သျှမ်းပြည်အရှေ့ပိုင်း တာချီလိတ်မြို့ ဝိန်းကျောက်ရပ်ကွက်တွင်း အိမ်ခန်းငှားနေထိုင်သည့် အမျိုးသမီးငယ်တစ်ဦး နေအိမ်အတွင်း သေဆုံးနေကြောင်း စုံစမ်းသိရှိရသည်။
ယမန်နေ့ ဒီဇင်ဘာ (၄) ရက်နေ့က အသက် (၁၇) နှစ်အရွယ် နန်းအွန်ပင်းသည် သူမ ငှားရမ်းနေထိုင်သည့် အခန်းတွင်း ဦးနှောက်သွေးကြောပြတ် သေဆုံးခဲ့ကြောင်း ဦးလှမိုး တာချီလိတ် လူမှုကူညီရေးအသင်း က သျှမ်းသံတော်ဆင့် ကိုပြောသည်။
“သူ့အမျိုးတွေက သူ့ကို ဆက်သွယ်လို့ မရဘူးဆိုပြီး ကျနော်တို့ သွားကြည့်လိုက်တော့ ကုတင်ပေါ် သေဆုံးနေတယ်။ သူ့ရုပ်အလောင်းကို ပို့ဆောင်စစ်ဆေးတာကတော့ ဆရာဝန်တွေဆေးစစ်ချက်အရ ပြောတာက ဦးနှောက်သွေးကြောပြတ်တဲ့ ပုံစံနဲ့ သေဆုံးသွားတယ်လို့ ပြောတယ်။ ပြီးခဲ့တဲ့ ၂ ရက်လောက်ကလည်း သူ နေမကောင်းလို့ဆိုပြီး အပြင်ဆေးခန်းမှာ သွားပြတယ်လို့လည်း ပြောသံကြားရတယ်” ဟု ဦးလှမိုး တာချီလိတ် လူမှုကူညီရေးအသင်း တာဝန်ရှိသူ တစ်ဦး က သျှမ်းသံတော်ဆင့် ကိုပြောသည်။
အဆိုပါ အမျိုးသမီးသည် မိုင်းယောင်းမြို့ ဒေသခံဖြစ်ပြီး တာချီလိတ်မြို့ရှိ KTV ဆိုင် တစ်ဆိုင်တွင် အလုပ်လာလုပ်သည့် သူဖြစ်ကြောင်း သိရှိရသည်။
“ဆေးစစ်ချက်မှာတော့ မူးယစ်သောက်စားတာတွေတော့ မရှိဘူး။ သူက တာချီလိတ် ဒေသခံ မဟုတ်တော့ အခန်းငှားနေရင်း တစ်ယောက်တည်းနေတာ။ ဒီနေ့ နေ့လည်ပိုင်းမှာ သူ့ကို သင်္ဂြိုလ်နေပါပြီ။ သူ့မိဘတွေလည်း ရောက်လာတယ်” ဟု ဦးလှမိုး တာချီလိတ် လူမှုကူညီရေးအသင်း တာဝန်ရှိသူ တစ်ဦး ကပြောသည်။
တာချီလိတ်မြို့သည် ထိုင်း – မြန်မာ နယ်စပ်မြို့တစ်မြို့ဖြစ်ပြီး လောင်းကစားမျိုးစုံရှိခြင်း၊ KTV များ ပေါများရာနေရာဖြစ်ပြီး တခြားဒေသမှ လူငယ်များ အလုပ်လာရောက် လုပ်ကိုင်သည့် မြို့ တစ်မြို့ဖြစ်သည်။
Leave a Comments