သျှမ်းပြည် လွိုင်လင်ခရိုင် လွိုင်လင်မြို့နယ် ပင်လုံမြို့အတွင်း အိမ်၊ ခြံပေါင်ပြီး လောင်းကစားသွားရောက် ကစားနေကြကြောင်း စုံစမ်း သိရှိရသည်။
ထိုသို့ အိမ်၊ ခြံ ပေါင်ပြီး လောင်းကစားများကို သွားရောက် ကစားသည့်သူများ များလာသည့်အတွက်ကြောင့် ယခင်ကထက် သူခိုးပေါများလာကြောင်း ပင်လုံမြို့ ဒေသခံ ၂၂ နှစ်အရွယ် အမျိုးသားတစ်ဦးက ပြောသည်။
“ ကျနော်ရဲ့ အသိထဲက ဦးလေးဆိုရင် ခြံတွေပေါင်ပြီးတော့ သွားဆော့တာ။ အခုတလော လောင်းကစားဝိုင်းမှာ လူတွေ အမျာကြီးပဲ။ သွားဆော့တဲ့ သူတွေလည်းများတယ်။ လောင်းပြီး ရှုံးလာတဲ့သူတွေဆိုရင် ရပ်ကွက်ထဲက ပစ္စည်းတွေ လိုက်ခိုးပြီးတော့ ထပ်သွားလောင်းတာလည်း ရှိတယ်” ဟု ၎င်းက ပြောသည်။
အဆိုပါ လောင်းကစားဝိုင်းကြောင့် ပင်လုံမြို့တွင် သူခိုးပေါများလာပြီး ပြည်သူများအတွက် လုံခြုံမှုမရှိတော့ကြောင်း၊ ထိုလောင်းကစားဝိုင်းသည် ဟိုခိုက်ကျေးရွာတွင် ယခုထိ ဖွင့်လှစ်ထားလျက်ရှိကြောင်း သိရသည်။
“ တလောတုန်းက ဘုရားကြီးရှေ့မှာ သွားဖွင့်မလို့ လုပ်သေးတယ်။ သူများမပေးဖွင့်လို့ အခုထိတော့ ဟိုခိုက်နားပဲ ဖွင့်ထားတာ။ ကျနော်တို့ ကျေးရွာဆိုရင် အမြဲတမ်း အိမ်မှာလူစောင့်ထားရတယ်။ ၁ နာရီလောက် လူမရှိတာနဲ့ အိမ်ဖောက်ခံရပြီ” ဟု ဝမ်အဲန်ကျေးရွာ ဒေသခံတစ်ဦးက ပြောသည်။
လက်ရှိ လွိုင်လင်မြို့နယ်အတွင်း မူးယစ်ဆေးဝါးသုံးစွဲသူများထက် လောင်းကစားဆော့ သူများ ပိုကြောက်နေရကြောင်း သိရသည်။
ပင်လုံမြို့တွင် လောင်းကစားဝိုင်းများ ဖွင့်လှစ်ထားခြင်း မရှိထားကြောင်း ပင်လုံမြို့အုပ်ချုပ်ရေးမှူးက သျှမ်းသံတော်ဆင့်ကို ပြောသည်။
“ ကျနော်တို့ နယ်မြေတွင်းမှာ ဒီလိုလုပ်ခွင့်မပေးထားပါဘူး။ လောင်းကစားဝိုင်းတွေ ဖွင့်ထားတာလည်းမရှိဘူး” ဟု ၎င်းက ပြောသည်။
အာဏာသိမ်း ၂ နှစ်နီးပါးတွင် သျှမ်းပြည်တစ်ဝှမ်း လောင်းကစားဝိုင်းများ ပိုများလာပြီး တရားဥပဒေ စိုးမိုးမှုမရှိတော့ပေ။
Leave a Comments