သျှမ်းပြည် မြောက်ပိုင်း သိန္နီမြို့နယ် မိုင်းပါးကျေးရွာ အုပ်စု၊ နားမိုင်းကျေးရွာတွင် သားဖြစ်သူမှ ဖခင်အရင်းကို ဓားဖြင့် ခုတ်သတ်မှု ဖြစ်ပွားခဲ့ကြောင်း သတင်းသိရသည်။
ယမန်နေ့ (ဒီဇင်ဘာလ ၂၆) ရက်တွင် ညနေပိုင်း ၅ နာရီခွဲဝန်းကျင်တွင် အသက် ၃၀ ဝန်းကျင်ရှိ အမျိုးသား တစ်ဦးသည် အရက်မူးပြီး ဇနီးဖြစ်သူနှင့် စကားများရန်ဖြစ်နေချိန် ဖခင်ဖြစ်သူက ဝင်တားရာ ဓားဖြင့် ခုတ်သတ်မှု ဖြစ်ပွားခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“အရက်မူးပြီး လင်မယားနှစ်ယောက် ရန်ဖြစ်စကားများကြတာ၊ သူ့အဖေက ဝင်ပြီးတားတာပေါ့၊ အဲ့ဒီအချိန်မှာပဲ သူ(သားဖြစ်သူ)က ဓားဆွဲပြီး သူ့အဖေကို ခုတ်သတ်လိုက်တာ၊ အချက်တွေလည်း တော်တော်များတယ်၊ ပွဲချင်းပြီး သေဆုံး သွားတယ်” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ဖခင်အရင်းကို ဓားဖြင့် ခုတ်သတ်သူသည် အသက် ၃၀ အရွယ်ရှိစိုင်းအောင်ကျော် ဖြစ်ပြီး ခုတ်သတ် ခံရသည့် ဖခင်သည် အသက် ၆၀ ဝန်းကျင် ရှိနေကြောင်း သတင်းသိရသည်။
လက်ရှိတွင် စိုင်းအောင်ကျော်သည် ထွက်ပြေးလွှတ်မြောက်နေပြီး ကျေးရွာတာဝန်ရှိသူများက လိုက်လံရှာဖွေ နေကြောင်းလည်း သိရသည်။
“သူ့အဖေကို ဓားနဲ့ ခုတ်သတ်ပြီးပြီးချင်းထွက်ပြေးနေတာ၊ ပြန်မလာသေးဘူး၊ ရပ်ရွာလူကြီး နဲ့ ဝာာဝန်ရှိသူတွေက လိုက်ရှာနေတာ၊ တစ်ဖက်ကလည်း နာရေးအတွက် ပြင်ဆင်နေရတာပေါ့၊ စိုင်းအောင်ကျော်က အရက်သောက် ရင် သွေးဆူတတ်တဲ့သူဖြစ်တယ်” ဟု နီးစပ်သည့် အမျိုးသား တစ်ဦးကလည်း သျှမ်းသံတော်ဆင့်ကို ပြောသည်။
ယင်းကိစ္စ ဖြစ်စဉ်နှင့် ပတ်သက်ပြီး ရဲစခန်းသို့ တိုင်ကြားမှု ပြုလုပ်ထားသော်လည်း မည်သည့်တုန့်ပြန်မှုမှ မရှိဘဲ လက်ရှိတွင် ရပ်ရွာတာဝန်ရှိသူ နှင့် ဒေသအတွင်း လှုပ်ရှားနေသည့် SSPP/SSA တို့မှ စိုင်းအောင်ကျော်ကို ရှာဖွေ နေကြောင်း သတင်းသိရသည်။