သျှမ်းပြည်တောင်ပိုင်းရှိ သျှမ်း – ကယားနယ်စပ် ဆောင်ကန်းလမ်းကို စစ်ကောင်စီတပ်ဖွဲ့မှ ပိတ်ပြီး လမ်းသွားလမ်းလာပြည်သူလူထုများကို စစ်ဆေးမှုများ ပြုလုပ်နေကြောင်း သတင်းသိရသည်။
ယနေ့ ဒီဇင်ဘာလ ၆ ရက် နံနက်ပိုင်း အချိန်မှ စတင်ကာ ဖယ်ခုံမြို့နယ် ဆောင်ကန်းရွာရှိ လမ်းများကို စစ်ကောင်စီ တပ်ဖွဲ့မှ လမ်းများကို ပိတ်ပြီး စစ်ဆေးမှု ပြုလုပ်နေကြောင်း ဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ဆန်စက်အနီးက လမ်းပေါ်မှာ စောင့်ပြီးတော့ စစ်ဆေးမှုတွေ လုပ်နေတာပါ၊ ဘယ်ရွာကလဲ ဘယ်သွားမလဲ ဆိုပြီးမေးကြတယ်၊ ဈေးသွားဝယ်မလို့ ပြောရင်လည်း PDF တွေကို သိလား မြင်လား ဆိုပြီး ထပ်မေးတယ်” ဟု အသက် ၃၀ ဝန်းကျင် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အာဏာသိမ်း စစ်ကောင်စီ တို့သည် လမ်းသွားလမ်းလာ ပြည်သူများကို PDF နှင့် ဆက်သွယ်မှု ရှိမရှိ မေးမြန်းသည့် အပြင် PDF သတင်းကြားမိပါက သတင်းပို့ပေးရန် ပြောဆိုကြောင်း အထက်ပါ အမျိုးသမီးက ဆက်ပြောသည်။
ယင်းကဲ့သို့ စစ်ဆေးမေးမြန်းမှုများရှိနေသဖြင့် သျှမ်းတောင် မိုးဗြဲမှ လွိုင်ကော်ဘက်သွားသည့် လမ်းကို အသွား အလာ ဆင်ခြင်သင့်ကြောင်း အထက်ပါ အမျိုးသားက ဆက်ပြောသည်။
“မိုးဗြဲ – လွိုင်ကော်လမ်းကို အသုံးပြုမယ်ဆိုရင် လမ်းကြောင်းကို သေချာ မေးမြန်းပြီးမှ သွားသင့်ပါတယ်၊ ဖုန်းတွေ အိတ်တွေကို သူတို့ စစ်တယ်လို့ကြုံရသူက ပြန်ပြောပြလို့ မပေါ့ဆသင့်ဘူးပေါ့၊ ဖြစ်နိုင်ရင်တော့ ဒီရက်ပိုင်း မသွားတာလဲကောင်းပါတယ်” ဟု ၎င်းက ပြောသည်။
သျှမ်းတောင် မိုးဗြဲ – လွိုင်ကော် လမ်းပိုင်း တစ်လျှောက်သည် ဒေသခံ ပြည်သူ့ကာကွယ်ရေး ပူးပေါင်း တပ်ဖွဲ့များ နှင့် စစ်ကောင်စီ တပ်ဖွဲ့တို့ ထိတွေ့ တိုက်ပွဲ မကြာခဏ ဖြစ်ပွားလေ့ရှိသည့်အတွက် ယခုလို စစ်ကောင်စီ တပ်သားများ စစ်ဆေးမှု ပြုလုပ်နေချိန် ထိတွေ့တိုက်ပွဲ ဖြစ်ပွားမည်ကို စိုးရိမ်ကြောင်းလည်း အသက် ၄၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ပြီးခဲ့တဲ့ လကပဲ တိုက်ပွဲတွေ ပြင်းပြင်းထန်ထန်ဖြစ်ခဲ့ဖူးတာ ဆိုတော့ ထပ်ဖြစ်မှာကို ကြောက်တာပေါ့၊ စစ်ကောင်စီဘက်ကလည်း လက်နက်ကြီးတွေ ရမ်းပစ်တာတွေ၊ မထင်ရင်မထင်သလို ပစ်သတ်နေကြတော့ လုံခြုံမှုက မရှိပါဘူး” ဟု ၎င်းက ပြောသည်။
လက်ရှိတွင် စစ်ကောင်စီ တပ်ဖွဲ့မှ မိုးဗြဲ – လွိုင်ကော် လမ်းမကြီး တလျှောက်ကို ထိန်းချုပ်ရန် ကြိုးစားနေပြီး အင်အားအများအပြားဖြင့် နေရာယူထားကြောင်းလည်း သတင်းသိရသည်။
ပြီးခဲ့သည့် နိုဝင်ဘာလတွင်လည်း ဆောင်ကန်း စစ်ကောင်စီ နှင့် ဒေသခံ ကာကွယ်ရေး ပူးပေါင်းတပ်တွေကြား တိုက်ပွဲတွင် စစ်ကောင်စီဘက်မှ လက်နက်ကြီးပစ်ခတ်မှုတွေကြောင့် အရပ်သားပြည်သူ သုံးဦးသေဆုံးခဲ့သလို ရွာပေါင်း ၁၀ ရွာက ဒေသခံနှစ်သောင်း ကျော် စစ်ရှောင် ထွက်ပြေးခဲ့ရသည်။
Leave a Comments