သျှမ်းပြည်မြောက်ပိုင်း ကျောက်မဲမြို့ သျှမ်းစာပေ နှင့် ယဉ်ကျေးမှုကျောင်းအတွင်းရှိ စစ်ဘေးရှောင်များ စစ်ကောင်စီမှ နေရပ်ပြန်ရန် ထပ်မံဖိအားပေးပြီးနောက် စစ်ရှောင်များသည် မြို့ပေါ်သို့ အိမ်ငှားနေထိုင်ရန် ဆုံးဖြတ်ခဲ့ကြောင်း စုံစမ်းသိရှိရသည်။

ပြီးခဲ့သည့် (ဒီဇင်ဘာလ ၁၅ ) ရက်တွင် စစ်ကောင်စီ လက်အောက်ခံ မြို့နယ် ရဲမှူး၊ ဦးစီးမှူး နှင့် တခြား တာဝန်ရှိသူ ၃ ဦးတို့မှ သျှမ်းစာပေ နှင့် ယဉ်ကျေးမှုကျောင်းရှိ စစ်ရှောင်များကို နေရပ်ပြန်ရင် ဖိအားပေးခဲ့သည်။

ထို့ကြောင့် စစ်ရှောင်များသည် နေရပ်ပြန်ရန် အခက်ခဲများစွာ ရှိနေသဖြင့် ကျောက်မဲမြို့ပေါ်၌ အိမ်ငှားနေထိုင်ရန် ဆုံးဖြတ်ခဲ့ပြီး မြို့ပေါ်ရှိ အိမ်ငှားခ တစ်လလျှင် (၈၀,၀၀၀) ကျပ် ကုန်ကျနေသည့်အတွက်ကြောင့် အခက်ခဲ ကြုံတွေ့နေရသည်ဟု စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ အိမ်က ကျဉ်းရင်တော့ စျေးသက်သာတယ် တစ်လကို (၄ သောင်း၊ ၅သောင်း) ကျပ် လောက်တော့ ပေးရမှာပေါ့။ အိမ်က မိုးလှုံ၊ လေလှုံပြီး နည်းနည်းကျယ်ရင်တော့ တစ်လကို (၇သောင်း၊ ၈သောင်း) ကျပ် လောက်တော့ ပေးရတယ်။ ကျမတို့ စစ်ရှောင်တွေက ဘာအလုပ်မှ မရှိဘူး “ ဟု ၎င်း အမျိုးသမီးတစ်ဦးက ပြောသည်။

လက်ရှိ သျှမ်းစာပေ နှင့် ယဉ်ကျေးမှုကျောင်းသို့ ရောက်ရှိနေသော စစ်ရှောင်များသည် အိမ်ထောင်စု ၄၈ စု နှင့် လူဦးရေ ၁၇၀ ကျော်ရှိပြီး များသောအားဖြင့် သက်ကြီးရွယ်အို နှင့် ကလေးငယ်များ ဖြစ်ကြကြောင်း သိရသည်။

အဆိုပါ သျှမ်းစာပေ နှင့် ယဉ်ကျေးမှု ကျောင်းသို့ ရောက်ရှိနေသော စစ်ရှောင်များသည် ဟူးဆွန်ကျေးရွာ၊ တွန်ဟိတ်ကျေးရွာ၊ ချုံးဟောင်းနှင့် နဲမ်းဆိုင်းရွာတို့မှ ဒေသခံများဖြစ်ရာ လူဦးရေ ၁၇၀ ကျော်တို့သည် ယခုလ ဒီဇင်ဘာလကုန်ပိုင်းမှစ၍ မြို့ပေါ်သို့ ရွေ့ပြောင်းပြီး အိမ်ငှားနေထိုင်မည်ဖြစ်ကြောင်း သိရသည်။

“ ကျမတို့ နေရပ်အိမ်ကို မပြန်နိုင်တာ ၁ နှစ်ကျော်ရှိပြီ။ အခြေအနေတွေ ဘယ်လိုရှိမှန်းမသိ၊ အိမ်တွေလည်း ပျက်စီးကုန်ပြီ။ အိုး၊ အိမ်တွေ ဘာမှမရှိတော့ဘူး။ စစ်ကောင်စီကတော့ နေရပ်ကိုပြန်ခိုင်းတယ်။ ပြန်ရင် အိုး၊ အိမ်တွေမရှိဘူး ဘယ်လိုစားသောက်ရမှန်း မသိ၊ ဘယ်လိုနေရမှန်းမသိတော့ အရမ်းကို ပူဆွေးနေတယ်။ အဲ့ကြောင့် မြို့ပေါ်မှာ အိမ်ငှားနေဖို့ ဆုံးဖြတ်ထားတယ် “ ဟု ၎င်း အမျိုးသမီးက ထပ်လောင်းပြောသည်။

ထို့အပြင် အသက် ၂၀ နှစ်ကျော် စစ်ရှောင် အမျိုးသားတစ်ဦးက မြို့ပေါ်သို့ ရွှေ့ပြောင်းပြီး အိမ်ငှားနေထိုင်လျှင် အလုပ်မရှိပါက စားဝတ်နေရေးအတွက် ပိုမိုကြပ်တည်း လာနိုင်ကြောင်း ပြောသည်။

“ ကျောက်မဲ သျှမ်းစာပေ နဲ့ ယဉ်ကျေးမှုကျောင်းမှာ နေရင် အိမ်ငှားခ မပေးရဘူး။ နေ့စားအလုပ်သွားရင်လည်း တစ်ရက် ၅ ထောင်ရတယ်။ နေ့စားကရတဲ့ ငွေနဲ့ ဆီ၊ ဆန်၊ ဆား ဝယ်နိုင်တယ်။ မြို့ပေါ်မှာ အိမ်ငှားပြီးနေမယ်ဆို ရင်တော့ အိမ်ငှားခလည်း ပေးရမယ်။ နေ့စားအလုပ်က နေ့တိုင်းမရှိဘူး။ အဲ့ချိန်ကြရင် အိမ်ငှားလည်း မပေးနိုင်၊ စားဖို့သောက်ဖို့လည်း မတတ်နိုင်တော့ ကျနော်တို့ စစ်ရှောင်တွေ အရင်ကထက်ကို ပိုပြီး ခက်ခဲလာနိုင်တယ် “ ဟု ၎င်း အသက် ၂၀ နှစ်အရွယ် အမျိုးသားတစ်ဦးက ပြောသည်။

ကျောက်မဲ စစ်ရှောင်များကို ကူညီထောက်ပံ့နေသော ကမ္ဘာ့ကုလသမဂ္ဂ UN စားနပ်ရိက္ခာ အစီစဉ်ကို စစ်ကောင်စီက ပိတ်လိုက်ပြီးနောက် (ဒီဇင်ဘာလ) ကုန်ပိုင်းရောက်လျှင် ရပ်တန့်သွားမည်ဖြစ်ကြောင်း စစ်ရှောင်များ၏ ပြောပြချက်အရ သိရသည်။