စစ်အာဏာသိမ်းပြီးနောက် မြန်မာပြည်သူများသည် ပြည်ပထွက်ခွာမှု များပြားလာသည့်အတွက် စစ်ကောင်စီမှ နိုင်ငံခြားလက်မှတ်ထုတ်ပေးမှု ရပ်ဆိုင်းလိုက်ရသည့် အဆင့်ထိ ဖြစ်ပွားခဲ့သည်။

လက်ရှိတွင် မြန်မာတဝှမ်းနည်းတူ သျှမ်းပြည်တွင် ပြုလုပ်နေသည့် နိုင်ငံကူးလက်မှတ် (Passport ) ထုတ်ဝေမှုကိုလည်း စက္ကူမလုံလောက်မှုကြောင့် ပိတ်သိမ်းထားသည်ဟု အကြောင်းပြချက်ဖြင့် Passport ရုံးဝန်ထမ်းများက ပြောဆိုသည်။

အဆိုပါ ပိတ်ဆိုင်းမှုသည် ဇန်နဝါရီ ၂ ရက် မှစပြီး (၃)ပတ်ကြာထိ ပိတ်သွားမည်ဖြစ်ကြောင်း၊ နိုင်ငံကူး လက်မှတ်ရုံးများတွင် System အဆင့်မြင့်တင် ဆောင်ရွက်မည်ဖြစ်သဖြင့် ခေတ္တပိတ်ဆိုင်းရခြင်း ဖြစ်ကြောင်းလည်း သိရသည်။

“ ပိတ်လိုက်တာကတော့ ၂ ရက်နေ့ကနေ စပိတ်လိုက်တာ။ ၃ ပတ် လောက်ပိတ်သွားမယ်တဲ့။ စာအုပ်လုပ်ဖို့ စက္ကူတွေ မလောက်လို့ ပိတ်လိုက်ရတာတဲ့။ လုပ်တဲ့သူတွေ အရမ်းများတော့ စက္ကူတွေ မလောက်တော့လို့ ပိတ်လိုက်တာ” ဟု တောင်ကြီးမြို့ Passport လုပ်ပေးနေသည့် အမျိုးသားက ပြောသည်။

လက်ရှိ သျှမ်းပြည်အတွင်း တောင်ကြီးမြို့ ၊ လားရှိုးမြို့ နှင့် ကျိုင်းတုံမြို့ရှိ Passport ရုံး အားလုံးကို ပိတ်ထားပြီး အဆိုပါ ရုံးများကို ဇန်နဝါရီ ၅ ရက်နေ့ ပြန်ဖွင့်သွားမည်ဟု ထွက်ပေါ်လာသည့် သတင်းသည် ကောလဟာလ ဖြစ်ကြောင်း Passport ပြုလုပ်ပေးသည့် အမျိုးသားက ပြောသည်။

စစ်တပ်က အာဏာသိမ်းပြီးနောက်ပိုင်း နိုင်ငံခြားထွက်ခွာလာသူ များပြားလာပြီး ၂၀၂၂ ခုနှစ်တွင် ထွက်ခွာလာသူမှ လူငယ်အများစု ဖြစ်ကြောင်း သိရသည်။

ထိုအပြင် အာဏာသိမ်းပြီးနောက်ပိုင်း တောင်ကြီးတွင် Passport လုပ်သူများပြားလာသည့်အတွက်ကြောင့် တစ်ရက်ကို ၁၃၀ ဦးသာ ထုတ်ပေးကြောင်း သိရသည်။

“ ဟိုအရင်ကဆိုရင် တစ်ရက်ကို လာလုပ်တဲ့သူ အများဆုံးဆို ၇၀ ထိပဲရှိတယ်။ အခုတော့ အရမ်းကိုများလာတယ်။ Passport ရုံးကနေ တစ်ရက်ကို ၁၃၀ ထိ ပဲ ထုတ်ပေးတော့တယ်။ အကန့်သတ်နဲ့ ထုတ်ပေးတာ။ နိုင်ငံခြားထွက်တဲ့ သူတွေလည်း လူငယ်တွေက ပိုများတယ်” ဟု ၎င်းက ပြောသည်။

အလားတူ လက်ရှိ နိုင်ငံခြားကို ထွက်ရန်စောင့်ဆိုင်းနေသည့် လူငယ်များကလည်း Passport လုပ်ရန် ငွေပေးထားရသည့်အတွက် Passport မရမှာကို စိုးရိမ်နေကြသည်။

“Passport လုပ်တာက ပွဲစားနဲ့လုပ်မှ အမြန်ရတာလေ။ အခုက Passport လုပ်ဖို့ ပွဲစားတွေကို ပိုက်ဆံပေးထားတယ်။ အခုလို ရုံးကလည်း ထပ်လာပိတ်တော့ အချိန်စောင့်ရတာ ကြာတာပေါ့။ မရလာမှာကိုလည်း စိတ်ပူရတယ်” ဟု Passport သွားရောက်လုပ်ထားသည့် ပင်လုံမြို့ လူငယ်တစ်ဦးက ပြောသည်။

နိုင်ငံကူးလက်မှတ် (Passport) ပြုလုပ်ပြီး ပြည်ပနိုင်ငံသို့ လူငယ်အများထွက်ခွာ အလုပ်လုပ်နေမှုကြောင့် နောင်တချိန်တွင် ပြည်တွင်းတွင် အလုပ်သမားရှားပါးမှု ပြဿနာ ဖြစ်ပေါ်လာနိုင်သဖြင့် Passport ပြုလုပ်မှုကို ရပ်ဆိုင်းလိုက်ရခြင်းဖြစ်သည်ဟုလည်း စစ်ကောင်စီ အသိုင်းအဝန်းက သတင်းထွက်ပေါ်နေသည်။

စစ်တပ်က အာဏာသိမ်းပြီးနောက်ပိုင်း ပြည်တွင်း စီးပွားရေး နှင့် နိုင်ငံရေးအခြေနေ မတည်ငြိမ်သောကြောင့် ပြည်သူတွေ နိုင်ငံခြားထွက်ပြီး အလုပ်သွားရောက်လုပ်ကိုင်သူ တစ်နေ့ထက်တစ်နေ့ ပိုများပြားလာသည်။