သျှမ်းပြည်တောင်ပိုင်း မိုးဗြဲမြို့ နှင့် အလှမ်းဝေးပြီး တောထဲရောက်ရှိနေသည့် စစ်ရှောင် ကလေးငယ်များ ဖျားနာနေပြီး ကုသရန် ဆေးဝါးမလုံမလောက်ဖြစ်နေကြောင်း စုံစမ်းသိရှိရသည်။
သြဂုတ်လပိုင်းမှစပြီး ယခု (ဒီဇင်ဘာလ) အထိ အလှူရှင်များ မရှိသဖြင့် ဆေးဝါးဝယ်ယူရန် ငွေရေးကြေးရေး ခက်ခဲနေကြောင်း၊ နယ်စပ်ဒေသတွင် လမ်းကြောင်း ပိတ်ဆို့မှုများရှိလာသဖြင့် ဆေးဝါးမှာယူရန် အခက်ခဲရှိ နေကြောင်း Mobye Rescue Team မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲကြောင့် တစ်နှစ်ကျော်ကြာ မိုးဗြဲ မြို့နှင့်အလှမ်းဝေးပြီး တောထဲသို့ ရောက်ရှိနေသည့် စစ်ရှောင်ဦးရေ ၄၀၀ ကျော်ရှိကာ လက်ရှိမှာ အအေးမိ ဖျားနာနေကြောင်း သိရသည်။
ထိုဖျားနာမှုများထဲတွင် ၁၀ နှစ်အောက် ကလေးငယ် ဦးရေ ၁၀၀ ခန့်ရှိကာ ဆေးကုသရန် ဆေးဝါးမလုံလောက် ဖြစ်နေကြောင်း Mobye Rescue Team မှ အဖွဲ့ဝင်က ဆိုသည်။
“ အခုဆောင်းဝင်ပြီဆိုတော့ အနွေးထည်ကြောင့်မရှိတာ ကလေးငယ် တော်တော်များများ ဖျားနာနေတယ်။ (၅)နှစ်၊ (၁၀) နှစ်အောက် ကလေးတွေ ဖျားနေတဲ့သူ ပျှမ်းမျှ ဦးရေ ၁၀၀ လောက်ရှိတယ်။ အခုတလော အလှူရှင် မရှိဘူး။ ဆေးဝါးမှာဖို့လည်း ခက်လာတယ်။ ဖျားနေတဲ့ ကလေးတွေကို ကုသဖို့ ဆေးဝါး မလုံလောက်ဘူး “ ဟု ၎င်းတာဝန်ခံတစ်ဦးက ပြောသည်။
လက်ရှိ ဖျားနာနေသည့် ကလေးငယ် ဦးရေ ၁၀၀ ဦးခန့်ကို Mobye Rescue Team မှ စုဆောင်းထားသော ဆေးဝါးနှင့်သာ ကုသပေးနေပြီး ယခု (ဒီဇင်ဘာလ) ကုန်ပိုင်းမှာ အလှူရှင် မရှိလျှင် ဆေးဝါးများ ပြတ်တောက်နိုင် ဖွယ်ရှိကြောင်း သိရသည်။
ထို့အပြင် စစ်ရှောင်များ အသုံးပြုရသော ရေ များကို ကားဖြင့် သယ်ယူပို့ဆောင်ရန် စက်သုံးဆီ ကုန်ကျစရိတ် လိုအပ်နေကြောင်း စစ်ရှောင်ကူညီသူ အသက် ၂၅ နှစ် ဝန်းကျင် အမျိုးသမီးတစ်ဦး ကပြောသည်။
“ အခုလကစပြီး ရေ က စရှားတော့မယ်။ မိုးလည်းမရှိတော့ဘူးဆိုတော့ ရေကိုချွေသာပြီး သုံးရတော့မယ်။ ရေမရှိတဲ့ နေရာကို ကျမတို့ကားနဲ့ သယ်ပို့ဖို့ အစီစဉ်ရှိတယ်။ ရေကိုကားနဲ့ သယ်ပို့မယ်ဆိုရင် အဓိက ကတော့ စက်သုံးဆီ အခက်ခဲပေါ့ တစ်ခါသွားရင် စက်သုံးဆီဖိုး ကျပ် (၃သောင်း) လောက်ကုန်တယ် “ ဟု ၎င်း အမျိုးသမီးတစ်ဦးက ပြောသည်။
ပြီးခဲ့သည့် နိုဝင်ဘာလ ၁၄ ရက် ဖယ်ခုံမြို့နယ် အင်းအရှေ့ဘက်ကမ်းတွင် စစ်ကောင်စီဘက်မှ လက်နက်ကြီး ခြိမ်းခြောက် ပစ်ခတ်မှုကြောင့် ၇ နှစ် ကလေး တစ်ဦး နှင့် အသက် ၃၀ အရွယ် အမျိုးသားတစ်ဦး ထိမှန်ခဲ့ကြောင်း သိရသည်။
