သျှမ်းပြည်မြောက်ပိုင်း သီပေါမြို့ နယ်မြေ (၁) မြန်မာရပ်ကွက်တွင် နေထိုင်သည့် အသက် ၂၂ အရွယ် အမျိုးသမီးတစ်ဦး ပျောက်ဆုံးနေသည်မှာ တစ်လနီးပါးကြာပျောက်ဆုံးနေပြီး သတင်းမကြားရသေးကြောင်း စုံစမ်းသိရသည်။
ပျောက်ဆုံးနေသည့် အသက် ၂၂ နှစ်အရွယ်ရှိ မဆောင်းဟေမာန်ငြိမ်းဆိုသူဖြစ်ပြီး ယခုလ (နိုဝင်ဘာ ၅ ရက်) တွင် ကားအမဲရောင်တစ်စီးဖြင့် အမည်မသိ အမျိုးသား ၃ ဦးက ခေါ်ဆောင်သွားခဲ့ကြောင်း ၎င်းမိဘဖြစ်သူက သျှမ်းသံတော်ဆင့်ကို ပြောသည်။
“ သမီးကို ပြန်မတွေ့သေးဘူး၊ အခုချိန်ထိ ဘာအဆက်အသွယ်မှ မရဘူးရှင့်။ ယောကျ်ားနောက် လိုက်ပြေးနေတာလား ဘာညာ စုံစမ်းတော့ အဲ့လိုလည်း မဟုတ်ပြန်ဘူး။ သမီးလေးနဲ့ ပြန်တွေ့ချင်တာထက် အကျိုးအကြောင်း ဘာဖြစ်သွားတာလဲ၊ ဘယ်လိုနေလဲ ဆိုတာကို သိချင်ပါတယ် “ ဟု ၎င်းမိဘဖြစ်သူက ပြောသည်။
လက်ရှိ မဆောင်းဟေမာန်ငြိမ်း ပျောက်ဆုံးမှုနှင့်ပတ်သက်ပြီး ရဲစခန်းကို တိုင်ကြားထားသော်လည်း တစုံတရာမှ မထူးခြားလာသေးပေ။
အောက်တိုဘာ ၃၀ ရက်နေ့က မန္တလေးဘက်သို့ အလုပ်လုပ်ရန်သွားရာမှ နေအိမ်တစ်လုံးထဲတွင် ပိတ်လှောင်ခံခဲ့ရပြီးနောက် ပြန်လည် လွှတ်မြောက်လာခဲ့သူ မဆောင်းဟေမာန်ငြိမ်းမှာ ယခုလ (နိုဝင်ဘာ ၅ ရက်) တွင် အမျိုးသား ၃ ဦးက ထပ်မံခေါ် ဆောင်သွားခဲ့သည်။
“ မန္တလေးမှာ တစ်ခါ ပြန်လွှတ်လာတုန်းက သမီးကပြန်ပြောတယ်။ အမျိုးသား ၃ ယောက်တဲ့၊ အသက်ကတော့ နည်းနည်းကြီးပြီ မျက်မှန်အမဲရောင်တပ်ထားပြီး သူ့ကိုနေအိမ်တစ်လုံးထဲမှာ ပိတ်လှောင်ထားတယ်တဲ့။ အခု သူပျောက်သွားတုန်းကလည်း သူနဲ့အတူလိုက်သွားတဲ့ကလေးက ပြန်လာပြောပြတယ်။ မျက်မှန်အမဲရောင် တပ်ထားတဲ့ ဦးလေး ၃ ယောက်တဲ့ အစ်မကို ခေါ်သွားတယ် “ ဟု ၎င်း မိဘဖြစ်သူက ထပ်လောင်းပြောသည်။
ထို့အပြင် မဆောင်းဟေမာန်ငြိမ်းကို မည်သူမဆို တွေ့ရှိပါက ၎င်းမိဘများထံသို့ အကြောင်းကြား ပေးလိုစေကြောင်းနှင့် သက်ဆိုင်ရာ ရဲတပ်ဖွဲ့များကို တိုင်ကြားထားခြင်း ပြုလုပ်ပေးစေလိုကြောင်း ၎င်းကမိဘအသိုင်းအဝိုင်းများက တောင်းဆိုထားသည်။
