မန္တလေး – မူဆယ် ပြည်ထောင်စု ကားလမ်းမကြား လက်နက်ကိုင်တပ်ဖွဲ့များ အဆမတန်အခွန် ကောက်ခံနေခြင်းကြောင့် ကုန်တင်ကားကြီး မောင်းနှင်သူများ အခက်အခဲ ကြုံတွေ့နေရကြောင်း စုံစမ်းသိရသည်။

မန္တလေး မှ နမ့်ခမ်းသို့ ကုန်တင်သွားလာသည့် ကုန်တင်ကားကြီးများမှာ ၁၀၅ မိုင်တွင် စစ်ကောင်စီ၏ လက်အောက်ခံ ရဲတပ်ဖွဲ့၊ သစ်တော ဦးစီးဌာန ၊ လ၀က ၊ အကောက်ခွန်ဦးစီးဌာန၊ ဆရဖ နှင့် ကုန်းလမ်းပို့ဆောင်ဆက်သွယ်ရေး ဦးစီးဌာန တို့ကို အခွန်ဆောင်ရကြောင်း နမ့်ခမ်းဒေသခံ ကုန်တင်ကား မောင်းနှင်သူတစ်ဦးက သျှမ်းသံတော်ဆင့်ကို ပြောသည်။

ထို့အပြင် တိုင်းရင်းသား လက်နက်ကိုင်တပ်ဖွဲ့ ဖြစ်သည့် TNLA ၊ KIA နှင့် SSPP တို့ကိုလည်း ထပ်မံ အခွန်ဆောင်ရကြောင်း ကုန်တင်ကား မောင်းနှင်သူ တစ်ဦး ကပြောသည်။

“တစ်ခါတက်ရင် တစ်ခါဆောင်ရတယ်၊ တစ်ခါဆင်းရင် တစ်ခါဆောင်ရတယ်ဗျ။ ၁၀၅ မိုင်ဆိုရင် စစ်ကောင်စီကို အခွန်ဆောင်ပြီး တံဆိပ်ရိုက်ရတယ်။ သူတို့က ပြေစာပေးတယ် ပြေစာကြေးလည်း (ငါးထောင်) ကျပ် ထပ်ပေးရတယ်။ အဓိကတော့ ၁၂ ဘီး နဲ့ ၂၂ ဘီး ကုန်တင်ကားကြီးတွေပေါ့။ TNLA ကို ၆ သိန်း ၅ သောင်း၊ KIA ကို ၈ သိန်း ၅ သောင်း၊ SSPP ဆိုရင် ၈ သိန်းဆိုပြီး အခွန်ဆောင်ရတယ် “ ဟု ၎င်း အမျိုးသားတစ်ဦးက ပြောသည်။

ကချင်လွှတ်လပ်ရေး တပ်မတော် KIA ကို မော်တောင်းတွင် အခွန်ဆောင်ရပြီး သျှမ်းပြည်တိုးတက်ရေးပါတီ၊သျှမ်းပြည်တပ်မတော် SSPP ကို ကျင်စန်းကျော့တွင် အခွန်ဆောင်ရကြောင်း တအာင်း (ပလောင်) အမျိုးသား လွတ်မြောက်ရေးတပ်မတော် TNLA သည် ၁၀၅ မိုင် နှင့် မူဆယ်မြို့တွင်း အခွန်ဆောင်ရကြောင်း သိရသည်။

အခွန်ကောက်ခံရခြင်းနှင့် ပတ်သက်၍ SSPP ပြန်ကြားရေးတာဝန်ခံ ဗိုလ်မှူး ဖုန်းဟန်၊ TNLA ပြန်ကြားရေးတာဝန်ခံ တာဘုန်းကျော် နှင့် KIA ပြန်ကြားရေး တာဝန်ခံ ဗိုလ်မှူးကြီး နော်ဘူ တို့ကို သျှမ်းသံတော်ဆင့်မှ ဆက်သွယ်မေးမြန်းခဲ့သော်လည်း ဖုန်းလက်ခံ ဖြေကြားခြင်း မရှိကြောင်း သိရသည်။

“ ကျနော်တို့ ကုန်တင်ကားကြီး အရမ်းခက်ခဲလာတယ်။ အခွန်မဆောင်ရင် ကားထွက်လို့ မရဘူး။ စစ်တပ်ကို အခွန်ဆောင်ပြီးရင် တိုင်းရင်းသားလက်နက်ကိုင်ကို အခွန်ထပ်ဆောင်ရတယ်။ ကုန်တင်တာက ဘယ်လောက်မှ မရဘူး၊ အခွန်ကိုဆောင်နေရတာတွေ များတယ် “ ဟု မန္တလေး – မူဆယ် ကုန်တင်ကား မောင်းနှင်နေသော အသက် ၃၀ နှစ် အမျိုးသားတစ်ဦးက ပြောသည်။

ထို့အပြင် မူဆယ်မြို့နယ်အတွင်းရှိ ဘဏ်များ၊ ကုမ္ပဏီများ၊ စီးပွားရေး လုပ်ငန်းရှင်များ အပြင် လက်ရှိ တစ်ပိုင်တစ်နိုင် အိမ်ဆိုင် ဖွင့်လှစ်ထားသော ဈေးသည်များကိုလည်း တိုင်းရင်းသား လက်နက်ကိုင်များက အခွန်တိုးကောက် လာကြောင်းသိရသည်။