ကချင်ပြည်နယ် မိုးမောက်မြို့နယ်အတွင်း တိုက်ပွဲဖြစ်ပွားမှု မရှိပဲ လက်နက်ကြီးသံတွေ ဆက်တိုက် ပြန်ကြားလာရသည့် အတွက်ကြောင့် စစ်ဘေးရှောင်များ နေရပ်သို့ ပြန်ရမည်ကို စိုးရိမ်နေရကြောင်း စုံစမ်းသိရှိရသည်။
ယမန်နေ့ (ဒီဇင်ဘာ ၁၂) ရက် ည ၁၀ နာရီဝန်းကျင် နှင့် ယနေ့ မနက်ပိုင်းတွင် လက်နက်ကြီး ပစ်ခတ်သံများကို မိုးမောက်မြို့ အနီးတစ်ဝိုက်တွင် ကြားနေရပြီး မည်သူက ပစ်ခတ်သည်ကို မသိရှိရကြောင်း သိရသည်။
အဆိုပါ မိုးမောက်မြို့ပေါ်တွင် တိုက်ပွဲဖြစ်ပွားမှု မရှိ၊ ပစ်ခတ်မှုမရှိတာ ရက် ၂၀ နီးပါးရှိနေပြီး ဖြစ်ကြောင်း သိရသည်။
“တိုက်ပွဲမဖြစ်တာ၊ အသံတွေ ငြိမ်နေတာက ရက် ၂၀ လောက်ရှိနေပြီ။ မနေ့ည နဲ့ ဒီနေ့မနက်က အသံတွေပြန်ကြားနေရတာ။ အသံက လက်နက်ကြီးအသံပဲ။ ဘယ်နားပစ်သွားလဲတော့ မသိဘူး” ဟု မိုးမောက်မြို့ ဒေသခံတစ်ဦးက ပြောသည်။
လက်ရှိ စစ်ဘေးရှောင်များသည် ၂၀၂၃ ခုနှစ်တွင် နေရပ်ကို ပြန်ရန်ပြင်ဆင်ထားပေမယ့် လက်နက်ကြီးသံကြောင့် နေရပ်ကိုပြန်ရန် စိုးရိမ်နေကြောင်း သိရသည်။
သို့သော် လက်ရှိတွင်လည်း လူငယ် နှင့် အမျိုးသားတစ်ချို့က ကျေးရွာတွင်း ပြန်ရောက် နေထိုင်လျက်ရှိကြောင်း သိရသည်။
” သူတို့ ၂၀၂၃ ကျရင် ပြန်ဖို့ ပြင်ဆင်ထားတာ။ အခုတော့ လူငယ်တွေ၊ အမျိုးသားတွေ တစ်ချို့တော့ ရွာမှာပြန်နေတာရှိတယ်။ မနေရင်လည်း မရဘူးလေ။ မူးယစ်ဆေးဝါးသုံးတဲ့သူတွေက အိမ်ကိုဝင်ခိုး တာရှိတယ်လေ။ အဲ့ကြောင့်တစ်ချို့က ရွာမှာပြန်စောင့်ပြီး နေကြတာ” ဟု စစ်ဘေးရှောင်ကို ကူညီပေးနေသူက ပြောသည်။
မိုးမောက်မြို့နယ် KIA နှင့် စစ်ကောင်စီတို့ တိုက်ပွဲကြောင့် လုံဂျာ နှင့် နောင်ပေါင်းကျေးရွာ ဒေသခံ စစ်ဘေးရှောင်များသည် ၅၀၀ ကျော် ကျန်ရှိနေပြီး ရှမ်းမေ့ရောင်ခြည် ဘုန်းကြီးကျောင်း နှင့် လောကမာရစိန် ဘုန်းကြီးကျောင်းသို့ အောက်တိုဘာ (၂၁) ရက်က စစ်ဘေးတိမ်းရှောင်လာခဲ့ကြောင်း သိရသည်။
