သျှမ်းပြည်တောင်ပိုင်း တောင်ကြီးမြို့ ရပ်ကွက် အုပ်ချုပ်ရေးမှူးနေရာသစ်ကို စစ်ကောင်စီ တပ်ထွက်များ ခန့်အပ်လိုက်ကြောင်း သိရသည်။
တောင်ကြီးမြို့ ဘုရားဖြူရပ်ကွက်၊ စဝ်စံထွန်းရပ်ကွက်နှင့် ရေးအေးကွင်းရပ်ကွက်များတွင် ယခုလ ( နိုဝင်ဘာလ) အတွင်းမှ စတင်ပြီး စစ်ကောင်စီ တပ်ထွက်များကို ရပ်ကွက် အုပ်ချုပ်ရေးမှုးအသစ်အနေဖြင့် ခန်ံအပ်လိုက်ကြောင်း တောင်ကြီးဒေသခံများက သျှမ်းသံတော်ဆင့်ကို ပြောသည်။
ထို့ပြင် ကျန်ရှိနေသည့် ရပ်ကွက်အုပ်ချုပ်ရေးမှူးနေရာများကိုလည်း အမြန်ဆုံးခန့်အပ်နိုင်ရန် စစ်ကောင်စီက ကြိုးစားနေသည်။
ထိုကဲ့သို့ ပြုလုပ်ခြင်းသည် အာဏာသိမ်းစစ်ကောင်စီ ဦးဆောင်ကျင်းပမည့် ၂၀၂၃ ခုနစ်ရွေးကောက်ပွဲအတွင် ပြင်ဆင်နေခြင်းဖြစ်ကြောင်း တောင်ကြီး ဒေသခံများ ပြောပြချက်အရသိရသည်။
“ တချို့ရပ်ကွက်အုပ်ချုပ်ရေးမှူးနေရာတွေမှာတော့ တပ်ထွက် က ဗိုလ်ကြီး၊ ဗိုလ်မှူးတွေကိုခန့်ထားတယ်။ ကျန်တဲ့နေရာတွေ ကိုလည်း ဆက်ခန့်ဖို့ရှိတယ်။ လာမယ့်ရွေးကောက်ပွဲ အတွက် အရမ်းကိုပြင်ဆင်နေတဲ့သဘောပဲ” ဦးကြီးခမ်းရပ်ကွက်မှ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
တောင်ကြီးမြို့တွင် ရပ်ကွက် ၂၂ ခုရှိသည့်အနက် လက်ရှိ ရပ်ကွက် ၃ မှာ ပထမအကြိမ် အနေဖြင့် စတင်ပြီး အပြောင်းအလဲ ပြုလုပ်နေပြီး ကျန်တဲ့ ရပ်ကွက်များကိုလည်း နောက်လ ဒီဇင်ဘာလအတွင်းမှာ အပြီးအစီး အစားထိုးခန့်ရန် ပြုလုပ်သွားမည် ဖြစ်ကြောင်းသိရသည်။
“ စစ်တပ်ထွက်က ဘယ်လောက်လုပ်နိုင်မှာလဲ၊ ပြည်သူတွေမှ သူတို့မပိုင်ရင် ဘာလုပ်နိုင်မှာလဲ” ဟု ဒေသခံအမျိုးသားက ဆိုပါတယ်။
စစ်ကောင်စီဘက်မှ လာမည့် ၂၀၂၃ ခုနှစ် သြဂုတ်လတွင်းမှာ ရွေးကောက်ပွဲပြုလုပ်သွားမည်ဟု ကြေညာ ထားသော်လည်း စစ်တပ်မှ ပြုလုပ်သောရွေးကောက်ပွဲနှင့် မဲစာရင်းများကို အသိအမှတ် မပြုကြောင်း တောင်ကြီးဒေသခံများက ဆိုသည်။
“ ကျနော်တို့ တောင်ကြီးသားတွေက သူတို့ကို မဲပေးမှာမဟုတ်ဘူး။ သူတို့ပြုလုပ်ရွေးကောက်ပွဲလည်း အသိအမှတ် မပြုဘူး၊ သွားပူးပေါင်းမှာလည်း မဟုတ်ဘူး။ ကျနော်နဲ့ နီးစပ်တဲ့ ဆွေမျိုး၊ အသိုင်းအဝိုင်း၊ သူငယ်ချင်း၊ မိတ်ဆွေ တွေလည်း သူတို့ကိုမထောက်ခံမှာ မဟုတ်ဘူး။ လူထုရဲ့အား မပါဘဲနဲ့ စစ်တပ်ကဘယ်လိုဘဲလုပ်လုပ် ရှုံးမှာက ရှုံးမှာဘဲ “ ဟု ၎င်းဆက်ပြောသည်။
အာဏာသိမ်း စစ်ကောင်စီသည် စက်တင်ဘာလ ၂ ရက်မှစပြီး စစ်ကြောင်း ၅ ကြောင်းဖြင့် ပင်းတယ၊ ရွာငံ၊ ညောင်ရွေ နှင့် ရပ်စောက် ဒေသတွင် အခမ်းအနားဖြင့် ကျေးရွောဒေသခံ ပြည်သူများကို ခေါ်ယူပြီး ၂၀၂၃ ခုနှစ် ရွေးကောက်ပွဲအတွက် စစ်တပ်ကို ထောက်ခံရန်လိုက်လံ စည်းရုံးခဲ့ဖူးကြောင်း သိရသည်။
Leave a Comments