Sunday, February 5, 2023

ပင်လုံတွင် ပိုက်ဆံချမ်းသာသည့် သူကိုပစ်မှတ်ထားပြီး ဖုန်းမှတဆင့် ခြိမ်းခြောက်ငွေတောင်း

Must read

သျှမ်းပြည်တောင်ပိုင်း ပင်လုံမြို့တွင် ပိုက်ဆံချမ်းသာသည့် သူများကို ပစ်မှတ်ထားပြီး ဖုန်းမှတဆင့် ခြိမ်းခြောက်ငွေတောင်းယူမှုများ ဆက်တိုက် ပြုလုပ်လာနေကြောင်း သတင်းရရှိသည်။

ပင်လုံမြို့

ဖုန်းမှ တဆင့် ခြိမ်းခြောက်ခံရသည့် သူများမှာ စီးပွားရေးလုပ်ငန်းရှင်များ၊ အိမ်ဆောက်ပစ္စည်းဆိုင်ခန်း ဖွင့်လှစ်သူများနှင့် ပိုက်ဆံချမ်းသာသည့်သူများ ဖြစ်သည်။

ထိုသူများကို အမည်မသိ အဖွဲ့အစည်းတစ်ဖွဲ့က ဖုန်းမှတဆင့် “ ပိုက်ဆံမပေးရင် ဒေါ်ညိုလို သတ်ပစ်မယ်” ဟုဆိုပြီး ခြိမ်းခြောက် ငွေတောင်းခံမှုများ ပြုလုပ်နေကြောင်း ပင်လုံဒေသခံ အသက် ၄၀ ကျော် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဖုန်းကနေတဆင့် ဆက်ပြီးခြိမ်းခြောက်တာရှိတယ်။ PDF ဆိုပြီး မြန်မာစာနဲ့ Viber ကနေပြီး ကျည်ဖိုး အလှူခံလာတာလည်း ရှိတယ်။ မပေးရင်လည်း ဒေါ်ညိုလို သေနတ်ပစ်သတ်မယ်ဆိုပြီး ခြိမ်းခြောက်တာ။ တချို့က သိန်း ၂၀၀ တောင်းတာခံရတယ်။ အချို့ကလည်း သိန်း ၂၀ ပေးလိုက်ရပြီလို့လည်း ပြောတယ် “ ဟု ၎င်း အမျိုးသမီးတစ်ဦးက ပြောသည်။

ပင်လုံမြို့တွင် ပြည်သူ့ကာကွယ်ရေး တပ်ဖွဲ့ PDF မရှိသည့်အတွက် အမည်မသိ အဖွဲ့အစည်းတပ်ဖွဲ့ PDF ဟုအမည်ခံပြီး ဖုန်းမှတစ်ဆင့် ဒေသခံများကို ခြိမ်းခြောက်ငွေတောင်းယူမှုများ လုပ်နေကြောင်း သိရသည်။

ထိုဒေသတွင် မြောက်ပိုင်းမဟာမိတ်တပ်ဖွဲ့၊ နားရိုင်း ပြည်သူ့စစ်၊ ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) နှင့် သျှမ်းပြည်ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) တို့ လှုပ်ခြားသော နယ်မြေဖြစ်ကြောင်း ပင်လုံဒေသခံ တစ်ဦးက ပြောသည်။

“ပင်လုံမှာ တစ်ယောက်ပြီး တစ်ယောက်ခံနေရတယ်။ အခု ခြိမ်းခြောက်ခံထားရတဲ့သူတွေလည်း မပြောရဲဘူး။ သူတို့ ပိုက်ဆံဘယ်လောက်ပါသွားပြီလို့ ပြောလိုက်ရင် တော်ကြာ ထပ်ခံရမှာဆိုတော့ ကြောက်တယ်လေ။ အခုဒီပြဿနာလည်း ဘယ်သူမှ မဖြေရှင်းပေးသေးဘူး။ အဲ့ဒီ ခြိမ်းခြောက်ငွေတောင်းနေတဲ့ အဖွဲ့ကိုလည်း မဖမ်းမိ သေးဘူး “ ဟု ပင်လုံဒေသခံတစ်ဦးက ပြောသည်။

ထို့အပြင် ပိုက်ဆံချမ်းသာပြီး ဆိုင်ခန်းဖွင့်လှစ်သူများမှာ ယခုတွင် ကြေညာဆိုင်းဘုတ်ကို မတပ်ရဲတော့ဘဲ ယာယီ ဖြုတ်ထားရသလို ဖုန်းနံပါတ် ပြောင်းလဲခြင်း၊ တခြားဒေသသို့ ထွက်ပြေးခိုလှုံရခြင်း စသည်ဖြင့် လုံခြုံရေးကို စိုးရိမ်နေရကြောင်း သိရသည်။

“ အခု ပိုက်ဆံချမ်းသာတဲ့သူတွေ သူတို့ဆိုင်ခန်းရဲ့ ဆိုင်းဘုတ်တွေမတပ်ရဲတော့ဘူး။ ဆိုင်းဘတ်မှာ ဖုန်းနံပါတ် ပါတော့ သူတို့ အဲ့ဖုန်းနံပါတ်ကအတိုင်း ဆက်လာတယ်လေ။ အခု ဆိုင်းဘုတ်ဖြတ်ထားတဲ့ ဆိုင်ခန်းတွေ ၄ ဆိုင် လောက်ရှိတယ်။ တချို့က ဖုန်းနံပါတ်ကို ပြောင်းလိုက်ရတာ၊ အခြားဒေသကို သွားခိုလှုံရတဲ့ထိ ဖြစ်နေတယ် “ ဟု ၎င်းက ဆက်ပြောသည်။

လင်ရှိ ပင်လုံဒေသခံများသည် နေ့ဘက်မှာ ကြောက်စိတ်ဖြင့် သွားလာနေရပြီး ညနေစောင်း အမှောင်ဝင်လာပြီဆို လျှင် အိမ်ပြင်သို့ မထွက်ရဲကြတော့ကြောင်း သိရသည်။

ပြီးခဲ့သည့် အောက်တိုဘာ ၃၀ ရက်တွင် ပင်လုံမြို့ စက်သုံးဆီပိုင်ရှင် အမျိုးသမီးတစ်ဦးကို အမည်မသိ အမျိုးသားတစ်ဦးက ကားဖြင့်ခေါ်ဆောင်သွားပြီး ပိုက်ဆံ ကျပ်သိန်း ၅၀၀ တောင်းယူရာ မပေးနိုင်သဖြင့် သေနတ်ဖြင့် ပစ်သတ်ခဲ့ကြောင်း သိရသည်။

Leave a Comments

- Advertisement -spot_img

Latest article