သျှမ်းပြည်တောင်ပိုင်း လွိုင်လင်ခရိုင်အတွင်း နေထိုင်သည့် ပြည်သူများ အိမ်သစ်ဆောက်လိုပါက မြို့ အုပ်ချုပ်ရေးမှူးထံ ပိုက်ဆံ နှစ်သိန်း ပေးဆောင်ရကြောင်း သတင်း သိရသည်။
ယခင် အချိန်များတွင် လွိုင်လင်ခရိုင် ပြည်သူများအနေဖြင့် နေအိမ်ဆောက်လိုပါက သက်ဆိုင်ရာ ရပ်ကွက် အုပ်ချုပ်ရေးမှူးနှင့် စည်ပင်များကို အကြောင်းကြားပြီး ခွင့်ပြုစာ တောင်းခံရသည့်အပြင် လက်ရှိတွင် မြို့အုပ်ချုပ်ရေးမှူးထံမှ ခွင့်ပြုချက် တောင်းရကြောင်းလည်း ဒေသခံများက ပြောသည်။
လက်ရှိတွင် ပင်လုံမြို့မှ ပြည်သူများ အိမ်ဆောက်ရန်အတွက် မြို့အုပ်ချုပ်ရေးမှူးထံ ပိုက်ဆံ ၂ သိန်းပေးသွင်းပြီး ထောက်ခံစာ တောင်းရကြောင်း ဒေသခံများက ပြောသည်။
“အရင်က အိမ်ဆောက်ဖို့ဆိုရင် ကျေးရွာ/ရပ်ကွက် အုပ်ချုပ်ရေးမှူးက ခွင့်ပြုပြီးရင် ၊ ဆေးရုံ၊ စည်ပင် နဲ့ မီးသတ် ထံက ခွင့်ပြုချက် တောင်းရတယ်၊ အဲ့ဒါတွေအတွက် တစ်နေရာကို ၅ ထောင်ကျပ်ပဲ ပေးရတယ်၊ အခုတော့ မြို့အုပ်ချုပ်ရေးမှူးကို ၂ သိန်း ပေးရတယ်ဆိုတော့ အရမ်းများတယ်” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
အိမ်ဆောက်ရန်အတွက် အိမ်ဆောက်ပစ္စည်းများ ဈေးကြီးသည့်အပြင် ယခုလို မြို့အုပ်ချုပ်ရေးမှူးထံ ပိုက်ဆံ ၂ သိန်းကျပ် ပေးဆောင်ရခြင်းသည် အဆင်မပြေကြောင်း ပြည်သူများ က ပြောဆိုနေကြသည်။
“စားဝတ်နေရေးက တစ်ဖက်၊ အခွန်အကောက်တွေက တစ်ဖက်နဲ့မို့ ပြည်သူတွေ အတွက် ပိုက်ဆံ နှစ်သိန်းဆိုတာ နည်းတဲ့ဗမာဏ မဟုတ်ဘူးလေ၊ ဖြစ်နိုင်ရင်တော့ အရင်ကလိုပဲ အဆင်ပြေပြေ ဖြစ်စေချင်တယ်၊ အဲ့လိုဆိုရင်လည်း စားဝတ်နေရေးလည်း ပြေလည်လာမယ်” ဟု လည်း ၎င်းဒေသခံ က ဆက်ပြောသည်။
အိမ်ဆောက်သည့် ပြည်သူများထံမှ ပိုက်ဆံ နှစ်သိန်း ကောက်ယူ တောင်းခံနေသည့် မြို့အုပ်ချုပ်ရေးမှူးသည် ရာဇာအောင် ဖြစ်ပြီး ပင်လုံမြို့သို့ ပြောင်းရွှေ့ တာဝန်ကျသည်မှာ မကြာသေးကြောင်းလည်း သိရသည်။
ပင်လုံမြို့သည် စစ်တပ်မှ နိုင်ငံတော် အာဏာသိမ်းယူပြီး တစ်နှစ်ကျော် ကြာလာပြီးနောက် အာဏာပိုင်များ၏ ငွေကြေးတောင်းခံမှုများ မကြာခဏ ရှိသည့်အပြင် ညအချိန်မတော် ဧည့်စာရင်း ဝင်ရောက်စစ်ဆေးမှုများကြောင့် ဖမ်းဆီးခံရသည့် လူငယ် (၃၀) ကျော်ရှိကြောင်းလည်း သတင်းရရှိသည်။
Leave a Comments