်နဝါရီ ၉ ရက်နေ့မှ စပြီးကောက်ခိုင်းတာ။ ကျနော်တို့ မြို့မှာဆိုရင်တော့ ဒီလအစ ကတည်းက စပြီးကောက်နေတာပဲ။ ဒီနေ့တော့ တရားဝင် ကွင်းဆင်းပြီး လိုက်ကောက်နေပြီ” ဟု မူဆယ်မြို့ ဒေသခံတစ်ဦးက ပြောသည်။
သျှမ်းပြည် တာချီလိတ်ခရိုင် နှင့် ကျိုင်းတုံ ခရိုင်တို့တွင်လည်း ယနေ့မှစပြီး စာရင်းကောက်ရန် ညွှန်ကြား လာကြောင်း တာချီလိတ် ဒေသခံတစ်ဦးက ပြောသည်။
“ စကောက်နေပြီလားတော့ မသိဘူး။ ဒီနေ့မှ ကောက်ဖို့ စာတော့ ကျလာပြီတဲ့။ တစ်ချို့နေရာမှာတော့ ကောက်နေပြီတဲ့။ ကျနော်တို့ အိမ်ဘက်တော့ မရောက်လာသေးဘူး” ဟု တာချီလိတ် ဒေသခံအမျိုးသားတစ်ဦးက ပြောသည်။
အလားတူ သျှမ်းပြည် တောင်ကြီးခရိုင် ၊ လွိုင်လင်ခရိုင်တို့မှာလည်း လိုက်လံကောက်ခံပြီး စစ်ဆေး နေလျက် ရှိကြောင်း သိရသည်။
ထို့အပြင် လူစာရင်းကောက်ခံသည့်အပြင် ဧည့်စာရင်းများကိုလည်း စစ်ဆေးမေးမြန်းနေပြီး ဧည့်စာရင်း မတိုင်သည့် အိမ်များက ဒဏ်ငွေ ပေးဆောင်ရကြောင်း သိရသည်။
စစ်အာဏာသိမ်းပြီးနောက်ပိုင်းတွင် သျှမ်းပြည်တစ်ဝှမ်း၌ တစ်လတစ်ကြိမ် ဧည့်စာရင်းတိုင်ထားရကြောင်း သိရသည်။
“ လူစာရင်းလည်း လာကောက်တယ်။ ပြီးတော့ ဧည့်စာရင်းတွေလည်း လာစစ်တယ်။ မတိုင်ထားတဲ့ အိမ်တွေ ဆိုရင် သူတို့ကို ပိုက်ဆံပေးရတယ်။ တစ်လ တစ်ကြိမ် သူတို့ကို ဧည့်စာရင်းတွေ သွားတိုင်ရတာ” ဟု သျှမ်းပြည် သီပေါမြို့နယ် ဒေသခံ အမျိုးသမီးတစ်ဦးက ပြောသည်။
သို့သော် တစ်ဖက်တွင်လည်း စစ်ကောင်စီက ပြုလုပ်မည့် ရွေးကောက်ပွဲကို အယုံကြည်မရှိကြောင်း မဲပေးလိုခြင်း မရှိကြောင်း သျှမ်းပြည် တောင်ကြီးမြို့နယ် အသက် ၃၀ ဝန်းကျင်ရှိ လူငယ် အမျိုးသားတစ်ဦးက ပြော သည်။
“ကျနော်တို့ကတော့ ၂၀၂၀ ရွေးကောက်ပွဲကိုပဲ ယုံကြည်တယ်။ သူတို့ထက်လုပ်မဲ့ ရွေးကောက်ပွဲကို လုံးဝ အယုံကြည်မရှိဘူး။ ဘာလို့လဲဆိုတော့ သူတို့က မတရား နဲ့ အာဏာသိမ်းယူထားတယ်။ ဒီရွေးကောက်ပွဲမှာလည်း သူတို့ နိုင်အောင်လုပ်ထားတဲ့ ရွေးကောက်ပွဲဆိုတော့ မဲပေးဖို့လည်း အစီစဉ်မရှိဘူး” ဟု ၎င်းက ပြောသည်။
စစ်ကောင်စီသည် ၂၀၂၀ ရွေးကောက်ပွဲကို မဲ မသင်္ကာမှုဖြင့် အာဏာကို သိမ်းယူခဲ့ရာတွင် ၂ နှစ် နီးပါးရှိလာပြီဖြစ်ပြီး လာမည့် ၂၀၂၃ ဩဂုတ်လတွင် PR စနစ်ဖြင့် ရွေးကောက်ပွဲကို ပြန်လည် ပြုလုပ်သွားမည်ဖြစ်ကြောင်း သိရသည်။
Leave a Comments