Saturday, December 3, 2022

တာချီလိတ်မြို့နယ် ကျောက်မီးသွေးသုံး ထုံးဖိုစက်ရုံကြောင့် ရွာ(၇)ရွာနေ ပြည်သူများအသက်ရှုကြပ်နေ

Must read

သျှမ်းပြည် အရှေ့ပိုင်း တာချီလိတ်မြို့နယ်ရှိ ဝ လုံးကျေးရွာအုပ်စု လွယ်သထုံကျေးရွာတွင် ပြုလုပ်နေသည့် ကျောက်မီးသွေးသုံး ထုံးဖိုကြောင့် အနံ့ဆိုး များထွက်ကာ ရွာပေါင်း (၇)ရွာနေ ပြည်သူများအသက်ရှု ကြပ်နေရ ကြောင်း သတင်းသိရသည်။

တာချီလိတ် ကျောက်မီးသွေးသုံးထုံးဖိုစက်ရုံ

အဆိုပါ ထုံးဖိုစက်ရုံမှ အနံ့ဆိုးများကြောင့် တာချီလိတ်မြို့နယ် ဝလုံးကျေးရွာအုပ်စုမှ လွယ်သထုံကျေးရွာ အထက်နှင့် အောက်ရွာ၊ ဝိန်းဝရွာ၊ ဖာတီမာကုန်းရွာ နှင့် မိုင်းဟဲကျေးရွာအုပ်စုမှ ယမ်းခေါင်ရွာ၊ ပန်စလိရွာ တို့မှ ဒေသခံ ရွာသားများသည် အသက်ရှု ကြပ်ခြင်း၊ ခေါင်းမူး/ကိုက် ဝေဒနာခံစားရခြင်းတို့ ကြုံတွေ့နေရကြောင်း ဒေသခံများ ကပြောသည်။

“ထုံးဖိုက တောင်ကုန်းအမြင့်မှာလုပ်နေတော့ ဝလုံးအုပ်စုက ၅ ရွာ၊ မိုင်းဟဲ အုပ်စုက ၂ ရွာဆီကို အနံ့ဆိုးတွေ ရောက်လာတယ်၊ အဲ့အနံ့တွေကို ရှူရပြီဆိုရင် ရင်ဘတ်တောင်အောင့်တယ်၊ ခေါင်းကိုက်၊မူးတာတွေ ဖြစ်တယ်၊ သက်ကြီးရွယ်အိုတွေဆို အသက်ရှုမဝလို့ ဆေးရုံတင်ပြီး အောက်စီဂျင် ပေးထားရတယ်” ဟု ဝလုံးကျေးရွာအုပ်စုမှ အုပ်ချုပ်ရေးမှူးအဖွဲ့ဝင်တစ်ဦးက သျှမ်းသံတော်ဆင့်ကိုပြောသည်။

ယင်းထုံးဖိုစက်ရုံမှ ထွက်သည့် အနံဆိုးများကြောင့် ဝိန်းဝရွာမှ ဒေသခံရွာသား ၅ ဦးထက်မနည်း အသက်ရှုကြပ် ပြီး ဆေးရုံတင်အောက်စီဂျင် ပေးထားရသည့်အပြင် ခေါင်းကိုက်ခေါင်းမူး ဝေဒနာခံစားရသည်။

ထို စက်ရုံအနီးနေထိုင်သည့် ဝ လုံးကျေးရွာ အုပ်စု မှ အိမ်ခြေ ၈၀၀ နီးပါး နှင့် မိုင်းဟဲကျေးရွာအုပ်စုမှ အိမ်ခြေ ၃၀၀ ခန့် စုစုပေါင်း အိမ်ခြေ ၁၀၀၀ ကျော် ရှိကြောင်း သိရသည်။

အဆိုပါ ထုံးဖိုသည် ပေ ၁၀၀ နီးပါးမြင့်သည့် တောကုန်းပေါ်တွင် ပြုလုပ်လျက်ရှိပြီး ရပ်ကွက်အုပ်ချုပ်ရေးမှူးရုံး ထံသို့ ခွင့်ပြုချက် အကြောင်းကြားချက် မရှိဘဲ လာရောက်ပြုလုပ်နေကြခြင်း ဖြစ်ကြောင်း ဒေသခံ အုပ်ချုပ်ရေးမှူးများ ပြောပြချက်အရသိရသည်။

“အရင်နှစ်ကတော့ အဲ့နေရာမှာ အုတ်ဖိုရှိတယ်၊ သြဂုတ်လကနေ စပြီး အနံ့ဆိုးတွေက တစ်နေ့ထက် တစ်နေ့ဆိုး လာလို့ ကျနော်တို့ ရွာလူကြီးနဲ့ ကော်မတီဝင်တွေ ပေါင်းပြီး သွားစစ်ဆေးတော့မှ အဲ့အုတ်ဖို အနီးမှာ ထုံးဖိုထပ်ရှိ မှန်းသိရတာ၊ ကျနော်တို့ ရွာလူကြီးတွေ ပေါင်းပြီး ဒီအနံ့ဆိုးတွေ ပျောက်အောင် လုပ်ပေးပါဆိုလည်း အခုထိ မပြောင်းလဲသေးဘူး” ဟု ဝလုံးကျေးရွာအုပ်စုမှ အုပ်ချုပ်ရေးအဖွဲ့ဝင် တစ်ဦးကဆိုသည်။

ထို့အပြင် လက်ရှိကျေးရွာလူကြီး နှင့် ကော်မတီ ဝင်များ စုပေါင်း လက်မှတ်ထိုးပြီး မြို့နယ် အုပ်ချုပ်ရေးမှူးဌာန သို့ စာတင်ထားသော်လည်း ယနေ့ထိ ဆောင်ရွက်ပေးခြင်း မရှိသေး ကြောင်း ဝ လုံးကျေးရွာအုပ်စု ရွာကော်မတီဝင် တစ်ဦးက ပြောသည်။

“ကျနော်တို့ အုပ်စု နှစ်ခုက ရွာလူကြီးတွေ ရွာသားတွေ စုပေါင်းပြီး မြို့နယ်အုပ်ချုပ်ရေးမှူး ထွေအုပ်စီ စာတင် ထားတယ်၊ လာကြည့်ပေးမယ်၊ ဆိုပြီး ဒီနေ့အထိ ဘာမှ လုပ်ပေးတာ မတွေ့ရသေးဘူး” ဟု ဝ လုံး ကျေးရွာအုပ်စု မှ အမည်မဖော်လိုသူ ရွာကော်မတီဝင် တစ်ဦးက ပြောသည်။

ထို့အပြင် လက်ရှိပြုလုပ်နေသည့် ကျောက်မီးသွေးသုံး ထုံးဖိုသည် ရပ်ကွက်ထောက်ခံစာများ တောင်းယူမှုလည်း မရှိသည့်အပြင် လက်ရှိတွင် ဒေသခံကျန်းမာရေး ထိခိုက်မှုရှိလာသည့်အတွက် မသိမ်းပါက အနံ့ဆိုးမထွက် အောင် နည်းပညာပြောင်းလဲ အသုံးပြုသင့်ကြောင်း ဒေသခံများက ပြောသည်။

ထို့အပြင် အဆိုပါ လွယ်သထုံကျေးရွာမှ ထုံးဖိုစက်ရုံပြုလုပ်သူသည် အာဏာရှိ ထက်လူကြီးများနှင့် ညှိနှိုင်းကာ ပြုလုပ်ခြင်း ဖြစ်ကြောင်းလည်း ဒေသခံများ ပြောပြချက်အရ သိရသည်။

ထိုအနံ့ဆိုးများ ရှူရှိုက်မိပါက ကိုယ်ဝန်ဆောင်မိခင်များ ကိုယ်ဝန်ပျက်ကျနိုင်ခြင်း၊ အသက်ရှူလမ်း ကြောင်း ကြပ်ခြင်း၊ ဦးနှောက်အကြိတ် ဖြစ်လာနိုင်ခြင်းနှင့် ကင်ဆာရောဂါဖြစ်လာနိုင်ခြင်း စတဲ့ ဆိုးကျိုးများရှိနိုင်ကြောင်းလည်း သိရှိရသည်။

ထို ကျောက်မီးသွေးသုံးထုံးဖိုစက်ရုံကြောင့် တာချီလိတ်မြို့နယ် ကျေးရွာ (၇)ရွာသာမက မြန်မာ-ထိုင်းနယ်စပ် ထိုင်းနိုင်ငံဘက်ခြမ်းတွင်လည်း ၎င်းစက်ရုံမှ ထွက်ရှိသည့် အနံ့ဆိုးကို ခံစားနေရသဖြင့် မြန်မာအစိုးရအနေဖြင့် သွားရောက်စစ်ဆေးပေးရန်လည်း ထိုင်းဘက်ခြမ်းက တောင်းဆိုထားသည်။

Leave a Comments

- Advertisement -spot_img

Latest article