တရုတ်နိုင်ငံဘက်တွင် Lockdown ဖွင့်ပေးလိုက်ပြီဖြစ်ပြီး တရုတ် – မြန်မာ နယ်စပ်ဂိတ်ကိုလည်း ဖွင့်ပေးနိုင်ရန်အတွက် ပြည်သူများ မျှော်လင့်နေကြောင်း စုံစမ်းသိရှိရသည်။

ယမန်နေ့ (ဒီဇင်ဘာ ၈) ရက်တွင် တရုတ်နိုင်ငံတွင်း မြို့နယ်များ အားလုံးကို Lockdown ဖွင့်ပေးလိုက်ပြီးနောက် နယ်စပ်ဂိတ်ကိုလည်း ဖွင့်ပေးရန် နှင့် နယ်စပ်ဂိတ်ကို ဖွင့်ပေးလိုက်ပါက ကုန်ဈေးနှုန်းတွေ ကျဆင်းလာနိုင်ပြီး၊ နှစ်နိုင်ငံကြား သွားလာမှုကို လွယ်ကူကြောင်း ရွှေလီမြို့တွင်းနေထိုင်သည့် သျှမ်းလူမျိုးတစ်ဦးက ပြောသည်။

“တံခါးဖွင့်ပေးရင်တော့ ပျော်တာပေါ့။ ကုန်ဈေးနှုန်းတွေလည်း ပြန်ကျလာနိုင်တယ်လေ။ ပြီးရင် ဝယ်ယူပို့ဆောင်ဖို့လည်း လွယ်မှာပေါ့။ ပြီးတော့ ဆွေမျိုးတွေကိုလည်း သွားလည်ရတာ လွယ်ကူလာမှာပေါ့” ဟု ၎င်းက ပြောသည်။

ထိုသို့ နယ်စပ်ဂိတ်ကို ကိုဗစ် – ၁၉ ကြောင့် ၂ နှစ်ကျော်ကြာ နယ်စပ်ကို ပိတ်ထားသည့် အတွက်ကြောင့် ပြည်သူများကလည်း စီးပွားရေးရှာရာတွင်လည်း ခက်ခဲပြီး စားဝတ်နေရေးလည်း ခက်ခဲလာခဲ့သည်။

အဆိုပါ နယ်စပ်ဂိတ်ကို ပြန်ဖွင့်လိုက်ပါက ပြည်သူများ ကုန်သွယ်ရာတွင် လွယ်ကူလာပြီး စားဝတ်နေရေးအတွက် အဆင်ပြေလာနိုင်ကြောင်း မူဆယ်မြို့ ဒေသခံတစ်ဦးက ပြောသည်။

“ ကိုဗစ်ကြောင့် တော်တော်ထိခိုက်တယ်။ သူတို့ ပြန်ဖွင့်ပေးဖို့ မျှော်လင့်တယ်။ နယ်စပ်တံတားပြန်ဖွင့်ရင် သွားလာရလွယ်ကူတယ်။ ပြီးတော့ စီးပွားရေးလည်း ပြန်လွယ်ကူလာနိုင်တယ်လေ။ ဟိုအရင် ကိုဗစ် မတိုင်ခင်က တစ်ရက်ကို ၅ သိန်းလောက်ရရင် ကိုဗစ်တုန်းက ၁သိန်းခွဲ ၂ သိန်းလောက်ပဲရတော့တယ်” ဟု ၎င်းက ပြောသည်။

အလားတူ ကြံစိုက်ခင်း ပိုင်ရှင်များကလည်း နယ်စပ်ဂိတ်ကို ပြန်ဖွင့်ပေးလိုက်ပါက ယခင်နှစ်တွေလိုမျိုး မစွန့်ပစ်ရတော့သည့်အတွက်ကြောင့် နယ်စပ်ဂိတ် ဖွင့်ရန် စိုက်ပျိုးတောင်သူများကလည်း မျှော်လင့်နေကြသည်။

“ ကျနော်တို့ အရင်နှစ်တွေဆိုရင် မိုင်းရယ်တွေကိုပဲ ပို့ပေးရတာလေ။ ရှုံးတာပေါ့။ အရင်ကဆိုရင် သူတို့ ကျနော်တို့ ခြံထဲထိလာပြီး ဝယ်ယူကြတယ်လေ။ တံတားပိတ်လိုက်တော့ ကျနော်တို့ ကြံတွေလည်း အများကြီး ပစ်ခဲ့ရဖူးတယ်။ တံတားပြန်ဖွင့်ရင်တော့ ပျော်တာပေါ့” ဟု ထုန့်မောဝ်ဒေသတွင်း နေထိုင်သည့် သူက ပြောသည်။

လက်ရှိတွင်လည်း တရုတ်နိုင်ငံတွင်း Lockdown ဖွင့်ပေးလိုက်သည့် အတွက်ကြောင့် မြန်မာရွှေ့ပြောင်း အလုပ်သမားများ ကလည်း ပြန်လာရန် ပြင်ဆင်နေကြသည်။

တရုတ်နိုင်ငံတွင် ပြီးခဲ့သည့် နိုဝင်ဘာ ၂၉ ရက်က စပြီး တရုတ်နိုင်ငံ သမ္မတ ရှီကျင့်ဖျင် ၏ ကိုဗစ် သုည မူဝါဒကို ဆန္ဒပြ ကန့်ကွက်ခဲ့ကြပြီး ယမန်နေ့ ဒီဇင်ဘာ ၈ ရက်နေ့တွင် Lockdown ဖြေလျှော့ပေးခဲ့သည်။