Friday, December 2, 2022

လျှပ်စစ်မီးမမှန်မှုကြောင့် အေးသာယာ စက်မှုဇုံမှ စက်ရုံများ လည်ပတ်ရန်ခက်ခဲနေ

Must read

သျှမ်းပြည်တောင်ပိုင်း တောင်ကြီးမြို့နယ် အေးသာယာမြို့မှ အေးသာယာစက်မှုဇုံတွင် လျှပ်စစ်မီးမမှန်မှုကြောင့် စက်ရုံများက လုပ်ငန်းလည်ပတ်ရန် ခက်ခဲနေကြောင်း စုံစမ်းသိရသည်။

အေးသာယာ စက်မှုဇုန်

နိုဝင်ဘာလ လဆန်းပိုင်းမှ စတင်ကာ တောင်ကြီးမြို့နယ်အပါအဝင် သျှမ်းပြည် တခွင်လုံးရှိ မြို့ကြီးတော်တော် များများတွင် လျှပ်စစ်မီးများကို ၅နာရီမီးလာပြီး ၅နာရီမီး ပြန်ပိတ်ခဲ့သည့် အစီအစဥ် စတင်ခဲ့သည်။

သို့သော် လက်ရှိတွင် လျှပ်စစ်မီး ဓာတ်အားပေးမှုကို အစီအစဥ်အတိုင်းမလုပ်ဆောင်သည့်အပြင် ပျက်ချိန်များ နေသည့် အတွက် စက်မှုလုပ်ငန်းရှင်များက ခက်ခဲနေကြောင်း အေးသာယာစက်မှု လုပ်ငန်းရှင်တစ်ဦးက သျှမ်းသံတော်ဆင့်ကို ပြောသည်။

“အရင်က မီးက ၅နာရီလာ ၅နာရီပျက်ဆိုလည်း မီးလာတဲ့ အချိန်ကို စောင့်ပြီး အလုပ်လုပ်ရတာပေါ့၊ ညနေ ငါးနာရီကနေ သန်းခေါင်ယံအထိ မီးလာရင် သန်းခေါင်ယံအထိ အလုပ်လုပ်ရတာပဲ၊ အလုပ်သမားတွေ ကိုလည်း အချိန်ပိုကြေး ထပ်ပေးရတာပေါ့၊ လူပင်ပန်း ငွေပိုကုန်ခဲ့တယ်၊ အခုဆို မီးက လာချင်တဲ့အချိန်လာလို့ စက်တောင် မလည်ပတ်နိုင်တော့ဘူး” ဟု အေးသာယာစက်မှု လုပ်ငန်းရှင် တစ်ဦးက သျှမ်းသံတော်ဆင့်ကို ပြောသည်။

ထို့ပြင် နိုဝင်ဘာလ ၁၄ ရက်မှ စတင်ပြီး လျှပ်စစ်မီးသည် ၁၀ မိနစ်ခြား တစ်ခါ ပျက်တောက်နေသဖြင့် လုပ်ငန်းမလည်ပတ်နိုင်သည့် အပြင် ကုန်ထုတ်လုပ်မှု ပမာဏများလည်း လျှော့ကျသွားရကြောင်း သိရသည်။

လျှပ်စစ်မီးမမှန်မှုကြောင့် စက်ရုံအတွင်းမှ စက်များ လျှပ်စစ်ဝါယာကြိုးများလည်း ရှော့ခ်ဖြစ်တတ် သဖြင့် အလွန် အန္တရာယ်များကြောင်း ၎င်း လုပ်ငန်းရှင်က ဆက်ပြောသည်။

“ကျနော်တို့စက်ရုံက မီးလာတဲ့ ချက်ချင်းအလုပ်တန်းလုပ်လို့ မရဘူး၊ စက်ကို မိနစ် ၂၀၊ နာရီဝက်လောက် အပူပေး ထားရတယ်၊ အဲ့လို စက်ကို အပူပေးထားနေတဲ့ အချိန်မှာပဲ မီးကလာလိုက်ပျက်လိုက် ဖြစ်နေတယ်ဆိုရင်လျှပ်စစ် ဝါယာရှော့ခ် ဖြစ်တတ်လို့ အရမ်းအန္တရာယ်များတယ်၊ အဲ့ကြောင့် အခုဆို ကျနော်တို့ စက်မလည်တော့ဘူး” ဟု အေးသာယာမှ စက်ရုံပိုင်ရှင် အမျိုးသားတစ်ဦးက ဆိုသည်။

ယင်းကဲ့သို့ လျှပ်စစ်မီးမမှန်မှုကြောင့် လုပ်ငန်းမလည်ပတ်နိုင်သည့်အတွက် စက်ရုံအလုပ်သမားများလည်း အလုပ်လက်မဲ့ဖြစ်ကာ လုပ်ငန်း ထုတ်လုပ်မှုပိုင်းနှင့် ဝင်ငွေပိုင်းလည်း ထိခိုက်မှုများ ရှိလာကြောင်း သတင်းသိ ရသည်။

စစ်တပ်မှ နိုင်ငံတော် အာဏာသိမ်းယူမှု စတင်သည့် ကာလမှ ယခု တစ်နှစ်ကျော် ကြာလာသည့်အထိ လျှပ်စစ် မီးအား မမှန်မှု နောက်ဆက်တွဲကြောင့် သျှမ်းပြည်ရှိ တန့်ယန်းမြို့၊ လားရှိုးမြို့၊ ပင်လုံမြို့ ၊ တောင်ကြီးမြို့ ၊ အောင်ပန်းမြို့ နှင့် တခြားမြို့များတို့မှ ပြည်သူနေအိမ်များ လျှပ်စစ်ဝါယာရှော့ခ် ဖြစ်ကာ မီးလောင်ပျက်စီးမှုများ၊ လူသေဆုံးများ လည်း ရှိခဲ့သည်။

ယင်းကဲ့သို့ လျှပ်စစ်မီး မမှန်မှုသည် ပြီးခဲ့သည့် နိုဝင်ဘာလ ၂ ရက်နေ့တွင် ကယားပြည်၊ လွိုင်ကော်မြို့နယ်၊ ဆောခီးဒေါရွာအနီးရှိ လျှပ်စစ်ဓါတ်အားလိုင်း တာဝါတိုင် တိုင်အမှတ်၊ (၁၁၀)A2 အမျိုးအစား Suspension တိုင်နှင့် တိုင်အမှတ် (၁၁၁) Ba2 အမျိုးအစားTension တို့ ဗုံးကွဲတိုက်ခိုက်ခံရခြင်း ဖြစ်ကြောင်းလည်း သိရသည်။

Leave a Comments

- Advertisement -spot_img

Latest article