သျှမ်းပြည်မြောက်ပိုင်း စစ်ကောင်စီ နှင့် တအာင်း (ပလောင်) အမျိုးသားလွတ်မြောက်ရေးတပ်မတော် TNLA တို့ တိုက်ပွဲကြောင့် ယနေ့ (ဒီဇင်ဘာ ၉) ရက်တွင် ပြည်သူ ၆၀၀ နီးပါး နမ့်ဆန်မြို့ပေါ်သို့ ထွက်ပြေးတိမ်းရှောင် လာခဲ့ကြောင်း စုံစမ်းသိရှိရသည်။
အဆိုပါ စစ်ဘေးရှောင်များသည် မန်လုံ၊ ပိန်းလုံ စသည့် ဒေသခံများက နမ့်ဆန်မြို့ ခရမ်းကြီး ဘုန်းကြီးကျောင်းထဲသို့ လာရောက်တိမ်းရှောင်လာပြီး၊ ဒေသခံ ၃၀၀ ကျော်နီးပါးသည် လက်ရှိအချိန်ထိ တိုက်ပွဲအတွင်း ပိတ်မိ နေသေးကာ စစ်ဘေးရှောင် ကူညီပေးနေသည့်သူက သွားရောက်ခေါ်ထုတ် နေလျက်ရှိကြောင်း သိရသည်။
“ မနေ့ ညကတည်းက ထွက်ပြေးလာတဲ့ သူတွေလည်း ရှိတယ်။ ဒီနေ့တော့ ပိုပြီးထွက်ပြေးလာကြတာပေါ့။ အခုလည်း ရွာထဲမှာရှိတဲ့ ၃၀၀ ကျော်ကို သွားကြိုနေကြတယ်။ လောလောဆယ်တော့ ၆၀၀ ဝန်းကျင်တော့ ရှိနေပြီ။ ဒါက နမ့်ဆန်ကို ကျော်ပြီး တစ်ခြားမြို့ကို သွားတာက မပါသေးဘူး” ဟု စစ်ဘေးရှောင်များကို ကူညီပေးနေသည့် အမျိုးသားက ပြောသည်။
လက်ရှိတွင်လည်း TNLA နှင့် စစ်ကောင်စီတို့ တိုက်ပွဲ ပြင်းထန်နေလျက်ရှိကြောင်း သိရသည်။
ထိုသို့ တိုက်ပွဲကြားတွင် ထွက်ပြေးတိမ်းရှောင်လာရသည့် အတွက်ကြောင့် တချို့ ပြည်သူများက အဝတ်တစ်ထည် သာယူဆောင်လာရသည့်အတွက်ကြောင့် စောင် နှင့် အဝတ်ထည်များ လိုအပ်နေကြောင်း စစ်ရှောင် ကူညီသူများ က ပြောသည်။
“တစ်ချို့ကလာတာ ကိုယ်တစ်ခု အဝတ်တစ်ထည်နဲ့ပဲ လာတာလေ။ စောင်တွေလိုအပ်နေတယ်။ အဝတ်တွေလည်းလိုအပ်နေတယ်။ ပြီးတော့ အစားသောက်လည်း လိုနေတယ်။ အခုလည်း ဆောင်းရာသီဆိုတော့ အေးတယ်လေ” ဟု အထက်ပါ အမျိုးသားက ပြောသည်။
ထိုစစ်ဘေးရှောင်များထဲတွင် အမျိုးသမီး နှင့်ကလေးများ အများဆုံး ပါဝင်ကြောင်း သိရသည်။
ထိုအပြင် နမ့်ဆန်မြို့အဝင်အထွက်တွင်လည်း စစ်ကောင်စီက စစ်ဆေးမှု တင်းကြပ်နေလျက်ရှိကြောင်း နမ့်ဆန်မြို့ဒေသခံ တစ်ဦးက ပြောသည်။
“ ကျနော်တို့ ဟိုနေ့မှ နမ့်ဆန်မြို့ထဲဝင်လာတာ။ သူတို့ ဖုန်းတွေ ဘာတွေ အကုန်စစ်နေတယ်။ စစ်ဆေးမှုတွေတော့ ကြမ်းနေတယ်” ဟု နမ့်ဆန်မြို့ ဒေသခံ တစ်ဦးက ပြောသည်။
စစ်ကောင်စီ နှင့် TNLA တပ်ဖွဲ့တို့သည် ဒီဇင်ဘာ ၇ ရက်မှ စပြီး တိုက်ပွဲ ပြင်းထန်ခဲ့သဖြင့် စစ်ကောင်စီဘက်မှ TNLA တပ်စခန်းရှိရာသို့ လေယာဉ်ဖြင့် ပစ်ခတ် တိုက်ခိုက်နေလျက်ရှိကြောင်း သိရသည်။
