သျှမ်းပြည် ကျောက်မဲခရိုင် ကျောက်မဲမြို့နယ် ကျောက်မဲမြို့ ရပ်ကွက် ၈ မြို့လယ်ခေါင်တွင် ယနေ့ ( ဇန်နဝါရီ ၄)ရက် ညနေ ၅နာရီခွဲတွင် အမျိုးသမီးငယ်တစ်ဦး ဓားပြတိုက်ခံရပြီး ဆိုင်ကယ် တစ်စီးပါသွားကြောင်း သတင်းရရှိသည်။
ကျောက်မဲမြို့ မြို့လယ်ခေါင် ရပ်ကွက် (၈) မုံလာခြံ ရွှေစေတီဘုံ ပစ္စည်းထားသည့်အနီးတွင် ယနေ့ (ဇန်နဝါရီ ၄) ရက် ညနေ ၅ နာရီခွဲအချိန် လူသွား၊ လူလာများသည့်အချိန်တွင် အမျိုးသမီးငယ်တစ်ဦး ဓားပြတိုက်ခံရပြီး ဖုန်း၊ ပိုက်ဆံအိတ် နှင့် ဆိုင်ကယ် တစ်စီးပါသွားကြောင်း ၎င်း၏ဖခင်က သျှမ်းသံတော်ဆင့်ကို ပြောသည်။
“ ရပ်ကွက် ၈ ထဲက ဘတ်စကတ်ဘောပြိုင်ပွဲကို သွားကြည့်ပြီး ပြန်လာတာ။ ပြန်လာပြီး မုံလာခြံ ရွှေစေတီဘုံပစ္စည်းထားတဲ့ နေရာနားမှာ လူ ၂ ဦးက ကျနော်ရဲ့ သမီးကို ဓားနဲ့ထောက်ပြီး ဆိုင်ကယ်၊ ဖုန်း၊ ပိုက်ဆံအိတ်၊ မှတ်ပုံတင်၊ လိုင်စင် အကုန်ပါသွားတယ် “ ဟု ၎င်းဖခင်က ပြောသည်။
ဆိုင်ကယ်သည် Honda ( စကူပီ ) အနက်ရောင် အမျိုးအစားဖြစ်ကာ လိုင်စင်နှင့် ဝယ်ထားရသောကြောင့် ကျပ်သိန်း ၂၀ ဝန်းကျင်ထိ ဈေးနှုန်းရှိကြောင်း ဆိုသည်။
“ ခေတ်ကာလ အခြေနေမကောင်း၊ လောင်းကစားဝိုင်းကလည်း ပေါတယ်။ မူးယစ်ဆေးသုံးစွဲတဲ့ သူလည်းများတော့ အမျိုးမျိုး စိတ်ပူနေတာပေါ့။ အခုက ဓားပြတိုက်ခံရတဲ့နေရာဆို လူမရှိတဲ့နေရာလည်း မဟုတ်ဘူး။ မြို့လယ် လူအုပ်များတဲ့နေရာမှာ ဓားပြလာတိုက်တယ်ဆိုတော့ အရမ်းကို ဆိုးရွားလွန်းနေပြီ “ ဟု ဓားပြတိုက်ခံရသည့် အမျိုးသမီးငယ်၏ ဖခင်က ထပ်လောင်းပြောသည်။
ကျောက်မဲမြို့သည် လက်နက်ကိုင် တပ်ဖွဲ့များ ပေါများသည့် နေရာဖြစ်သလို တိုက်ပွဲမကြာခဏ ဖြစ်ဖူးသည့် နေရာတစ်ခုဖြစ်ပြီး စစ်အာဏာသိမ်းပြီးနောက်ပိုင်းမှာ လောင်းကစားဝိုင်း ပေါများလာသည့်နေရာတစ်ခုလည်း ဖြစ်ကြောင်း သိရသည်
Leave a Comments