Saturday, December 3, 2022

မိုးမိတ်မြို့နယ်စစ်ကောင်စီ တိုက်လေယာဥ်လှည့် ဒေသခံတချို့ ကြိုတင် စစ်ရှောင်ရ

Must read

သျှမ်းပြည် မြောက်ပိုင်း မိုးမိတ်မြို့နယ် အတွင်း စစ်ကောင်စီတပ်ဖွဲ့မှ တိုက်လေယာဥ် ၅ စီးဖြင့် ကင်းလှည့်ခဲ့ရာ အနီးပတ်ဝန်းကျင်ရှိ ဒေသခံအချို့ ကြိုတင်စစ်ရှောင်ခဲ့ရကြောင်း သတင်းသိရသည်။

မိုးမိတ်မြို့

ယမန်နေ့ နိုဝင်ဘာလ ၂၃ ရက်နေ့ မနက် ၁၀ နာရီမှစတင်ကာ မိုးမိတ်မြို့ နယ် အတွင်း အုန်းကြောကျေးရွာအုပ်စု အနီးတဝှိက် စစ်ကောင်စီမှ တိုက်လေယာဥ် ၅စီးဖြင့် ၁ နာရီကြာအောင် ကင်းလှည့်ခဲ့ရာ လွယ်မောက်ရွာခံများက ပန်ဆားဆေးကျေးရွာသို့ ကြိုတင် စစ်ရှောင်ခဲ့ရကြောင်း ဒေသခံများက ပြောသည်။

ထိုစစ်ကောင်စီ တိုက်လေယာဥ်ဖြင့်ကင်းလှည့်သည့်တောင်ကြောတလျောက်တွင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်စခန်းတည်ရှိသည့်နေရာြဖစ်သည်။

“စစ်တပ် တိုက်ရဟတ်ယာဥ်လာလှည့်တဲ့အတွက် လွယ်မောက်ရွာခံ ၅၀ ကျော်လောက်က ပန်ဆားဆေးရွာ ဘုန်းကြီး ကျောင်းနဲ့ စာသင်ကျောင်းတွေ ၊ တချို့လည်း အမျိုးတွေရှိတဲ့ အိမ်တွေဆီကို ကြိုတင်စစ်ရှောင် သွားကြတယ်၊ ဒီနေ့လည်း ပုန်ကန်ရွာ (မိုးဘုံရွာ)ကနေ စစ်ကား သုံးစီး လွယ်မောက်ဘက် တက်သွားတယ်” ဟု အမည်မဖော်လိုသူ အသက် ၄၀ ဝန်းကျင် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီဘက်မှ လေယာဥ်ဖြင့် လွယ်မောက်ဘက် ကင်းလှည့်ပတ်မှုအပြီး မိုးမိတ်မြို့နယ်ရှိ ပုန်ကန်ရွာ (မိုးဘုံရွာ)၊ ပန်ဆားဆေးရွာ နှင့် တခြားအနီးပတ်ဝန်းကျင်ရှိ ရွာတို့မှ စာသင်ကျောင်းများလည်း ကျောင်းဆင်း ချိန်မတိုင်မီ ကလေးများကို ကျောင်းဆင်းခွင့်ပေးလိုက်ရကြောင်း သိရသည်။

“မွန်းလွဲပိုင်းရောက်တော့ ပန်ဆားဆေးကို စစ်ရှောင်တွေ ရောက်လာတယ်ဆိုတဲ့ သတင်းကြားလို့ ကျောင်းတွေ လည်း စောဆင်းပေးတယ်၊ စစ်တပ်လေယာဥ်လို့ ပြောတာနဲ့ ကြောက်ကြရတယ်လေ၊ တချို့တွေဆို ကတုတ် ကျင်းထဲ ဝင်ဖို့တောင် ပြင်ဆင်ထားတယ်” ဟု ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

ယနေ့ နိုဝင်ဘာလ ၂၄ ရက်နေ့အထိ တိုက်ပွဲသံများ မထွက်လာသေးသော်လည်း စစ်ကောင်စီဘက်မှ စစ်ကြောင်း လှုပ်ရှားမှုများ ရှိနေသဖြင့် စစ်ရှောင်ပြည်သူများနေရပ်မပြန်သေးသလို ဒေသခံများလည်း စစ်ရေးပြင်းထန်လာမှာကို စိုးရိမ်နေကြောင်းသိရသည်။

ပြီးခဲ့သည့် စက်တင်ဘာလ အတွင်းမှာလည်း အာဏာသိမ်း စစ်ကောင်စီ တပ်ဖွဲ့နှင့် SSPP/SSA တပ်ဖွဲ့တို့သည် မိုးမိတ်မြို့နယ် ဟွေခမ်းတောကြောတွင် တိုက်ပွဲပြင်းထန်ခဲ့ဖူးသည်။

မိုးမိတ်မြို့နယ်အတွင်း SSPP/SSA တို့ တပ်ဖွဲ့နှင့် တိုက်ပွဲဖြစ်ပွားသည့် အာဏာသိမ်း စစ်ကောင်စီတပ်ဖွဲ့သည် မိုးမိတ်မြို့ အခြေစိုက် စစ်ကောင်စီ တပ်လက်အောက်ခံ ခလရ (၂၂၃)၊ (၂၇၆) နှင့် ခမရ (၃၄၈) တို့ ဖြစ်ကြသည်။

Leave a Comments

- Advertisement -spot_img

Latest article