သျှမ်းပြည် တာချီလိတ်ခရိုင် တာချီလိတ်မြို့တွင် အာဏာသိမ်းပြီးနောက်ပိုင်း ပိုက်ဆံချမ်းသာသည့် အသိုင်းအဝိုင်းများကို အမည်မသိ လက်နက်ကိုင်က ဖမ်းဆီးသွားပြီး ပြန်ပေးဆွဲနေလျက်ရှိကြောင်း စုံစမ်းသိရှိရသည်။

စစ်တပ် အာဏာသိမ်းပြီးနောက်ပိုင်း တာချီလိတ်မြို့တွင် ၂၀၂၂ ခုနှစ်ကုန်ပိုင်းမှစပြီး လောင်းကစားဝိုင်းပေါများလာပြီး အသေးစားဖွင့်ထားသည့် အွန်လိုင်းဂိမ်းဆိုင်ရှင်များ နှင့် ပိုက်ဆံချမ်းသာသည့် အသိုင်းအဝိုင်းများကို အမည်မသိ လက်နက်ကိုင်တပ်ဖွဲ့က ပြန်ပေးဆွဲ ခံနေရကြောင်း သိရသည်။

“ တာချီလိတ်မှာက ပိုက်ဆံရှိတဲ့ အသိုင်းဝိုင်းတွေက ပြန်ပေးဆွဲ ခံရတာရှိတယ်။ ပိုက်ဆံရှိတဲ့ အသိုင်းဝိုင်းကပဲ ပိုပြီးဖမ်းခံရတာ။ အသေးစား ဖွင့်ထားတဲ့ အွန်လိုင်းဂိမ်းဆိုင် ပိုင်ရှင်တွေလည်း ဖမ်းခံရတယ်။ ပြီးတော့ ပိုက်ဆံပေးပြီး ပြန်ထွက်လာရတာ” ဟု တာချီလိတ်မြို့ဒေသခံတစ်ဦးက ပြောသည်။

ထို့အပြင် ပြန်ပေးဆွဲသည့် အမည်မသိ အဖွဲ့အစည်း၏ နောက်ကွယ်တွင်လည်း လက်နက်ကိုင်တပ်ဖွဲ့ တစ်ခုရှိထားကြောင်း ဒေသခံများ ပြောပြချက်အရ သိရသည်။ သို့သော် သျှမ်းသံတော်ဆင့်မှ မည်သည့်လက်ကိုင်တပ်ဖွဲ့ ဖြစ်ကြောင်း စုံစမ်းနေဆဲပါ။

တာချီလိတ်မြို့ထဲတွင် အထက်ပါ ဖမ်းဆီးခံရမှုများရှိသော်လည်း တာဝန်ရှိ ရဲမှ ဖမ်းဆီးခြင်း၊ လုံခြုံရေးတိုးမြှင့်ခြင်း မရှိပေ။

“ ရဲတွေလည်း အလုပ်မလုပ်ဘူး။ ပြန်ပေးဆွဲခံရတာတွေရှိလည်း သူတို့လိုက်ဖမ်းတာတွေမရှိဘူး။ ပြီးတော့ လိုက်ဖမ်းနေတဲ့ အဖွဲ့အစည်းနောက်ကလည်း လက်နက်ကိုင်အဖွဲ့တွေရှိတယ်လို့ ကြားတယ်။ သူတို့တွေလည်း ရဲတွေကို အခွန်ပေးမယ်ထင်တယ်” ဟု တာချီလိတ်မြို့ ဒေသခံအမျိုးသားတစ်ဦးက ပြောသည်။

လက်ရှိတွင်လည်း အွန်လိုင်းဂိမ်းအတွင်း အလုပ်လုပ်နေသည့် လူငယ်တစ်ချို့ကို စစ်ကောင်စီလက်အောက်ခံ ရဲများက ဖမ်းဆီးနေလျက်ရှိကြောင်း အွန်လိုင်းဂိမ်းတွင် အလုပ်လုပ်နေသည့် လူငယ်တစ်ဦးက ပြောသည်။

“အွန်လိုင်းမှာ အလုပ်လုပ်တဲ့ သူတွေကိုတော့ ရဲတွေက လိုက်ဖမ်းတာတော့ရှိတယ်။ လိုက်ဖမ်းနေတာတော့ ၄ လ လောက်ပဲရှိသေးတယ်။ အွန်လိုင်း အသေးစားဖွင့်ထားတဲ့ ဆိုင်ကလူတွေဆို ဖမ်းခံရတာပိုများတယ်”ဟု ၎င်းက ပြောသည်။

တာချီလိတ်မြို့တွင် အာဏာသိမ်းပြီးနောက်ပိုင်း တရုတ်နိုင်ငံသား များပြားလာပြီး အွန်လိုင်းလောင်းကစားဂိမ်းများလည်း ပေါများလာကြောင်း သိရသည်။

ပြီးခဲ့သည့် ဒီဇင်ဘာ ၁၄ ရက်တွင်လည်း မဲခေါင်ရပ်ကွက်အတွင်းရှိ အဆောင်တစ်ခုထဲကို အမည်မသိလက်နက်ကိုင် အဖွဲ့အစည်းတစ်ခုက ဝင်ရောက် ဖမ်းဆီးမှုပြုလုပ်ခဲ့သည်။