သျှမ်းပြည်တောင်ပိုင်း ဆီဆိုင်မြို့နယ် ပုံးအင်းဒေသက တောင်သူများကို ထောက်ပံ့ကြေးပေးမည်ဟုဆိုပြီး စိုက်ပျိုးရေးဦးစီးဌာနက အတိုးနှုန်းဖြင့် ပြန်ဆပ်နေရမည်ဟု ပြောဆိုခဲ့ကြောင်း တောင်သူများထံမှ သိရသည်။
ပြီးခဲ့သည့် သြဂုတ်လပိုင်းက ပုံးအင်းမှာ ရေကြီးရေလျှံမှုကြောင့် စပါးများ ဧက ၂၀,၀၀၀ ကျော် ပျက်စီးခဲ့ပြီး တောင်သူအရှုံးပေါ်ခဲ့ရသည်။
ထို့ကြောင့် စိုက်ပျိုးရေး ဦးစီးဌာနက လယ်တစ်ဧကကို မြန်မာကျပ်ငွေ ၂ သိန်းနဲ့ ထောက်ပံ့ကြေးငွေပေးပြီး ထိုထောက်ပံ့ကြေးငွေထဲမှ ကျပ် ၁၀၀ လျှင် အတိုးနှုန်း ၉၀ ပြားနှုန်းကို ယူမည်ဖြစ်ကြောင်း ပုံးအင်းဒေသခံ အသက် ၃၀ နှစ်အရွယ် အမျိုးသားတစ်ဦးက သျှမ်းသံတော်ဆင့် ကိုပြောသည်။
“ အခုက ထောက်ပံ့ကြေးငွေ လာမပေးသေးပါဘူး။ ထောက်ပံ့ကြေးငွေပေးမယ် ကျပ် ၁၀၀ ကို ၉၀ ပြားနှုန်းနဲ့ အတိုးယူမယ်၊ ထောက်ပံ့ကြေးငွေရချင်ရင် မြေဂရမ် မိတ္တူကို လာပေးပါလို့ အကြောင်းကြားလာတာပါ။ တချို့က ထောက်ပံ့ကြေးငွေယူမယ်ဆိုလည်း အတိုးပေးရတာလို့ ယူရမလား၊ မယူရဘူးလား ဆိုပြီး ခက်နေတာ” ဟု ၎င်းအမျိုးသားတစ်ဦးက ပြောသည်။
ထောက်ပံ့ကြေးငွေယူလျှင် (၆) လတစ်ကြိမ်လျှင် အတိုးငွေတစ်ခါ ဆပ်ရပြီး (၁) နှစ်ပြည့်လျှင် အရင်းနှင့် အတိုးငွေ များအားလုံးကို ပြန်လည်ဆပ်ရမည်ဟု ပြီးခဲ့သည့် နိုဝင်ဘာလပိုင်းမှာ တောင်သူများကို အသိပေးခဲ့ကြောင်း သိရသည်။
ထို့အပြင် တောင်သူများ အချို့က စစ်ကောင်စီလက်အောက်ခံပေးသည့် ထောက်ပံ့ကြေးငွေကို မယူဘဲ နှောင်နှစ် စိုက်ပျိုးမည့် လယ်ယာကို ဧကလျှော့ပြီး စိုက်ပျိုးတော့မည်ဖြစ်ကြောင်း နောင်စန့်ဒေသခံ အသက် ၃၅ နှစ် အမျိုးသမီးတစ်ဦးက ပြောသည်။
“ ဒီနှစ် စပါးရေမြှုပ်ပြီးကတည်းက အရှုံးပေါ်နေပြီလေ။ နောင်နှစ် လယ်ဆက်လုပ်ဖို့အတွက် ထောက်ပံ့ကြေးငွေ ယူမယ်တော့လည်း အတိုးက ထပ်ပေးရသေးတယ်။ နောက်နှစ် လယ်ဆက်လုပ်ရန် စားဖို့အတွက် နည်းနည်းပဲ လုပ်တော့မယ်။ ကျန်တဲ့ဟာတွေ ဒီတိုင်းပဲ ထားတော့မယ် “ ဟု ၎င်းအမျိုးသမီးတစ်ဦးက ပြောသည်။
ဆီဆိုင်မြို့နယ် ပုံးအင်းဒေသ နောင်စန့်ရွာတွင် နေထိုင်တဲ့ တောင်သူအမျိုးသားတစ်ဦးက လယ်လုပ်တာဟာ ကုန်ကျစရိတ်များသည့်အတွက် နှောင်နှစ် လယ်မလုပ်တော့ရန် ဆုံးဖြတ်ထားကြောင်း ဆိုပါတယ်။
“ လယ်ကတော့များပါတယ်။ လုပ်မယ့်သူက မရှိဘူးလေ၊ လုပ်ရန်လည်း ကုန်ကျစရိတ်ကများတော့ နောက်နှစ် လယ်ဆက်မလုပ်ဖို့ ဆုံးဖြတ်ထားတယ်။ ကျနော်လယ်တွေ ဘယ်သူလုပ်ချင်လည်းဆိုပြီး အလကား ပေးလုပ်တာ ဘယ်သူမှ မလုပ်ဘူး “ ဟု ၎င်းအမျိုးသားတစ်ဦးက ပြောသည်။
ပုံးအင်းက စပါးခင်းများမှာ နှစ်စဉ်နှစ်တိုင်း ရေလွှမ်းခြင်းခံရပြီး ပြီးခဲ့သည့် ၂၀၂၁ ခုနှစ်က စိုက်ပျိုးရေး ဦးစီးဌာနများသည် တောင်သူများကို ထောက်ပံ့ကြေးငွေ ပေးပြီး အတိုးငွေ မယူခဲ့ကြောင်း သိရသည်။
