Thursday, May 30, 2024

စစ်ကောင်စီ နဲ့ TNLA တို့ တိုက်ပွဲ ပြင်းထန်နေဆဲ

Must read

သျှမ်းပြည်မြောက်ပိုင်း စစ်ကောင်စီ နှင့် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) တို့သည် ယနေ့ထိ တိုက်ပွဲပြင်းထန်လျက်ရှိပြီး စစ်ကောင်စီဘက်မှ စစ်အင်အား ဆက်လက်ဖြည့်တင်းနေကြောင်း သတင်းသိရသည်။

နမ့်ဆန်မြို့နယ်က စစ်ဘေးရှောင်

ပြီးခဲ့သည့် ဒီဇင်ဘာ (၇) ရက်မှ ယနေ့ ဒီဇင်ဘာ (၁၂) ရက်ထိ နမ့်ဆန်မြို့နယ် ကုန်းသာကျေးရွာအနီး စစ်ကောင်စီ သည် လေကြောင်းလိုင်းဖြင့် တိုက်ခိုက်သဖြင့် အနီးဝန်းကျင်ရှိ ဒေသခံ ပြည်သူ (၁,၀၀၀) ကျော် ထွက်ပြေးတိမ်းရှောင်နေရကြောင်း သိရသည်။

“ဒီနေ့ မနက်လည်း ကုန်းသာကျေးရွာဘက်မှာ လက်နက်ကြီးသံတွေ ထပ်ကြားနေရသေးတယ်။ မနေ့ကလည်း လက်နက်ကြီး (၇) လုံး (၈) လုံးလောက် မြို့ထဲကျတာတွေရှိတယ်။ ထိခိုက်ဒဏ်ရာ ရရှိသူ ရှိ မရှိဆိုတာ အဲ့ဒါကတော့ အသေးစိတ် မသိရသေးဘူး” ဟု စစ်မြေပြင် အရာရှိ တစ်ဦး က သျှမ်းသံတော်ဆင့် ကိုပြောသည်။

နမ့်ဆန်မြို့နယ်အတွင်း စစ်ကောင်စီဘက်မှ အင်အား အများအပြား ဖြည့်တင်းလျှက်ရှိပြီး မိုးမိတ်မြို့နယ်မှ ခလရ (၂၇၆)၊ ခလရ (၂၂၃) နှင့် ခမရ (၃၄၈) တို့ဖြစ်ပြီး လားရှိုးမြို့နယ်မှ တပ်ရင်း (၂) ရင်း လည်း လာရောက် တိုက်ခိုက်ခဲ့ကြောင်း ၄င်း က ဆက်ပြောသည်။

“မိုးမိတ်မြို့နယ်ထဲက တပ်ရင်း (၃) ရင်း နဲ့ လားရှိုးဘက်က တပ်ရင်း (၂) ရင်း လာတယ်။ မန္တလေးဘက်က လာတဲ့ ကွန်မန်ဒို တပ်တွေ လည်း ပါတယ်။ စုစုပေါင်း အင်အား (၄၀၀) လောက်ရှိမယ်ထင်တယ်” ဟု စစ်မြေပြင် အရာရှိ တစ်ဦး က သျှမ်းသံတော်ဆင့် ကိုပြောသည်။

နမ့်ဆန်မြို့ပေါ်သို့ ထွက်ပြေးတိမ်းရှောင်လာသည့် စစ်ရှောင်များသည် ကုန်းသာကျေးရွာအနီးဝန်းကျင်က ဒေသခံများဖြစ်ကြပြီး လက်ရှိသည် ဇယန်းကြီး ဘုန်းကြီးကျောင်းမှာ စစ်ရှောင် တစ်ထောင်ကျော် သွားရောက် ခိုလုံနေကြောင်း သိရှိရသည်။

“ဒီ (၁) ရက် (၂) ရက်အတွင်း စစ်ရှောင်တွေ အများကြီး ထွက်ပြေးလာကြတယ်။ အခု လောလောဆယ်တော့ စားနပ်ရိက္ခာအတွက်က အလှူရှင်တွေ ရှိနေသေးတယ်” ဟု စစ်ရှောင်များကို ကူညီပေးနေသူ အမျိုးသား တစ်ဦး က သျှမ်းသံတော်ဆင့် ကိုပြောသည်။

တိုက်ပွဲ (၁) ပတ် ကာလနီးပါး အတွင်း ကုန်းသာကျေးရွာအတွင်း ပြည်သူလူထုနေအိမ်မှာ လက်နက်ကြီး ကျရောက်သဖြင့် နေအိမ် (၅) လုံးထက်မနည်း ပျက်စီးပြီး ဘုန်းကြီးကျောင်း တစ်ကျောင်း မီးလောင်ပျက်စီး ဆုံးရှုံးခဲ့သည်။

စစ်ကောင်စီ တပ်ဖွဲ့သည် နိုင်ငံတော် အာဏာသိမ်းယူပြီးနောက် ရက္ခိုင့်တပ်တော် AA နှင့် အပစ်ခတ်ရပ် ငြိမ်းချမ်းရေး ယူပြီး သျှမ်းပြည်မြောက်ပိုင်းရှိ တိုင်းရင်းသားလက်နက်ကိုင်တပ်ဖွဲ့များကို ထိုးစစ်ဆင်မှု ခပ်စိတ်စိတ် ပြုလုပ်လာကြောင်း ပြောဆိုသုံးသပ်မှုလည်း ထွက်လာသည်။

Leave a Comments

- Advertisement -spot_img

Latest article