သျှမ်းပြည်မြောက်ပိုင်း လောက်ကိုင်မြို့ထဲ တိုက်ပွဲဖြစ်ပွားမည်ဆိုသည့် သတင်း လူမှုကွန်ရက် စာမျက်နှာပေါ် ပျံ့နှံ့မှုကြောင့် တရုတ်ယွမ်ငွေဈေး ကျပြီး ကားငှားရမ်းခ ဈေးနှုန်းများ မြင့်တက်လာကြောင်း သတင်းသိရသည်။

ယနေ့ ဒီဇင်ဘာ ၆ ရက်တွင် လောက်ကိုင်မြို့နယ်အတွင်း တိုက်ပွဲဖြစ်ပွားမည့် သတင်းကြောင့် (Laukkai City) အနီးရှိ ကားကွင်းမှ လိုင်းကားများ အလုအယက် ကားငှားရမ်းရာ လက်ရှိတွင် ကားငှားခ ဈေးနှုန်းသည် မူရင်း ဈေး ထက် တစ်ဆ မြင့်တက်သွားကြောင်း ဒေသခံအမျိုးသား တစ်ဦးက ပြောသည်။

“နေ့လည်အထိ လောက်ကိုင် – လားရှိုး ကားခက ၆ သောင်းကျပ်အထိ ရသေးတယ်၊ ဒီညနေတော့ ကားခက ၁၂၀,၀၀၀ (တစ်သိန်း နှစ်သောင်းကျပ်) ဖြစ်နေပြီ၊ မှောင်ခိုဈေးတွေတောင်ရှိနေတယ်ကြားတယ်၊ မြန်မြန်ထွက် ချင်သူက ပိုက်ဆံပိုပေးတာပေါ့” ဟု (Laukkai City) ကားကွင်းအနီးနေထိုင်သူ အသက် ၃၂ ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။

လောက်ကိုင်မြို့သို့ သွားရောက် အလုပ်လုပ်နေသူများသည် တိုက်ပွဲသတင်းကြောင့် စိုးရိမ်မှု မြင့်တက်ကာ နေရပ် ဇာတိထံသို့ ပြန်ချင်နေကြကြောင်း ၎င်းက ဆက်ပြောသည်။

ထို့အပြင် ယင်းကဲ့သို့ အလုပ်သမားများက ဇာတိနေရပ်ပြန်မှု များပြားသည့် အတွက် မြို့တွင်း တရုတ် – မြန်မာငွေ လဲလှယ်သည့် KPay နှင့် WavePay များမှ ကျပ်ငွေ ရှားလာပြီး တရုတ်ငွေ ယွမ်ဈေးလည်း ကျလာကြောင်း သတင်းသိရသည်။

“လူတွေက ကြောက်ပီး ဇွတ်ပြေးကြတော့ အခု မြို့ပေါ်မှာ KPay ၊ WavePay နဲ့ မြန်မာငွေရှားသွားပြီး အခုဆို တရုတ် ငွေစျေးဆက်တိုက်ကျနေတယ်၊ ဒီနေ့လည်း ၃၈၃ ကနေ ၃၈၀ အတိဖြစ်သွားပြီ” ဟု လောက်ကိုင်မြို့တွင် နေထိုင်သူ အသက် ၄၅ ဝန်းကျင် အမျိုးသမီးတစ်ဦး ကလည်း သျှမ်းသံတော်ဆင့်ကို ပြောသည်။

လောက်ကိုင်မြို့မှ တရုတ်ယွမ်ငွေ လဲလှယ်မှု ဈေးနှုန်းသည် ယခင်မြန်မာငွေကျပ် ၄၁,၀၀၀ (လေးသောင်း တစ်ထောင်) ကျပ်ကို တရုတ်ယွမ်ငွေ ၁၀၀ နှင့် ညီမျှသော်လည်း လက်ရှိတွင် တရုတ်ယွမ်ငွေ ၁၀၀၊ မြန်မာငွေကျပ် ၃၈,၀၀၀ ဖြစ်နေကြောင်း ၎င်းက ဆက်ပြောသည်။

ယင်းကဲ့သို့ တိုက်ပွဲ သတင်းများကြောင့် ပြည်သူများ အလုပ်သမားများ စိုးရိမ်ကြောက်လန့်နေကြခြင်းနှင့် ပတ်သက် ပြီး မြန်မာအမျိုးသား ဒီမိုကရက်တစ်မဟာမိတ်တပ်မတော် (MNDAA) ကိုးကန့်တပ်ဖွဲ့က တိုက်ပွဲသတင်းသည် ကောလဟလသာ ဖြစ်ကြောင်း မယုံကြည်ကြရန် ထုတ်ပြန် ပြောဆိုထားသည်။

သို့သော်လည်း လက်ရှိအချိန်ထိ ပြည်သူများက စိုးရိမ်ကြောက်လန့်ပြီး လောက်ကိုင်မှ ထွက်ခွာရန် ကားများ အလုအယက် ငှားရမ်းနေမှုကြောင့် လားရှိုးမြို့ဘက်ရှိ ဟော်တယ်များ ၊ တည်းခိုခန်းများလည်း ဈေးနှုန်း တက်လာကြောင်း ဒေသခံများက ပြောဆိုသော်လည်း သျှမ်းသံတော်ဆင့် အနေဖြင့် သီးခြား အတည်ပြုချက် မရသေးပေ။

လောက်ကိုင်မြို့နယ်ထဲတွင် လောင်းကစားဝိုင်း အများအပြားရှိပြီး ရွှေ့ပြောင်းအလုပ်သမားများက လောင်းကစားဝိုင်းများ နှင့် အွန်လိုင်းဂိမ်း၊ ဘာသာပြန် အလုပ်အကိုင်များ သွားရောက် အလုပ် လုပ်ကိုင်ကြသည့် နေရာဖြစ်သည်။

ထို့အပြင် လောက်ကိုင်မြို့အတွင်း၌ စစ်ကောင်စီမှ ထုတ်ပြန်ထားသည့် ည ၈ နာရီ အပြင်မထွက်ရအမိန့်လည်း ရှိနေကြောင်း သိရသည်။