သျှမ်းပြည်မြောက်ပိုင်း နမ့်ဆန်မြို့တွင် စစ်ကောင်စီမှ လေယာဥ်ဖြင့် ဗုံးထပ်မံ လာရောက်ကြဲချမှု ကြောင့် ရွာသား ၂ ဦး သေဆုံးရကြောင်း သတင်းသိရသည်။
ပြီးခဲ့သည့် ဒီဇင်ဘာလ ၁၃ ရက်တွင် ပျက်စီးနေသော ကုန်းသာဘုန်းကြီးကျောင်းသို့ ရွာသားများ ရှင်းလင်းရေး သွားလုပ်နေစဥ် စစ်ကောင်စီမှ လေယာဥ် နှစ်စီး ဝဲပျံလာပြီး ဗုံး ၅ လုံးဖြင့် ထပ်မံလာရောက် ကြဲသဖြင့် ရွာသား ၂ ဦး ဗုံးထိမှန် သေဆုံးသွားကြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ကုန်းသာဘုန်းကြီးကျောင်းမှာ ပျက်စီးသွားတာတွေကို သွားရှင်းနေတဲ့အချိန် စကစက ထပ်ပြီးတော့ လေယာဥ်နဲ့ ဗုံးထပ်ချလို့ ရွာသား ၂ ဦး သေသွားရတယ်၊ စုစုပေါင်း ၅ လုံး ချသွားတာ၊ တခြားသူက ထိခိုက်ပွန်းပဲ့ အနည်းငယ် ရတယ်“ ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အဆိုပါ ရွာသားနှစ်ဦးသည် ကုန်းသာရွာခံ ဖြစ်ကြပြီး ထိတွေ့ တိုက်ပွဲဖြစ်ပွားစဥ်အတွင်း စစ်ကောင်စီဘက်မှ လက်နက်ကြီး နှင့် ဗုံးကြဲချမှုကြောင့် ထိခိုက်ပျက်စီးသွားသည့် ကုန်းသာဘုန်းကြီးကျောင်းဝန်းထဲ ရှင်းလင်းရေး လုပ်နေစဥ် စစ်ကောင်စီမှ လေယာဥ်ဖြင့် ရောက်လာပြီး ဗုံးထပ်မံကြဲချမှုကြောင့် ရွာသား ၂ ဦးသေဆုံးပြီး တခြား ရွာသားများလည်း ထိခိုက်ပွန်းပဲ့ ဒဏ်ရာ ရသွားကြောင်း သိရသည်။
ပြီးခဲ့သည့် ဒီဇင်ဘာလ ၇ ရက်နေ့ မှ စတင်ကာ နမ့်ဆန်မြို့နယ်အတွင်းတွင် အာဏာသိမ်း စစ်ကောင်စီတပ်ဖွဲ့ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် TNLA တို့ ထိတွေ့တိုက်ပွဲဖြစ်ပွားခဲ့ပြီး၊ ဒီဇင်ဘာ ၁၃ ရက်၌ စစ်ကောင်စီဘက်မှ လေယာဥ်ဖြင့် ထပ်မံ ဗုံးလာကြဲကြောင်း ဒေသခံများက ပြောသည်။
ထို့အပြင် ယမန်နေ့ ဒီဇင်ဘာလ ၁၄ ရက်တွင်လည်း တိုက်ပွဲကြောင့် တောထဲသို့ ထွက်ပြေး တိမ်းရှောင်ခဲ့ပြီး ပျောက်ဆုံးသော ပြည်သူများသည် စစ်ရှောင်စခန်းသို့ ရောက်ရှိလာကြောင်း သတင်းသိရသည်။
တောထဲ လမ်းပျောက်ရာမှ ပြန်ရောက်လာသော စစ်ရှောင်များသည် ကုန်းသာရွာခံ အများစု ဖြစ်ကြပြီး၊ ပိန်းလုံရွာ၊ ဟူးမန်းရွာ တို့မှ ဒေသခံများလည်း ပါဝင်ကြောင်းသိရသည်။
“တောထဲမှာ တစ်နေရာ နဲ့ တစ်နေရာ တိုက်ပွဲကိုရှောင်ပြီး လမ်းပျောက်သွားကြတာတဲ့၊ အခုတော့ စစ်ရှောင်စခန်းကို ပြန်ရောက်လာကြပြီ၊ ဒါပေမဲ့ သူတို့ အိမ်တွေတော့ မရှိတော့ဘူး၊ လက်နက်ကြီးကျလို့ ပျက်စီးကုန်ကြပြီလေ ” ဟု နမ့်ဆန်မြို့မှ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
တောထဲ စစ်ရှောင် ထွက်ပြေးပြီး လမ်းပျောက်သူ ၄၀ ဦး နီးပါးရှိကာ ထိုထဲတွင် ကလေးငယ် ၁၀ ဦး ထက်မနည်းရှိပြီး လမ်းမလျှောက်နိုင်သည့် သက်ကြီးပိုင်း ၂ ဦး လည်း ပါဝင်ကြောင်း သိရသည်။
လက်ရှိ အချိန်တွင် နှစ်ဖက်ထိတွေ့မှု တိုက်ပွဲများ ငြိမ်သက်သွားသော်လည်း စစ်ကောင်စီ၏ တိုက်လေယာဥ် ရဟတ်ယာဥ်များက နမ့်ဆန်မြို့နယ်ပေါ် ပျံဝဲနေဆဲဖြစ်သည့်အတွက် ဒေသခံများက နေရပ်ပြန်ရန် အဆင်မပြေသေးပေ။
ထို့အပြင် တိုက်ပွဲဖြစ်ပွားခဲ့သည့် နေရာသည် ကျည်ဆံအများအပြား ပြန့်ကျဲနေပြီး မပေါက်ကွဲသေးသည့် လက်နက်ကြီး နှင့် စစ်ကောင်စီတပ်ဖွဲ့ ထောင်ထားသည့် မြေမြှုပ်မိုင်းများလည်း ရှိနေသေးကြောင်း သိရသည်။
Leave a Comments