Thursday, June 20, 2024

၂၀၂၃ ရွေးကောက်ပွဲ အတွက် အဆင်သင့် ဖြစ်နေပြီဟု ကျားဖြူပါတီ ဥက္ကဌပြော

Must read

လာမည့် ၂၀၂၃ ခုနှစ် သြဂုတ်လတွင် ကျင်းပပြုလုပ်မည့် ရွေးကောက်ပွဲအတွက် ရှမ်းတိုင်းရင်းသားများ ဒီမိုကရက်တစ် ပါတီ (SNDP) ကျားဖြူပါတီသည် အဆင်သင့် ဖြစ်နေကြောင်း ပါတီ ဥက္ကဌ ဖြစ်သူ လုံးစိုင်းအိုက်ပေါင်းက သျှမ်းသံတော်ဆင့်ကို ပြောသည်။

ပြီးခဲ့သည့် ရွေးကောက်ပွဲမှာ SNDP ပါတီ မဲဆွယ်စည်းရုံးစဥ်

“ကျနော်တို့က ဝင်ပြိုင်မှာပါ၊ ပြင်ဆင်ထားပြီးပါပြီ။ ထိုက်သင့်သလောက်လည်း အဆင်သင့် ဖြစ်နေပါပြီ၊ လာမယ့် ရွေးကောက်ပွဲမှာ ရလဒ်ကောင်းတွေ ဖော်ဆောင်နိုင်မယ်လို့လည်း ထင်ပါတယ်” ဟု လုံးစိုင်းအိုက်ပေါင်းက ပြောဆိုထားသည်။

အာဏာသိမ်း စစ်ကောင်စီမှ ခန့်အပ်ထားသည့် ပြည်ထောင်စု ရွေးကောက်ပွဲ ကော်မရှင်သည် လာမည့် ၂၀၂၃ ခုနှစ်တွင် ရွေးကောက်ပွဲကို ဒီဂျစ်တယ်မဲပေး စနစ်နှင့် ကျင်းပပြုလုပ်ရန် ပြင်ဆင်နေပြီး ကျားဖြူပါတီ အနေဖြင့် ဝင်ရောက်ယှဉ်ပြိုင်ရန် အဆင်သင့် ဖြစ်နေကြောင်း ၎င်းက ဆက်ပြောသည်။

ထို့အပြင် ကျားဖြူပါတီသည် နေရပ် မပြန်နိုင်သည့် တောင်ကြီးရောက် ကျောက်မဲမြို့နယ်ဘက်မှ စစ်ရှောင်ပြည်သူများကို ဟိုပုံးမြို့နယ်တွင် နေရာရရှိရေး ကြိုးစားဆောင်ရွက်ပေးမှုများလည်း ရှိသည့်အတွက် ရွေးကောက်ပွဲ ရလဒ်ကောင်း ဖော်ဆောင်နိုင်မည်ဟု ယုံကြည်ကြောင်း လုံးစိုင်းအိုက်ပေါင်းက ဆက်ပြောသည်။

“ကျနော်တို့ မနိုင်စဥ်မှာ ကျောက်မဲဘက်က စစ်ဘေးရှောင်တွေက တောင်ကြီးဘက်က ဘုန်းကြီးကျောင်းမှာ လ နဲ့ ချီပြီးတော့ နေနေကြရတယ်၊ နေရပ်ကိုလည်း မပြန်နိုင်ဘူး၊ ဆိုတော့ ကျနော်က သူတို့ကို ဒီ သျှမ်းပြည်တောင်ပိုင်း ဟိုပုံးမြို့နယ်မှာပဲ အခြေချ နေထိုင်ခွင့်ပြုပါလို့ အထက်ကို စာရေးပေးလိုက်တဲ့ အခါမှာ သူတို့က အဲ့နေရာမှာပဲ ရွာသစ် တည်နိုင်ခဲ့ပြီလေ၊ ဒါတောင် ကျနော်တို့က မနိုင်ခဲ့ဘူး ၊ မနိုင်ခဲ့ပေမယ့် သျှမ်းပြည်သူ လူထုရဲ့ အခက်အခဲ ကို အတတ်နိုင်ဆုံး ကြိုးစားပေးတာပေါ့နော်” ဟု ၎င်းက ပြောသည်။

ပြီးခဲ့သည့် ၂၀၁၀ ရွေးကောက်ပွဲတွင် ကျားဖြူပါတီသည် ပြည်နယ်ဝန်ကြီး ၆ ဦး နှင့် လွှတ်တော်ကိုယ်စားလှယ် ၅၈ ဦး အနိုင်ရရှိခဲ့သော်လည်း ၂၀၁၅ ရွေးကောက်ပွဲတွင် သျှမ်းပြည်တောင်ပိုင်း မိုင်းပန်မြို့နယ်ရှိ မဲဆန္ဒနယ် ၁ နေရာသာ အနိုင်ရခဲ့သည်။

လက်ရှိ အချိန်သည် မြန်မာနိုင်ငံအတွင်းရှိ နိုင်ငံရေးပါတီများက စစ်ကောင်စီ ကျင်းပမည့် ရွေးကောက်ပွဲတွင် လုံခြုံရေးဆိုင်ရာ ပြင်ဆင်မှု အပိုင်းများကို မေးခွန်းထုတ်နေကြသလို အမျိုးသား ညီညွတ်ရေး အစိုးရ (NUG) ကလည်း နစက ကျင်းပမည့် ရွေးကောက်ပွဲကို မပျက် ပျက်အောင် ဖျက်မည်ဟု ယာယီသမ္မတ ဒူဝါလရှီးလ က ပြောထားသည်။

Leave a Comments

- Advertisement -spot_img

Latest article