သျှမ်းပြည်မြောက်ပိုင်း သိန္နီမြို့နယ် နမ့်စလပ်ကျေးရွာတွင် နေအိမ်ဝန်းအတွင်း ဗုံးပေါက်ကွဲမှုကြောင့် မိသားစုလိုက် ထိခိုက်ဒဏ်ရာရရှိပြီး ၂ ဦး သေဆုံးခဲ့ကြောင်း သတင်းရရှိသည်။
ယမန်နေ့ (ဒီဇင်ဘာလ ၈ ) ရက် နံနက်ပိုင်းအချိန် သိန္နီမြို့နယ် နမ့်စလပ်ကျေးရွာသို့ ဆိုင်ကယ် စီးလာသည့် အမည်မသိ အမျိုးသား နှစ်ဦးသည် လက်ပစ်ဗုံးကို နေအိမ်ထဲ ပစ်ထည့်လိုက်သဖြင့် အိမ်ရှင် မိသားစုမှ ၂ ဦးသေဆုံးပြီး ၂ ဦး ပြင်းထန်စွာ ဒဏ်ရာရသွားကြောင်း သတင်းသိရသည်။
“အိမ်ရှင် အမျိုးသမီးဖြစ်တဲ့ အမေနဲ့ သူ့သားက ပွဲချင်းပြီး သေသွားတယ်၊ ပြီးတော့ အဖေဖြစ်သူနဲ့ သမီးက ဒဏ်ရာ ပြင်းပြင်း ထန်ထန်ရသွားတယ်၊ သူတို့အဖေက ခါးကျိုးသွားတာတဲ့။ မနေ့ကတည်းက လားရှိုးဆေးရုံကို ပို့ပေးရတယ်” ဟု အမည်မဖော်လိုသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ခါးကျိုးသည့် အိမ်ရှင်အမျိုးသား အဖေဖြစ်သူသည် အသက် ၅၀ ကျော် ဝန်းကျင်ရှိပြီး ဒဏ်ရာက စိုးရိမ်ရ အခြေ အနေဖြစ်ကြောင်း အထက်ပါ အမျိုးသားက ဆက်ပြောသည်။
လက်ပစ်ဗုံးဖြင့် လာရောက်ပစ်ခတ်သူ အမျိုးသားကို မည်သူမည်ဝါ ဖြစ်ကြောင်း မသိရကြောင်း နှင့် မည်သည့်အကြောင်းကြောင့် ယခုလို လုပ်ရသည်ကို မသိရကြောင်းလည်း ၎င်းက ဆက်ပြောသည်။
“အိမ်ဝန်းထဲကို လက်ပစ်ဗုံးနဲ့ လာပစ်တာဆိုတော့ ရည်ရွယ်ချက် ရှိရှိနဲ့ တိုက်ခိုက်ချင်လို့ပဲ ဖြစ်မယ်၊ ဘယ်သူ က လာလုပ်တာလဲတော့ မသိရဘူး၊ ဘာကြောင့်လုပ်တာလဲ မသိဘူး” ဟု ၎င်းက ပြောသည်။
စစ်တပ်မှ နိုင်ငံတော် သိမ်းယူပြီးနောက်ပိုင်းမှ စတင်ပြီး သိန္နီမြို့နယ်အတွင်းတွင် မူးယစ်ဆေးဝါးများ၊ လောင်း ကစားဝိုင်းများ ပေါများလာသည့်အပြင် လက်နက်ကိုင် အဖွဲ့အစည်းများလည်း ပေါများလာကြောင်း သတင်းသိရသည်။
ယင်းကဲ့သို့ လက်နက်ကိုင်များ ပေါများလာသည်နှင့် ဒေသအတွင်း လုံခြုံရေးများလည်း လျော့နည်းလာကြောင်း အမည်မဖော်လိုသူ သိန္နီမြို့ခံ အသက် ၅၀ ဝန်းကျင် အမျိုးသမီးက သျှမ်းသံတော်ဆင့်ကို ပြောသည်။
“လက်နက်ကိုင် အဖွဲ့တွေပေါလာသလို သေနတ်တွေ ဗုံးတွေလည်း ဝယ်ရလွယ်လာကြတာလို့ မြင်တယ်၊ အခုဆို လုပ်ကြံသတ်ဖြတ်တာတွေ လက်နက်ပြ ခြိမ်းခြောက်တာကလည်း များလာတယ်၊ ဘယ်လိုမှ လုံခြုံမှုမရှိတော့ဘူး၊ ဘယ်သွားသွားကြောက်နေရတယ်” ဟု အထက်ပါ အမျိုးသမီးက ပြောသည်။
သိန္နီမြို့နယ် အတွင်း သွားလာလှုပ်ရှားနေသည့် လက်နက်ကိုင် တပ်ဖွဲ့များ အဖြစ် စစ်ကောင်စီ တပ်ဖွဲ့နှင့် ၎င်း၏ လက်အောက်ခံ ပြည်သူ့စစ်တပ်ဖွဲ့၊ SSPP/SSA တပ်ဖွဲ့၊ TNLA တပ်ဖွဲ့၊ KIA တပ်ဖွဲ့နှင့် MNDAA တပ်ဖွဲ့တို့ဖြစ်ကြသည်။
Leave a Comments