သျှမ်းပြည်မြောက်ပိုင်း လောက်ကိုင်မြို့ မြို့နယ်ယာဥ်လိုင်းပေါင်းစုံ ကြီးကြပ်ရေး ကော်မတီမှ ကားခ ယာဥ်နှုန်း ထားများကို သတ်မှတ်နှုန်းထားဖြင့် ပိုကောက်ပါက အရေးယူခြင်း ခံရမည်ဟု ထုတ်ပြန်လာသည်။
ယမန်နေ့ (ဒီဇင်ဘာ ၇) ရက်စွဲဖြင့် လောက်ကိုင်မြို့နယ် ယာဥ်လိုင်းပေါင်းစုံ ကြီးကြပ်ရေး ကော်မတီက ခရီးသည် တစ်ဦးအတွက် ကားခများကို သတ်မှတ်နှုန်းထားအတိုင်း ကောက်ခံရန် နှင့် လိုက်နာမှု မရှိပါက အရေးယူခြင်း ခံရမည်ဟု အဆိုပါ ထုတ်ပြန်ချက်တွင် ပါရှိသည်။
ယင်းကဲ့သို့ ထုတ်ပြန်လာခြင်းနှင့် ပတ်သက်ပြီး လောက်ကိုင်မြို့ထဲအထိ တိုက်ပွဲဖြစ်မည့် သတင်းထွက်လာပြီး နောက် မြို့ထဲမှ ထွက်လိုသည့် ပြည်သူများ များပြားပြီး ကားများငှားမလောက် နှင့် ဈေးနှုန်းလည်း တက်လာကြောင်း လောက်ကိုင်မြို့နေ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“ကားခတွေ တက်လာတဲ့ သတင်းက အရမ်းပေါက်တော့ သက်ဆိုင်ရာကနေ ဂိတ်တွေကို တရားစွဲမယ်လို့ ထုတ်ပြန် ချက် ထွက်လာတယ်၊ ဒါကြောင့် တချို့ဂိတ်တွေက ပုံမှန်စျေးအတိုင်းပဲ ကားလက်မှတ်တွေ ပြန်ရောင်းနေပါပြီ၊ ခရီးသည်တွေကတော့ စျေးပိုပေးပြီး ပြန်ကြတာလို့ သိရတယ်” ဟု လောက်ကိုင်မြို့ခံ အမျိုးသားက ပြောသည်။
လောက်ကိုင် ကားခဈေးနှုန်းများသည် ဒီဇင်ဘာလ ၆ ရက်နေ့တွင် မူရင်းဈေး ၆ သောင်းကျပ်မှ တစ်သိန်း နှစ်သောင်းကျပ်အထိ မြင့်တက်လာကြောင်းသိရသည်။
ပြီးခဲ့သည့် နိုဝင်ဘာ ၂၈ နှင့် ၂၉ နှစ်ရက်တာအတွင်း ချင်းရွှေဟော်ဒေသ နမ့်ဖာတောင်ဒေသတွင် စစ်ကောင်စီ နှင့် ကိုးကန့်တပ်မတော် (MNDAA) တို့သည် လောက်ကိုင်မြို့ထဲ အထိ တိုက်ပွဲဖြစ်လာမည့် သတင်းကြောင့် လောက်ကိုင်ရောက် အလုပ်သမား အများစုက စိုးရိမ်ကြောက်လန့်ပြီး ဇာတိနေရပ်ပြန်ကြရန် ကားအလုအယက် ငှားရမ်းရာမှ ကားဈေးနှုန်းတက်လာခြင်း ဖြစ်သည်။
“သတင်းက ကောလဟလလား ဘာလားဆိုတာတွေကို မစစ်ကြတော့ပဲနဲ့ ပြည်သူတွေက တိုက်ပွဲဆိုတာနဲ့ ကြောက်ပြီး နေရပ်ကို ပြန်ချင်ကြတာ၊ အဲ့ဒါကြောင့် ကားဈေးနှုန်းတွေက တက်ပြီး ငှားမရလောက်အောင် ဖြစ်တာ၊ သက်ဆိုင်ရာတွေကတော့ ဒီအခြေအနေကို ထိန်းဖို့ ကြိုးစားနေတယ်” ဟု လောက်ကိုင်မြို့မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ အလုပ်သမားများ စိုးရိမ်ကြောက်လန့်ပြီး နေရပ်ပြန်ကြခြင်းနှင့် ပတ်သက်ပြီး မြန်မာအမျိုးသား ဒီမိုကရက်တစ်မဟာမိတ်တပ်မတော် (MNDAA) ကိုးကန့်တပ်ဖွဲ့က တိုက်ပွဲသတင်းသည် ကောလဟလသာ ဖြစ်ကြောင်း မယုံကြည်ကြရန် ထုတ်ပြန် ပြောဆိုထားသည်။
လောက်ကိုင်မြို့နယ်ထဲတွင် လောင်းကစားဝိုင်း အများအပြားရှိပြီး ရွှေ့ပြောင်းအလုပ်သမားများက လောင်းကစားဝိုင်းများ နှင့် အွန်လိုင်းဂိမ်း၊ ဘာသာပြန် အလုပ်အကိုင်များ သွားရောက် လုပ်ကိုင်ကြသည့် နေရာဖြစ်သည်။
