သျှမ်းပြည် မြောက်ပိုင်း လောက်ကိုင်မြို့မှ ထွက်သည့် လုပ်သားခရီးသည်များကို စစ်ကောင်စီ စစ်ဆေးရေး ဂိတ်မှ တစ်ဦးလျှင် တစ်သောင်း တောင်းယူကြောင်း သတင်းသိရသည်။

ယမန်နေ့ (ဒီဇင်ဘာလ ၆) ရက်တွင် လောက်ကိုင်မြို့ထဲ အထိ တိုက်ပွဲဖြစ်ပွားမည့် သတင်းပျံ့နှံ့မှုတွေကြောင့် လောက်ကိုင်မြို့မှ ထွက်လာသည့် ခရီးသည်များသည် လမ်းတစ်လျှောက် စစ်ကောင်စီ စစ်ဆေးရေးဂိတ် ကို တစ်ဦးလျှင် တစ်သောင်းကျပ်နှုန်း တောင်းယူကြောင်း လားရှိုး – လောက်ကိုင် ကားဆရာတစ်ဦးက သျှမ်းသံတော်ဆင့်ကို ပြောသည်။

“လောက်ကိုင်ကနေ လားရှိုးဘက် ထွက်လာတဲ့ ကွမ်လုံ သတင်းရဲ့ ဟိုဘက် ဒီဘက် စစ်ဆေးရေးဂိတ်တွေမှာ ခရီးသည်တွေက တစ်ယောက်တစ်သောင်းပေးပြီး ဖြတ်ရတယ်၊ ကားခက ၆ သောင်းကျပ်ပဲ ပေးရရင်တောင်မှ စစ်ကောင်စီတွေကို ပေးရတာလည်း ၅ သောင်းထက်မနည်း ရှိနေမှာ၊ ဒါကြောင့် ပိုက်ဆံတော်တော်ကုန်တယ်” ဟု လားရှိုး – လောက်ကိုင် ကားဆရာက ဆိုသည်။

ယင်းကဲ့သို့ ပိုက်ဆံတောင်းယူသည့် စစ်ကောင်စီ တပ်သားများသည် အရက်မူးနေသည့်အပြင် အမျိုးသမီးငယ်များ ကိုလည်း ထိကပါး ရိကပါးလည်း လုပ်ဆောင်ကြောင်း ကားသမားများက ပြောပြသည်။

ယမန်နေ့ ဒီဇင်ဘာ ၆ ရက် ညနေ အချိန်တွင် မြို့ထဲအထိ တိုက်ပွဲဖြစ်ပွားမည့် သတင်းပျံ့နှံလာခြင်းကြောင့် လောက်ကိုင်ရောက် အလုပ်သမားများသည် စိုးရိမ်စိတ်ဖြင့် လိုင်းကားများ အလုအယက် ကားငှားကြရာ ကားငှားခ ဈေးနှုန်းသည် မူရင်း ဈေး ထက် တစ်ဆ မြင့်တက်ခဲ့ကြောင်းလည်း သိရသည်။

ထို့အပြင် လောက်ကိုင်မြို့တွင်း၌ မီး ၇ ရက်ဖြတ်မည်ဟုလည်း သတင်းထွက်လာသည့်အတွက် ပြည်သူများက စိုးရိမ်မှုပိုနေခြင်းဖြစ်ကြောင်းလည်း သတင်းသိရသည်။

“တိုက်ပွဲ သတင်းလည်း ထွက်လာရော၊ မီးဖြတ်မယ့် သတင်းလည်း ထွက်လာလို့ ပြည်သူတွေက ပိုစိုးရိမ်ကြပြီး ဇာတိမြေကို ပြန်ချင်ကြတာ၊ ဒါပေမဲ့ မီးဖျက်မယ့် ကိစ္စက ကေဘလ်ကြိုးလှဲဖို့ အတွက်ဆိုတာ EPC က ထုန်ပြန်ထားတယ်၊ တိုက်ပွဲနဲ့ မဆိုင်ပါဘူး” ဟု လောက်ကိုင် ဒေသခံ အသက် ၄၀ ဝန်းကျင်အမျိုးသား တစ်ဦးက သျှမ်းသံတော်ဆင့်ကို ပြောသည်။

တိုက်ပွဲသတင်းများကြောင့် ပြည်သူများ အလုပ်သမားများ စိုးရိမ်ကြောက်လန့်ပြီး နေရပ်ပြန်ကြ ခြင်းနှင့် ပတ်သက် ပြီး မြန်မာအမျိုးသား ဒီမိုကရက်တစ်မဟာမိတ်တပ်မတော် (MNDAA) ကိုးကန့်တပ်ဖွဲ့က တိုက်ပွဲသတင်းသည် ကောလဟလသာ ဖြစ်ကြောင်း မယုံကြည်ကြရန် ထုတ်ပြန် ပြောဆိုထားသည်။

အဆိုပါ ထုတ်ပြန်ချက် ထွက်ပြီးနောက် ယနေ့ (ဒီဇင်ဘာလ ၇) ရက်တွင် လောက်ကိုင်မြို့မှ ထွက်လာရန် ပြင်ဆင်သည့် အချို့အလုပ်သမားများက နောက်ပြန်လှည့်ပြီး လောက်ကိုင်မြို့သို့ သွားရောက်အလုပ်လုပ် သည့် ခရီးသည်လည်း ဆက်ရှိနေသေးကြောင့် အမည်မဖော်လိုသူ ကားသမားတစ်ဦးက ဆက်ပြောသည်။

“ဒီနေ့မှ လောက်ကိုင်က အထွက် ရှိပေမဲ့ မနေ့ကလောက် မများတော့ဘူး၊ ပြန်ဝင်တဲ့သူလည်း ရှိသလို တခြားက အလုပ်လုပ်ဖို့ လာတဲ့သူတွေလည်း ရှိတယ်၊ အုပ်ချုပ်ရေးပိုင်းက စာထွက်လာတော့ ပြည်သူတွေ က အားရှိသွားတယ်ပြောရမယ်ပေါ့၊ တကယ်တော့လည်း တိုက်ပွဲက ဖြစ်မယ်မှန်းကို မသေချာတာ” ဟု ၎င်းက ပြောသည်။

ပြီးခဲ့သည့် နိုဝင်ဘာ ၂၈ နှင့် ၂၉ နှစ်ရက်တာအတွင်း ချင်းရွှေဟော်ဒေသ နမ့်ဖာတောင်ဒေသတွင် စစ်ကောင်စီ နှင့် ကိုးကန့်တပ်မတော် (MNDAA) တို့ တိုက်ပွဲအပြင်းထန်ဖြစ်ပွားခဲ့ပြီး ထိုလောက်ကိုင်မြို့ထဲအထိ တိုက်ပွဲ ဖြစ်လာနိုင်သည့် သတင်းကြောင့် လောက်ကိုင်ရောက် အလုပ်သမားများက စိုးရိမ်မှုမြင့်တက်ကာ နေရပ်ပြန်ကြခြင်း ဖြစ်သည်။

လောက်ကိုင်မြို့နယ်ထဲတွင် လောင်းကစားဝိုင်း အများအပြားရှိပြီး ရွှေ့ပြောင်းအလုပ်သမားများက လောင်းကစားဝိုင်းများ နှင့် အွန်လိုင်းဂိမ်း၊ ဘာသာပြန် အလုပ်အကိုင်များ သွားရောက် လုပ်ကိုင်ကြသည့် နေရာဖြစ်သည်။