သျှမ်းပြည်တောင်ပိုင်း အောင်ပန်းမြို့ လူငယ်များကို ပြည်သူ့ကာကွယ်ရေးတပ်ဖွဲ့ PDF နှင့် ပတ်သက် ဆက်စပ်မှု ရှိသည်ဟုဆိုပြီး စစ်ကောင်စီက ဖမ်းဆီးနေကြောင်း စုံစမ်းသိရှိရသည်။
ယခုလ (ဒီဇင်ဘာလ ၁၃ ) ရက်တွင် အောင်ပန်းမြို့ ရိုးမလမ်း ဘဏ်ရှေ့လမ်းဆုံအနီးတွင် စစ်ကောင်စီတပ်သား နှင့် ရဲတပ်ဖွဲ့များက အမျိုးသမီး ၂ ဦးနှင့် အမျိုးသား ၁၀ ဦးကို စစ်ကောင်စီက ဖမ်းဆီးခေါ်ဆောင်သွားကြောင်း အောင်ပန်းမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ အများကြီးပါသွားတယ် ၁၀ ယောက်မကဘူးရှင့်။ နိုင်ငံတော်ကို တော်လှန်မှုဆိုပြီး ဖမ်းတယ်။ PDF နဲ့ပတ်သက်တယ် ဆိုပြီး ဖမ်းတယ်။ မြို့ဟောင်း နဲ့ မင်္ဂလာရပ်ကွက်က လူငယ်တွေ တော်တော်များများ ဖမ်းခံရတယ်။ တစ်ရပ်ကွက်ထဲကို ဖမ်းတာလည်းမဟုတ်ဘူး ရပ်ကွက်တိုင်းကိုရှာပြီး ဖမ်းသွားတယ် “ ဟု ၎င်း အမျိုးသမီးတစ်ဦးက ပြောသည်။
အဆိုပါ ဖမ်းဆီးခြင်းခံရသည့် လူငယ်များသည် အသက် ၁၆ နှင့် ၂၅ နှစ်ကြား လူငယ်များဖြစ်ကြပြီး လက်ရှိ ဖမ်းဆီးသွားသည့် လူငယ်များကို မည်သည့် နေရာတွင် ချုပ်နှောင်ထားခြင်း မသိရသေးပေ။
“ ကျမတို့ အိမ်ဘေးက ကောင်းလေးတစ်ယောက် အခုထိ ပြန်မလွှတ်လာသေးဘူး။ PDF နဲ့ ပတ်သက်တယ်ဆိုပြီး ထောင်ဒဏ် ၃ နှစ် ချမှတ်ခံထားရတယ်။ ဟိုတခေါက်က ဖမ်းခံရတဲ့ အဘိုးကြီး တစ်ယောက်ဆိုလည်း အခု တောင်လေးလုံးမှာ ၇ နှစ် ထောင်ဒဏ်ချမှတ်ထားရတယ်။ အခုတော့ ထောင်ဝင်စာတွေဘဲ ပို့ပေးနေရတယ် လူတွေ့တော့ တွေ့ခွင့်မရှိဘူး “ ဟု ၎င်းအမျိုးသမီးတစ်ဦးက ထပ်လောင်းပြောသည်။
ပြီးခဲ့သည့် အောက်တိုဘာ ၁၀ ရက် ည ၅ နာရီဝန်းကျင်တွင် အောင်ပန်းမြို့ သွေးအလှူရှင် အသင်းခေါင်းဆောင် ကိုတရုတ်ကြီး နှင့် အတူ ၎င်း၏ အဖွဲ့ဝင်များကို စစ်ကောင်စီက ဖမ်းဆီးသွားပြီးနောက် နိုဝင်ဘာလ ပထမအပတ်တွင် တောင်လေးလုံး သို့ ပို့ဆောင်လိုက်သည်။
စစ်တပ်က အာဏာသိမ်းပြီးနောက်ပိုင်း ပြည်သူ (၂,၅၈၉) ဦး သတ်ဖြတ်ခံရပြီး (၁၆,၅၅၅) ဦး ဖမ်းဆီးခံနေရကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က ယမန်နေ့ (ဒီဇင်ဘာ ၁၄ ) ရက်၏ ထုတ်ပြန်ချက်အရသိရသည်။
