သျှမ်းပြည်မြောက်ပိုင်း နမ့်ဆန်မြို့ပေါ် နှင့် ဇယန်းကြီး ဘုန်းကြီးကျောင်းသို့ ရောက်ရှိနေသော စစ်ဘေးရှောင်များ အချို့သည် နေရပ် ပြန်နေကြသော်လည်း နှစ်ဖက် တပ်ဖွဲ့ မှ စစ်အင်အား ဖြည့်တင်းနေကြကြောင်း သတင်းသိရသည်။
ယနေ့ (ဒီဇင်ဘာလ ၁၆) ရက်တွင် နမ့်ဆန်မြို့ပေါ်သို့ ရောက်ရှိလာသော စစ်ရှောင်အချို့သည် စိုးရိမ်စိတ်များဖြင့် ပြန်သွားကြပြီး လက်ရှိတွင် ပြန်သွားသည့် စစ်ရှောင်ဦးရေကို စိစစ်နေဆဲဖြစ်ကြောင်း စစ်ရှောင်များကို ကူညီပေး နေသူထံမှ သိရသည်။
“အိမ်တွေ မွှေနှောက်ဖျက်ဆီးခံရမှာကို စိုးရိမ်တာ နဲ့ စစ်ရှောင်စခန်းမှာက နေရာကျဥ်းကြပ်လို့ပါ၊ အဲ့ဒါကြောင့် အခုတော့ တချို့က ပြန်သွားပြီ” ဟု နမ့်ဆန်မြို့ စစ်ရှောင်ကူညီပေးနေသူက သျှမ်းသံတော်ဆင့်ကို ပြောသည်။
လက်ရှိတွင် နေရပ်ပြန်သွားသည့် စစ်ဘေးရှောင်များက ပိန်းလုံရွာ၊ မန်လုံးရွာ နှင့် တာလတ်ရွာတို့မှ ဖြစ်ကြပြီး လူဦးရေ စာရင်းကို စိစစ်နေဆဲဖြစ်ကြောင်း ၎င်းက ဆက်ပြောသည်။
သို့သော်လည်း လက်ရှိအချိန်ထိ စစ်ကောင်စီတပ်ဖွဲ့ နှင့် တအာင်း (ပလောင်) အမျိုးသား လွတ်မြောက်ရေး တပ်မတော်တို့က စစ်အင်အား ထပ်မံ ဖြည့်တင်းနေလျက်ရှိပြီး စစ်ကောင်စီဘက်မှ ရဟတ်ယာဥ် နှစ်စီးဖြင့် နမ့်ဆန်မြို့ အနီးတစ်ဝိုက်ကို လည့်ပတ်နေကြောင်းလည်း သိရသည်။
“တကယ်တော့ စစ်ရေးက မငြိမ်သေးဘူး၊ စစ်ကောင်စီဘက်က လေယာဥ် ၂ စီးနဲ့ နေ့တိုင်း ခနခန လာပတ်နေတယ်၊ ပြီးတော့ TNLA ဘက်လည်း တပ်ရင်း ၃ ခု အင်အားဖြည့်နေတုန်းလို့ သိရတယ်၊ ပြီးတော့ စကစ က မိုးမိတ်ဘက် ကနေရော၊ မန်စံ (မိန်းမု) ဘက်ကရော နမ့်ဆန်ဘက်ကို စစ်အင်အား အများအပြားဖြည့်နေတယ်” ဟု နမ့်ဆန်မြို့ မှ အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ စစ်ရေးတင်းမာမှု ရှိနေသည့်အပြင် စစ်ရှောင်ပြည်သူများ နေရပ်ပြန်သွားကြသည့် ကျေးရွာများမှလည်း လက်နက် အကြွင်းအကျန်များ ရှိနေနိုင်သေးသဖြင့် စိုးရိမ်မှု ရှိနေကြောင်းလည်း စစ်ရှောင်ကူညီနေသူက ဆက်ပြောသည်။
“လက်နက်ကြီး အကြွင်းအကျန်တွေ မပေါက်ကွဲသေးတဲ့ ဗုံးတွေ မိုင်းတွေ ရှိနေသေးတယ်၊ ဒါကြောင့် ပြန်သွားတဲ့ စစ်ရှောင်တွေ အတွက်က တော်တော်ကို စိုးရိမ်စရာကောင်းတယ်၊ ပြီးတော့ နောက်တစ်ဖန် တိုက်ပွဲပြင်းထန်လာ မှာကိုလည်း ကြောက်တယ်” ဟု စစ်ရှောင် ကူညီပေးနေသူက ဆက်ပြောသည်။
ပြီးခဲ့သည့် ဒီဇင်ဘာလ ၇ ရက်နေ့မှ ၁၃ ရက်နေ့အထိ စစ်ကောင်စီတပ် နှင့် TNLA တပ်ဖွဲ့တို့ အကြား ပြင်းထန်ခဲ့သည့် တိုက်ပွဲကြောင့် ကုန်းသာကျေးရွာက နေအိမ် ၄၄ အိမ်က လက်နက်ကြီး လက်နက်ငယ် ထိမှန် ပျက်စီးပြီး စစ်ရှောင် ထွက်ပြေးရသည့် ကျေးရွာမှ အိမ်များသည် စစ်ကောင်စီ တပ်သားတို့၏ ဖောက်ထွင်း မွေနှောက်ခြင်းကို ခံရကြောင်းလည်း သိရသည်။
နမ့်ဆန်မြို့နယ်မှ အာဏာသိမ်း စစ်တပ် နှင့် TNLA တပ်တို့၏ တိုက်ပွဲအတွင်း ဟူးမန်းကျေးရွာသား ၂ ဦး သေဆုံးပြီး ၂ ဦး ထိခိုက်ဒဏ်ရာရရှိနေကြောင်းလည်း သတင်းသိရသည်။
