ထိုင်းနိုင်ငံ ချင်းမိုင်ခရိုင် ဖန်မြို့နယ်တွင် လိမ္မော်သီးခြံအတွင်း အလုပ်လုပ်နေသည့် မြန်မာရွှေ့ပြောင်းအလုပ်သမား များ လစာမရရှိကြကြောင်း စုံစမ်းသိရှိရသည်။
ထိုင်းနိုင်ငံ အတွင်း ကိုဗစ် – ၁၉ ကူးစက်ရောဂါ ဖြစ်ပွားပြီး ၂ နှစ်သာ နိုင်ငံဖြတ်ကျော်ခွင့် ပိတ်ဆိုင်းခဲ့ရာ လက်ရှိမှာတော့ လိမ္မော်သီးခြံပိုင်ရှင်မှ ရောင်းအားမကောင်းကြောင်း၊ ဝယ်ယူသူ နည်းပါးလာသောကြောင့် ခြံပိုင်ရှင်မှ ဝန်ထမ်းများကို လစာမပေးနိုင်သောကြောင့် ဖန်မြို့နယ်အတွင်း နေထိုင်သည့် မြန်မာရွှေ့ပြောင်း အလုပ်သမား အမျိုးသမီး တစ်ဦးက သျှမ်းသံတော်ဆင့် ပြောသည်။
အဆိုပါ ခြံလုပ်သားများသည် လစာကို ၄ လကြာထိ မရရှိသေးကြောင်း သိရသည်။
“ သူတို့ ကုမ္ပဏီကြီးဘက်တွေကလည်း ရောင်းလို့မကောင်းလို့တဲ့။ အဲ့ကြောင့် ဝန်ထမ်းတွေက လစာမရကြဘူး။ သူတို့လစာမရတာ ၄ လလောက်ရှိနေပြီ။ တစ်ချို့လည်း ခြံကနေထွက်သွားတာတွေရှိနေပြီ” ဟု ဖန်မြို့နယ်တွင် ကလေးတွေကို စာသင်ပေးနေသည့် ဆရာမက ပြောသည်။
အလားတူ လုပ်ငန်းရှင်မှ လစာမပေးနိုင်သောကြောင့် ဝန်ထမ်း စားဝတ်နေရေးခက်ခဲလာပြီး တစ်ချို့က အလုပ်မှ ထွက်ပြီး တစ်ခြားအလုပ်ပြောင်းလုပ်ရကြောင်း ဖန်မြို့နယ်ရောက် မြန်မာရွှေ့ပြောင်းအလုပ်သမားများက ပြောသည်။
ထိုအပြင် ထိုင်းနိုင်ငံတွင်း နေထိုင်ရန်အတွက် ဗီဇာ၊ Passport များကို သက်တမ်းတိုးရန်အတွက်လည်း ငွေအကုန်ကျများရသောကြောင့် လစာမရရှိသည့်အတွက် အခက်ခဲများနှင့် ရင်ဆိုင်နေရကြောင်း သိရသည်။
“ လစာမရတာ ၃ လလောက်ရှိနေပြီ။ လစာမရတော့ အလုပ်ကနေထွက်လာလိုက်ပြီ။ တစ်ခြားအလုပ်တွေ ပြောင်းလုပ်ရတာပေါ့။ ဗီဇာ၊ passport တွေသက်တမ်းတိုးဖို့လည်း ပိုက်ဆံအများသုံးရတယ်လေ။ ပြီးတော့ စားဖို့သောက်ဖို့လည်း ရှိတာပဲ စားရတာပေါ့” ဟု လိမ္မော်သီး ခြံလုပ်သားဝန်ထမ်းတစ်ဦးက ပြောသည်။
ထိုသို့ လစာမရသည့် အခက်ခဲကြောင့် တစ်ချို့ကျောင်းသားများသည် ကျောင်းမှ ထွက်ပြီး အလုပ်ထွက် လုပ်ရကြောင်း၊ ကျောင်းမထွက်ရသည့် ကလေးများအတွက်က ကျောင်းသွားရန် ကားခအတွက် အကြွေးတင်နေကြောင်း ဖန်မြို့နယ် မှ ကျောင်းဆရာမတစ်ဦးက သျှမ်းသံတော်ဆင့်ကို ပြောသည်။
“ တစ်ချို့ကလေးတွေက ကျောင်းထွက်ပြီး အလုပ်လုပ်ရတာရှိတယ်။ ဒါကတော့ အနည်းစုပါပဲ။ တစ်ချို့ကျောင်း မထွက်ရတဲ့ ကလေးတွေဆိုရင် သူတို့ မိဘတွေက ကားခအတွက် အကြွေးတွေ တင်နေရတယ်။ သူတို့က ကျောင်းသွားဖို့ ကားစီးသွားရတယ်” ဟု ၎င်းက ပြောသည်။
ဖန်မြို့နယ်အတွင်းတွင် လိမ္မော်သီးခြံများ တစ်ချို့ ဆက်မစိုက်ပျိုးရသည့် အတွက်ကြောင့် ပျက်စီးသွားသည့် ခြံများလည်းရှိ နေကြောင်း သိရသည်။
ဖန်မြို့နယ်တွင်း ထွက်သည့် လိမ္မော်သီးများကို ယခင် ကိုဗစ် – ၁၉ ကာလ မတိုင်ခင်က တရုတ်နိုင်ငံဘက်သို့ တင်သွင်းရောင်းချပြီး ယခုကာလအတွင်း မတင်ပို့နိုင်သည့်အတွက်ကြောင့် လိမ္မော်သီးခြံများ အလုပ်မဖြစ်လာ တော့ကြောင်း သိရသည်။
