ကရင်နီ (ကယားပြည်) လွိုင်ကော်မြို့ လောပိတ (သျှမ်းရွာ) တွင် သားအမိနှစ်ဦး လျော်ကြေးသွားတောင်းရာမှ ဓားခုတ်ခံရပြီး ဆေးရုံတင်ထားရကြောင်း စုံစမ်း သိရှိရသည်။
ယခုလ (ဒီဇင်ဘာလ ၁၄) ရက် ညနေ ၄ နာရီ ဝန်းကျင်အချိန် လောပိတ (သျှမ်းရွာ) တွင် နေထိုင်သည့် သားအမိနှစ်ဦး သည် ယာဉ်တိုက်မှုကြောင့် ပျက်စီးဆုံးရှုံးခဲ့သော ဆိုင်ကယ်၏ လျော်ကြေးကို သွားတောင်းရာ အမျိုးသားတစ်ဦးက ဓားရှည်ဖြင့် ခုတ်လိုက်ကြောင်း လောပိတ ဒေသခံ အမျိုးသားတစ်ဦးက ပြောသည်။
ဓား ခုတ်ခံရသူသည် အသက် (၅၅) နှစ် ဒေါ်နန်းအောင်မှာ (ဘယ်)ဘက် လက်ကောက်ဝတ် ပြတ်ပြီး၊ အသက် (၁၉) နှစ် စိုင်းထက်ကျော် သည် မျက်ခုံး နှင့် နောက်စေ့ ထိခိုက်မှု ပြင်းထန်စွာရရှိခဲ့ကြောင်း သိရှိရသည်။
“ ဟိုတလောတုန်းက သူ့ရဲ့ သား ဆိုင်ကယ် နဲ့ မြေသယ် ကားသမား ကားနဲ့ ချိတ်ပြီး ဆိုင်ကယ်က ပျက်သွားတာ။ ကားသမားက ဆိုင်ကယ် ပြင်ပေးမယ်ဆိုပြီး လျော်ကြေးသွားတောင်းတာ။ လျော်ကြေးသွားတောင်းတုန်းမှာ စကားများပြီး ဟိုက ဓားရှည်ထုတ်ပြီး ခုတ်ထည့်လိုက်တယ်။ နန်းအောင်တော့ (ဘယ်) ဘက် လက်ပြတ်သွားတယ် “ ဟု ၎င်း အမျိုးသားတစ်ဦးက ပြောသည်။
အဆိုပါ ပြစ်မှုကျုးလွန်သူကို သက်ဆိုင်ရာ ရဲတပ်ဖွဲ့က ဖမ်းဆီးအရေးယူ ဆောင်ရွက်ပေးခြင်း တစ်စုံတစ်ရာမှ မရှိသေးသလို ပြစ်မှုကျုးလွန်သူမှာလည်း ထွက်ပြေးတိမ်းရှောင်ပြီး လွတ်မြောက် ထားနေကြောင်း သိရသည်။
ထို့အပြင် ဓားခုတ်ခံရသည့် ဒေါ်နန်းအောင် နှင့် သားဖြစ်သူ စိုင်းထက်ကျော်သည် လက်ရှိမှာ လွိုင်ကော် ပြည်သူ့ဆေးရုံတွင် ဆေးဝါးကုသမှု ခံယူထားနေကြောင်း ရွှေလွိုင်ကော် (ကယား) ပရဟိတအသင်းမှ တာဝန်ရှိသူ တစ်ဦးက ပြောသည်။
“ သားအမိနှစ်ယောက်က ဒီနေ့ အခြေနေ ပြန်ကောင်းသွားပါပြီ “ ဟု ၎င်း တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
လောပိတမြို့သည် လွိုင်ကော်မြို့၏ အရှေ့တောင်ဘက် လွိုင်ကော် – လောပိတ သွားလမ်း ပေါ်တွင် တည်ရှိပြီး ၎င်းအနီးတွင် လောပိတ ရေအားလျှပ်စစ် စက်ရုံများ ရှိသည်။
Leave a Comments