သျှမ်ပြည်မြောက်ပိုင်း နောင်ချို- ပြင်ဦးလွင်ကြားစစ်ကောင်စီနှင့် မန္တလေး PDF တို့ တိုက်ပွဲဖြစ်ပွားပြီး စစ်ကောင်စီဘက်မှ အရာရှိတစ်ဦးသေဆုံးကြောင်း စုံစမ်းသိရသည်။
ယခုလ နိုဝင်ဘာ ၈ ရက် နှင့် ၉ရက် တွင် စစ်ကောင်စီဘက်မှ ထိုးစစ်ဆင်လာသည့်အတွက် စစ်ကောင်စီနှင့် မန္တလေး PDF တို့တိုက်ပွဲဖြစ်ပွဦးကာ စစ်ကောင်စီဘက်မှ အရာရှိတစ်ဦးသေဆုံသွားကြောင်း မန္တလေး PDF မှ ပြောရေးဆိုခွင့်ရှိသူတစ်ဦးက သျှမ်းသံတော်ဆင့်ကိုပြောသည်။
“ တိုက်ပွဲက ၂ ရက်ဖြစ်တာ။ သူတို့ဘက်က ထိုးစစ်ဆင်းလာလို့ တိုက်ပွဲဖြစ်တာပါ။ သူတို့ဘက်ကတော့ သေဆုံးမှု ၁၀ ကျော်ပါတယ်။ ရာထူးကြီးတဲ့ အရာရှိတစ်ဦးလည်းပါတယ်။ ဒါကတော့ ကျနော်တို့ အနီးကပ်ဆုံး စုံစမ်း သိရှိရတဲ့ အချက်လက်ပါ” ဟု မန္တလေး PDF မှ တာဝန်ရှိသူက ဆိုသည်။
အဆိုပါ တိုက်ပွဲဖြစ်ပွားသော နေရာသည် ပြည်သူများနေထိုင်သည့် ကျေးရွာနှင့်ဝေးကွာသော်လည်း တိုက်ပွဲကြီး ဆက်ဖြစ်ပွားမည်ကို နောင်ချိုပြည်သူများက စိုးရိမ်နေကြသည်။
ထိုအပြင် လက်ရှိတောင်ယာ၊ လယ်ယာများကို ရိတ်သိမ်းချိန် ဖြစ်သောကြောင့် တိုက်ပွဲကို မလိုလားကြောင်း နောင်ချိုဒေသခံများက ပြောသည်။
“ တိုက်ပွဲဖြစ်ပွားတာက ရွာတွေနဲ့တော့ဝေးတယ်။ စစ်ဘေးရှောင်ရတာတွေ၊ ပြည်သူတွေ ထိခိုက်တာတော့မရှိဘူး။ ဒါမဲ့တိုက်ပွဲဆက်ဖြစ်ပွားပြီး ရွာတွေဖက်လာမှာကိုတော့ စိုးရိမ်တယ်။ အခုက ကျနော်တို့ လယ်ယာတွေ ရိတ်သိမ်းချိန်ဖြစ်တယ်လေ။ ဒီဘက်ကိုတော့ တိုက်ပွဲမဖြစ်စေချင်ဘူး” ဟု နောင်ချိုမြို့နယ် ဒေသခံအမျိုးသားတစ်ဦးက ပြောသည်။
လက်ရှိအချိန်ထိ နောင်ချို- ပြင်ဦးလွင်ကြားတွင် စစ်ကောင်စီ နှင့် မန္တလေး PDF တို့ စစ်ရေးတင်းမာနေလျက် ရှိကြောင်း သိရသည်။
ပြီးခဲ့သည့် ဩဂုတ်လတွင်လည်း စစ်ကောင်စီ နှင့် မန္တလေး PDF တို့ တိုက်ပွဲဖြစ်ပွားမှုကြောင့် ဒိုးပင်ကျေးရွာ၊ဟိုခိုကျေးရွာ၊ ကုလားကွဲကျေးရွာမှ ပြည်သူ ၁ထောင် ဝန်းကျင်က စစ်ဘေးတိမ်းရှောင် လာခဲ့ရကြောင်း သိရသည်။
Leave a Comments