သျှမ်းပြည်မြောက်ပိုင်း ကျောက်မဲမြို့နယ် ကုန်းသာကျေးရွာတွင် ပြုလုပ်သည့် ၂၁၁၇ သျှမ်းနှစ်သစ်ကူးပွဲတော်တွင် လောင်းကစားဝိုင်းများ ပါဝင်ကြောင်း သတင်းရရှိသည်။

ပြီးခဲ့သည့် နိုဝင်ဘာ ၂၄ ရက်မှစပြီး လက်ရှိအချိန်ထိ ကုန်းသာကျေးရွာထဲတွင် သျှမ်းနှစ်သစ်ကူးပွဲ ပြုလုပ်နေပြီး လောင်းကစားပါရှိကြောင်း ကျောက်မဲ ဒေသခံအမျိုးသား တစ်ဦးက သျှမ်းသံတော်ဆင့်ကိုပြောသည်။

“ သူတို့ သျှမ်းနှစ်သစ်ကူးနဲ့ပွဲထဲမှာ လောင်းကစားဝိုင်းတွေထည့်ပြီးလုပ်နေတာ။ အခုထိလည်း လုပ်နေသေးတယ်။ သူတို့လောင်းကစားဝိုင်းက အရင်က တစ်နေရာဖွင့်နေတာ။ ပြီးမှ ကုန်းသာက သျှမ်းနှစ်သစ်ကူးပွဲမှ ပြောင်းလာပြီး ဖွင့်ပေးတာ” ဟု ကျောက်မဲမြို့ ဒေသခံ အမျိုးသားတစ်ဦးက ပြောသည်။

ထိုသို့ ကျောက်မဲမြို့ နယ်တွင် လောင်းကစားဝိုင်းဖွင့်လှစ်ခြင်းသည် မဖြစ်သင့်ကြောင်း၊ ရိုးရာပွဲဖြစ်သောကြောင့် လောင်းကစားပွဲ မပါဝင်သင့်ကြောင်း ကျောက်မဲမြို့ ဒေသခံ အမျိုးသားတစ်ဦးက ပြောသည်။

“သူတို့ ရိုးရာပွဲမှာ လောင်းကစားလာဖွင့်တာတော့ မကောင်းဘူးလေ။ သူတို့ ဘုရားပွဲတွေမှာ ဖွင့်တာတော့ ဘာမှ မပြောလိုပါဘူး။ အခုက ကျနော်တို့ သျှမ်းရိုးရာပွဲမှာ လာဖွင့်တော့ ဒါက ကောင်းတဲ့ ဓလေ့ မဟုတ်ဘူး” ဟု ၎င်းက ပြောသည်။

အဆိုပါ သျှမ်းနှစ်သစ်ကူးပွဲတော် ပြုလုပ်ရန်အတွက် ကျောက်မဲမြို့ သျှမ်းစာပေ နှင့် ယဉ်ကျေးမှု ဥက္ကဌက ခွင့်ပြုပေးခဲ့ပြီး လောင်းကစားဖွင့်လှစ်ရန်အတွက် ခွင့်မပြုထားကြောင်း သိရသည်။

ထိုသို့ လောင်းကစားဖွင့်လှစ်ခြင်းကို ယခုကာလအနေဖြင့် အရေးယူဆောင်ရွက်ရန် ခက်ခဲသောကြောင့် ပြုလုပ်သူများသည် မိမိအသိစိတ်ရှိသင့်ကြောင်း ယခုလို ရိုးရာပွဲမှာ လောင်းကစားဝိုင်း ပြုလုပ်သောကြောင့် ဆိုးကျိုးအများကြီးရှိကြောင်း ပြောသည်။

“ ကျနော်တော့ ပွဲလုပ်ဖို့ ခွင့်ပြုထားတယ်။ လောင်းကစားဝိုင်းတော့မပါခိုင်းဘူး။ မြို့ပေါ်မှာတော့ ကျနော်တို့တားထားတယ်။ ဒီလိုမျိုး ရိုးရာပွဲမှာ လောင်းကစား လာလုပ်တာဟာ ဆိုးကျိုးတွေပဲရှိတယ်။ အခုလို စီးပွားရေး မကောင်းတဲ့ချိန် လောင်းကစားလုပ်ကြတော့ ပိုပြီးဆင်းရဲကြတယ်။ ကိုယ်မကောင်းတာလုပ်ရင်တော့ မကောင်းတဲ့ အကျိုးတွေ ကိုပဲခံစားရမယ်။ အခုလို ခေတ်ကာလနဲ့ကလည်း အရေးယူဆောင်ရွက်ဖို့ကလည်း ခက်တယ်” ဟု ကျောက်မဲမြို့ သျှမ်းစာပေ နှင့် ယဉ်ကျေးမှု ဥက္ကဌက ပြောသည်။

အဆိုပါ လောင်းကစားဝိုင်းကို ကျောက်မဲမြို့နယ် ခိုမုန်းကျေးရွာအုပ်စု တောင်နောက်ကျေးရွာနေ ဦးဝင်းထွန်းက ဦးဆောင်ပြီး လုပ်ဆောင်ပေးနေကြောင်း ဒေသခံ ပြောပြချက်အရ သိရသည်။

ထို ဦးဝင်းထွန်းသည် တိုင်းရင်းသား လက်နက်ကိုင်များကိုလည်း ၁ လကို သိန်း ၁၅၀ ထိ အခွန်ဆောင်ပေးပြီး ဌာနဆိုင်ရာ မြို့နယ်များကိုလည်း တစ်ရက်ကို ၂ သိန်း မှ ၃ သိန်းထိ အခွန်ပေးဆောင်ရကြောင်း သိရသည်။

“ သူက TNLA ၊ SSPP/SSA တွေကိုကော အခွန်ပေးပြီးဖွင့်တာ။ ၁ လကို သိန်း ၁၅၀ ပေးရတယ်တဲ့။ သူက ကျောက်မဲမြို့နယ် ထဲပဲနေတာ။ ပြီးတော့ မြို့နယ်က ဌာနဆိုင်ရာတွေကိုလည်း တစ်ရက် ၃ သိန်းလောက်ထိ အခွန်ဆောင် ရတယ်တဲ့” ဟု ဒေသခံ အမျိုးသားတစ်ဦးက ပြောသည်။

စစ်အာဏာသိမ်းပြီး နောက်ပိုင်း သျှမ်းပြည်အတွင်းရှိ ဘုရားထီးတင်ပွဲ အပါအဝင် နေရာအနှံ့ လောင်းကစားဝိုင်းများ ထည့်သွင်းလာကြသည်။

ထိုလောင်းကစားဝိုင်း ထည့်သွင်းသည့်ကိစ္စကို သက်ဆိုင်ရာ အာဏာပိုင်များ၊ နယ်မြေလှုပ်ရှားနေသည့် လက်နက်ကိုင်များ ကလည်း အခွန်ရရှိမှုကြောင့် တရားဝင်ခွင့်ပြုနေကြောင်း သိရသည်။