သျှမ်းပြည် မူဆယ်ခရိုင်ရှိ မြန်မာ – တရုတ် နယ်စပ်ဂိတ်များကို တရုတ်ဘက်မှ ပြန်ဖွင့်သော်လည်း မြန်မာဘက်မှ မဖွင့်သေးကြောင်း သတင်းသိရသည်။

ယနေ့ (ဇန်နဝါရီလ ၈ ) ရက် မနက်ပိုင်း အချိန်တွင် မြန်မာ – တရုတ် နယ်စပ်ဂိတ်ဖြစ်သည့် တရုတ်နိုင်ငံ ကျယ်ဂေါင်ဘက်ခြမ်း အပါအဝင် နယ်စပ်ဂိတ် (၃) ခု ကို ဖွင့်လှစ်လိုက်ပြီ ဖြစ်ကြောင်း မူဆယ်ဒေသခံ အသက် (၅၀) ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

“တရုတ် သံရုံးဘက်ကလည်း ဒီ နယ်စပ်ကုန်သွယ်ရေးဂိတ်တွေ အကုန်လုံးကို ပြန်ဖွင့်မယ်လို့ ထုတ်ပြန်ထား ပါတယ်၊ ဒါပေမဲ့ အခုချိန်ထိတော့ တံခါးနှစ်ခုပဲ ဖွင့်နေတာ တွေ့ရတယ်၊ ရွှေနန်းတော်ဂိတ် နဲ့ ဆင်ဖြူဂိတ်တံခါး ပေါက်ပဲ ဖွင့်နေတာ၊ မန့်ဝိန်းဂိတ်က ဖွင့်တာမတွေ့ရသေးဘူး” ဟု ရွှေနန်းတော်ဂိတ်အနီး ရောက်ရှိနေသည့် ဒေသခံ ကားသမား တစ်ဦးက သျှမ်းသံတော်ဆင့်ကို ပြောသည်။

အဆိုပါ နယ်စပ်ကုန်သွယ်ရေးဂိတ် ပြန်လည်ဖွင့်လှစ်ခြင်း နှင့် ပတ်သက်ပြီး ဂိတ် အဝင်အထွက်များကို ယခင်ကလို တခါသုံး ယာယီလက်မှတ်များ မဟုတ်တော့ပဲ စာအုပ်အနီဖြင့်သာ သွားလာခွင့်ပြုမည်ဖြစ်ပြီး အဆိုပါ စာအုပ်အနီများကိုလည်း သျှမ်းပြည်အတွင်း နေထိုင်ပြီး ၁၃/ မှတ်ပုံတင် ကိုင်ဆောင်ထားသူများကိုသာ ထုတ်ပေးမည်ဟု သတင်းများလည်း ထွက်ပေါ်နေသည်။

အဆိုပါ လမ်းကြောင်း (၃) ခုကနေ ဝင်ထွက်သွားလာမှုကို မြန်မာဘက်က သတ်မှတ်ပေးခြင်းမဟုတ်ဘဲ တရုတ်ဘက်က သတ်မှတ်ပေးခြင်း ဖြစ်ကြောင်းလည်း သိရသည်။

“လက်ရှိ အချိန်ထိတော့ မြန်မာဘက်ပိုင်း ကနေ ဘာမှ ပြင်ဆင်ထားတာ မတွေ့ရသေးဘူး၊ တခြား လက်မှတ် တွေ၊ ကျန်းမာရေး စစ်ဆေးချက်တွေကိုလည်း ပြင်ဆင်ထားတာ မတွေ့ရဘူး၊ တရုတ်ဘက်ကလည်း ဂိတ်ဖွင့်ပေးပြီ ဆိုပေမယ့် သူတို့သတ်မှတ်ထားတဲ့ နေရာထိပဲ ဝင်ခွင့်ပေးမယ်လို့ သိရတယ်” ဟု အထက်ပါ ကားသမားက သျှမ်းသံတော်ဆင့်ကို ပြောသည်။

လက်ရှိအချိန်တွင် နယ်စပ်ကုန်သွယ်ရေး ပြန်လည်ဖွင့်လှစ်ရန်အတွက် မြန်မာဘက်မှ ရုံးပိုင်းဆိုင်ရာ ဝာာဝန်ရှိသူများ ဆွေးနွေးနေဆဲဖြစ်ကြောင်း သိရသည်။

တရုတ်နယ်စပ်ဂိတ် ပြန်ဖွင့်ပြီး ဝင်၊ ထွက်သွားလာခွင့်ကိစ္စနှင့်ပတ်သက်ပြီး မူဆယ်ဒေသခံများအနေဖြင့် ကိုဗစ်-၁၉ ကူးစက်မှုနှုန်း ပြန်မြှင့် တက်လာမည်ကို စိုးရိမ်နေကြသည်။

“ အခုရက်ပိုင်း တရုတ်ဘက်မှာ ကိုဗစ်တွေ ပြန်မြှင့်နေတယ်။ နယ်စပ်ဂိတ်တွေဖွင့်ရင် မူဆယ်ဘက် ကိုဗစ် ပြန်မြှင့် လာမှာလည်းကြောက်တယ်။ တဖက်ကလည်း စီးပွားရေးကရှိတော့ ဖွင့်တာလည်းကောင်းပါတယ်” ဟု မူဆယ်မြို့တွင် နေထိုင်သည့် အမျိုးသမီးတစ်ဦး က သျှမ်းသံတော်ဆင့်ကို ပြောသည်။

လူပုဂ္ဂိုလ် နှင့် အသေးစား အိမ်စီးကား အပါအဝင် ဆိုင်ကယ် နှင့် လျှပ်စစ်ဆိုင်ကယ်များအနေဖြင့် မြန်မာ – တရုတ်ဈေး လမ်းကြောင်းကနေ နေ့စဉ် နံနက် (၈) နာရီကနေ ည (၉) နာရီခွဲအတွင်း ဝင်ထွက် သွားလာနိုင်မည်ဟု တရုတ်ဘက်က ထုတ်ပြန်ထားသည်။

လက်ရှိ အချိန်တွင် နယ်စပ်ဂိတ်၏ နှစ်ဘက်ဂိတ် တံခါးပေါက်များ၌ ကူးသန်းသွားလာရေးအတွက် စောင့်မျှော်နေသူများ နှင့် အခြေအနေကို စောင့်ကြည့်နေသည့်ကားသမားများ ဒေသခံများ များပြား နေကြောင်း သိရသည်။