သျှမ်းပြည်တောင်ပိုင်း ပင်လုံမြို့တွင် ပြည်သူ့ကာကွယ်ရေးတပ်ဖွဲ့ PDF နာမည်ဖြင့် ပြည်သူ့ များ၏ Viber မှတဆင့် ငွေလိမ်လည်တောင်းမှုများ ရှိနေကြောင်း စုံစမ်းသိရသည်။
ပင်လုံတွင် ပြီးခဲ့သည့် အောက်တိုဘာလ ၃၁ ရက်တွင် ဒေါ်ညို ပြန်ပေးဆွဲခံရပြီး သေနတ်ပစ်သတ်ခံရသည့်နောက် ယခုလ (နိုဝင်ဘာလ) အတွင်းတွင် ပြည်သူ့ကာကွယ်ရေးတပ်ဖွဲ့ PDF နာမည်ဖြင့် ပြည်သူများ၏ Viber နံပတ် မှတဆင့် ငွေလိမ်လည်တောင်းမှုများ ရှိနေကြောင်း ပင်လုံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ပင်လုံ ရပ်ကွက် ၃ က အိမ်ဆောက်ပစ္စည်းရောင်းတစ်ယောက် ခံရတယ်။ ပိုက်ဆံ သိန်း ၂၀ လောက်ပါသွား တယ်လို့ ပြောတယ်။ သူ့ Viber ကနေပြီးတော့ ကျည်ဆံပုံ၊ လူနာမည်၊ လုပ်ငန်း၊ လမ်း၊ အိမ်နံပါတ်တွေ အတိတကျရေးသားပြီး ပို့လာတယ်။ ခြိမ်းခြောက်ပြီး ငွေတောင်းတယ်။ သူတို့နဲ့ ဆွေးနွေးပြီး ပိုက်ဆံမပေးရင် ဒေါ်ညိုလို ဖမ်းဆီးပြီးသတ်ဖြတ်မယ်လို့ ခြိမ်းခြောက်တယ် “ ဟု ၎င်းဒေသခံတစ်ဦးက ပြောသည်။
အဆိုပါ ခြိမ်းခြောက်ပြီး ငွေတောင်းယူမှု သတင်းနှင့်ပတ်သတ်၍ ပင်လုံဒေသခံများက လုံခြုံရေးအတွက် စိုးရိမ်နေရကြကြောင်း သိရသည်။
“ ပင်လုံမှာ ဒေါ်ညိုပြန်ပေးဆွဲခံရပြီး သေနတ်ပစ်ခတ်ခံရကတည်းက အားလုံးကြောက်လန့်နေကြတယ်။ အခုလည်း Viber ကနေ ခြိမ်းခြောက်ခံရတဲ့သူ၊ ဖုန်းဆက်ပြီး ခြိမ်းခြောက်ခံရသူတွေ အရမ်းများနေတယ်။ ဒီသတင်းနဲ့ ပတ်သတ်ပြီးတော့ ဘယ်သူမှအင်တာဗျူး မခံချင်ဘူး။ လုံခြုံရေးအတွက်လည်း စိုးရိမ်ရသေးတယ် “ ဟု ပင်လုံဒေသခံအမျိုးသမီး တစ်ဦးက ပြောသည်။
စစ်အာဏာသိမ်းပြီးနောက်ပိုင်း ပြည်သူများသည် စီးပွားရှာစားရခက်ခဲလာပြီး အလွယ်တကူငွေရရန် အတွက် နည်းလမ်းမျိုးစုံသုံးကာ လုယက်ခြင်း၊ ခြိမ်းခြောက်ပြီး ငွေတောင်းယူခြင်းနှင့် ဓားပြတိုက်ခြင်းတို့ ပြုလုပ်နေလာကြသည်။
ပင်လုံမြို့တွင် ပြည်သူ့ကာကွယ်ရေးတပ်ဖွဲ့ PDF မရှိကြောင်း၊ ဒေါ်ညိုသေနတ်ပစ်သတ်ခံရပြီးနောက် ပြည်သူများကို ကြောက်လန့်ပြီး အခွင့်အရေးယူကာ ငွေတောင်းခြိမ်းခြောက်မှု ပြုလုပ်နေခြင်းဖြစ်ကြောင်း သိရသည်။
လက်ရှိအချိန်ထိ ဒေါ်ညို သေနတ်ပစ်သတ်ခံရခြင်းနှင့် ပတ်သက်ပြီး တရားခံလည်း မဖမ်းမိသေးပေ။
