သျှမ်းပြည်တောင်ပိုင်း လွိုင်လင်မြို့နယ် ပင်လုံမြို့အတွင်း အိမ်ဆောက်ရန်အတွက် ပိုက်ဆံ ၂ သိန်း ကောက်ယူ တောင်းခံခြင်းမရှိကြောင်း ပင်လုံမြို့ အုပ်ချုပ်ရေမှူး ဦးရာဇာအောင်က ယနေ့ (ဒီဇင်ဘာ ၂၂) ရက် နံနက်ပိုင်းတွင် သျှမ်းသံတော်ဆင့်ကို တုံ့ပြန်ပြောဆိုသည်။
ယမန်နေ့ (ဒီဇင်ဘာလ ၂၁) ရက်တွင် သျှမ်းသံတော်ဆင့်မှ ပင်လုံမြို့ ပြည်သူများ အိမ်ဆောက်ရန် အတွက် မြို့အုပ်ချုပ်ရေးမှူးထံ ပိုက်ဆံ ၂ သိန်းပေးသွင်းပြီး ထောက်ခံစာ တောင်းရကြောင်း ဒေသခံများ ပြောပြချက်အရ ရေးသားခဲ့သည်။
ယင်းကိစ္စနှင့် ပတ်သက်ပြီး ယနေ့ ဒီဇင်ဘာလ ၂၂ ရက်တွင် ပင်လုံမြို့ အုပ်ချုပ်ရေးမှူး ဦးရာဇာအောင်က ပိုက်ဆံတောင်းယူမှု မရှိကြောင်း သျှမ်းသံတော်ဆင့်ကို ပြန်လည်ပြောဆိုခဲ့သည်။
ပင်လုံမြို့ အုပ်ချုပ်ရေးမှူးမှ ပိုက်ဆံတောင်းယူသည်ဟုဆိုပါက သက်သေအထောက်အထား အချက်အလက်ဖြင့် တင်ရန်နှင့် အိမ်ဆောက်သည့် ကိစ္စသည် မြို့အုပ်ချုပ်ရေးမှူးထံ စာတင်စရာ မလိုကြောင်းလည်း ဦးရာဇာအောင်က ပြောဆိုလိုက်သည်။
“ကျနော်က ပိုက်ဆံတောင်းတယ်၊ ယူဖြစ်တယ် ဘာညာဆိုရင် ကျနော်ပြောသလို ကျနော့်ကို အချက်အလက်နဲ့တင်ပါ၊ သက်သေ သာဓက နဲ့တင်ပါ၊ ကျနော့်ရုံးကို ထောက်ခံစာ လာယူရတယ်ဆိုရင် ကျနော်က လက်မှတ်ထိုးတယ်၊ ပိုက်ဆံတောင်းတယ်၊ ဒီလိုသက်သေတွေနဲ့ တင်ပါ” ဟု ပင်လုံမြို့ အုပ်ချုပ်ရေးမှူး ဦးရာဇာအောင်က သျှမ်းသံတော်ဆင့်ကို ပြောသည်။
ယခင်အချိန်များတွင် ပင်လုံမြို့မှ ပြည်သူများအနေဖြင့် နေအိမ်ဆောက်လိုပါက သက်ဆိုင်ရာ ရပ်ကွက် အုပ်ချုပ်ရေးမှူးနှင့် စည်ပင်များကို အကြောင်းကြားပြီး ခွင့်ပြုစာ တောင်းရသော်လည်း လက်ရှိတွင် မြို့အုပ်ချုပ်ရေး မှူးထံမှ ခွင့်ပြုချက် တောင်းရကြောင်းလည်း ဒေသခံများက ပြောဆိုကြသည်။
“အရင်က အိမ်ဆောက်ဖို့ဆိုရင် ကျေးရွာ/ရပ်ကွက် အုပ်ချုပ်ရေးမှူးက ခွင့်ပြုပြီးရင် ၊ ဆေးရုံ၊ စည်ပင် နဲ့ မီးသတ် ထံက ခွင့်ပြုချက် တောင်းရတယ်၊ အဲ့ဒါတွေအတွက် တစ်နေရာကို ၅ ထောင်ကျပ်ပဲ ပေးရတယ်၊ အခုတော့ မြို့အုပ်ချုပ်ရေးမှူးကို ၂ သိန်း ပေးရတယ်ဆိုတော့ အရမ်းများတယ်” ဟု အမည်မဖော်လိုသူ ဒေသခံတစ်ဦးက သျှမ်းသံတော်ဆင့်ကို ပြောသည်။
အိမ်ဆောက်ရန်အတွက် အိမ်ဆောက်ပစ္စည်းများ ဈေးကြီးသည့်အပြင် ယခုလို မြို့အုပ်ချုပ်ရေးမှူးထံ ပိုက်ဆံ ၂ သိန်းကျပ် ပေးဆောင်ရခြင်းသည် အဆင်မပြေကြောင်း ပြည်သူများ က ပြောဆိုနေကြသည်။
ယင်းကဲ့သို့ ပြည်သူများ ပြောဆိုနေခြင်းသည် သတင်းမှားသာ ဖြစ်ကြောင်းလည်း ဦးရာဇာအောင်က တုံ့ပြန် ပြောဆိုထားသည်။
