သျှမ်းပြည်အရှေ့ပိုင်း တာချီလိတ်မြို့ ရန်အောင်မြေ ပါလျှံ (၁) ရပ်ကွက် အလိုတော်ပြည့် ဘုန်းကြီး ကျောင်းအနီး၌ အိမ်ဌားနေသူများ ချောကလက်စားပြီး ဦးခေါင်းမူးဝေလာကာ ဆေးရုံသို့ တင်ဆောင်ထား ရကြောင်း သိရသည်။

ယနေ့ (ဒီဇင်ဘာလ ၇) ရက် နေ့လည် ၁၂ နာရီဝန်းကျင်က ကလေးငယ် ၂ ဦး၊ အမျိုးသားတစ်ဦး နှင့်အမျိုးသမီး ၂ ဦးတို့သည် သက်တမ်းကုန်ဆုံးသော ချောကလက်လုံးများကို စားမိကာ ဦးခေါင်းမူးဝေဖြစ်ပြီး တာချီလိတ် ပြည်သူ့ဆေးရုံကြီးသို့ ပို့ဆောင်လိုက်ရကြောင်း တာချီလိတ် ဦးလှမိုး လူမှုကူညီရေးအသင်းထံမှ သိရသည်။

“ သက်တမ်းကုန်တဲ့ ချောကလက်ကို စားမိတာနဲ့တူတယ်။ ချောကလက်က အပေါက်အဖာတွေနဲ့ စားပြီးတော့ ဦးခေါင်းမူးဝေပြီး အော့အန်တာ။ သူတို့ကို တာချီလိတ် ဆေးရုံကြီးကို ပို့ထားတယ်။ သေလောက်တဲ့အထိတော့ မဖြစ်ဘူးလို့ ဆရာဝန်ကတော့ပြောတယ်။ လူကြီးတွေတော့ ဘာမှတော့ မဖြစ်တော့ဘူး၊ ကလေးတွေကတော့ မှိန်းနေသေးတယ် “ ဟု ၎င်း တာဝန်ခံတစ်ဦးက ပြောသည်။

အဆိုပါ ချောကလက်လုံးများကို သက်ဆိုင်ရာ ဆရာဝန်များက ဓာတုပစ္စည်းပါဝင်မှု ရှိ၊ မရှိ စစ်ဆေးနေကြောင်း သိရသည်။

ချောကလက်လုံးစားပြီး ဦးခေါင်းမူးဝေပြီး ဆေးရုံကြီးသို့ တင်ဆောင်ခံထားရသူမှာ အသက် ၂ နှစ် မောင်ထူးမြတ်ဝေ၊ အသက် ၁ နှစ်အရွယ် နန်းသဇင်မိုး၊ အသက် ၂၉ နှစ် မသီတာသိမ့်၊ အသက် ၂၁ နှစ် မယမင်း နှင့် အသက် ၁၇ နှစ် မောင်အောင်ကျော်လင်းတို့ ဖြစ်ကြောင်း သိရသည်။

ပြီးခဲ့သည့် အောက်တိုဘာ ၁၇ ရက်တွင် တာချီလိတ်မြို့ ကျောက်တောင်ရပ် နတ်မောက် ရွှေသူဌေးကုန်းကျောင်း တိုက်တွင် ဆရာတော်တစ်ပါး နှင့် ဒကာ ၄ ဦးတို့သည် တရုတ်စာတမ်းပါ (Coffee SHQ) ကော်ဖီကို သောက်မိပြီးနောက် သတိလစ်မေ့သွားကြောင်း သိရသည်။