သျှမ်းပြည်မြောက်ပိုင်း ကျောက်မဲမြို့နယ်တွင် ကားလမ်းမကြီးဘေးတွင် မွေးမြူရေးပျားအုံ ထားရှိမှုကြောင့် ခရီးသွားများ အန္တရာယ်ရှိနေကြောင်း သတင်းသိရသည်။
ပြီးခဲ့သည့် နိုဝင်ဘာလ ၁၀ ရက်တွင် ကျောက်မဲ့မြို့ အမှတ် ၁ရပ်ကွက် ချယ်ရီမြို့ပတ်လမ်းမကြီးဘေးတွင် မွေးမြူရေး ပျားအုံပုံးများကို ၁၂ ဘီးကားတစ်စီးဖြင့် လာရောက်ချထားပြီးနောက် ခရီးသွားများကို ပျားတုပ်မှုဖြစ်စဥ် မကြာခဏ ဖြစ်ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“သူတို့လာချတဲ့နေ့ကတည်း အုပ်ချုပ်ရေးမှူးကိုရော နယ်မြေမှူးကိုရော ပြောထားပြီ၊ လာကြည့်ပေးမယ်လို့ ပြော ပြီး အခုထိ ဘာမှမလုပ်ပေးသေးဘူး၊ ပျားအုံပုံးတွေက လမ်းနဲ့ အရမ်းနီးနေတော့ ပျားတုပ်ပြီး ဆိုင်ကယ်လဲတဲ့ ပြည်သူတွေ ၃ ယောက်ရှိနေပြီ” ဟု ၎င်း အမျိုးသားက ပြောသည်။
အဆိုပါ မွေးမြူရေး ပျားအုံပုံးများကြောင့် ဆိုင်ကယ်မောင်းနှင်သည့် အမျိုးသား ၃ ဦး ပျားတုပ်ခံရပြီး ဆိုင်ကယ် မှောက်ကာ ပွန်းပဲ့ဒဏ်ရာများ ရရှိသွားခဲ့ရကြောင်း၊ ကားမှန် ချထားသည့် လမ်းသွားလမ်းလာကားသမားများလည်း ပျားတုပ်ခံရမှုမကြာခဏ ကြုံတွေ့ ရကြောင် ၎င်းလမ်းကိုအသုံးပြုသည့် အမျိုးသားတစ်ဦးက ပြောသည်။
“အခုချိန်က ရဲစခန်းရှေ့လမ်းက ပိတ်ထားတော့ မနက်ကနေ ညနေအထိ ပြည်သူတွေက ဒီလမ်းကိုပဲ အသုံးပြုတာ များတယ်၊ ကားသမားတွေလည်း ပျားတုပ်ခံရတော့ အက်စီးဒန့်ဖြစ်မှာကို ကြောက်တယ်” ဟု ၎င်းက ဆိုသည်။
ယင်းပျားမွေးမြူရေး လုပ်ဆောင်သည့် မြေနေရာသည် အစိုးရပိုင်မြေ အဖြစ် သတ်မှတ်ထားသည့် နေရာဖြစ်ပြီး အုတ်ကျင်း – ပြိန်းနင် လမ်းကြောင်းဖြစ်ကြောင်းလည်း သတင်းသိရသည်။
ယခင် ကျောက်မဲမြို့ မြို့ပြင်ရှိ လားရှိုး – မန္တလေး လမ်းမကြီးဘေးတစ်လျှောက်မှာလည်း ပျားမွေး လေ့ရှိကြောင်း ဒေသခံ တစ်ဦးထံမှ သတင်းသိရသည်။
ပြီးခဲ့သည့် ၂၀၂၁ ခုနှစ်အတွင်းမှာလည်း နောင်ချိုမြို့နှင့် ကျောက်မဲမြို့နယ်တို့တွင် ပျားအုံပေါင်း ၁၀၀ ကျော် ဖျက်ဆီးခံခဲ့ရသည့် ဖြစ်စဥ် ဖြစ်ပွားခဲ့သည်။
