သျှမ်းပြည်မြောက်ပိုင်း မူဆယ်မြိုန့ယ်တွင် ပြည်သူ့စစ်တပ်ဖွဲ့ဝင် တစ်ဦးသည် အကြွေးများပြီး မဆပ်နိုင်သည့်အတွက် စိတ်ဓာတ်ကျကာ ကိုယ့်ကိုယ်ကို ကြိုးဆွဲချ အဆုံးစီရင်လိုက်ကြောင်း သတင်းသိရသည်။
ပြီးခဲ့သည့် နိုဝင်ဘာလ ၈ ရက် မနက်ပိုင်း ၉ နာရီကျော်ဝန်းကျင် မူဆယ်မြို့ရှိ ကွတ်ခိုင်ပြည်သူ့စစ်တပ်ဖွဲ့ဝင် တစ်ဦးသည် ၎င်းနေထိုင်သည့် စခန်းရှိ အိပ်ခန်းတွင် ကိုယ့်ကိုယ်ကို ကြိုးဆွဲချ စီရင်ခဲ့ကြောင်း နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“မူဆယ်မြို့မှာ လှုပ်ရှားတဲ့ ကွတ်ခိုင်ပြည်သူ့စစ်တပ်ဖွဲ့ဝင်လို့ သိရတယ်၊ အိပ်ခန်းထဲမှာပဲ ကိုယ့်ကိုယ်ကို ကြိုးဆွဲချ လိုက်တာ၊ အရင်ကလည်း လောင်းကစားဝိုင်းက အကြွေးတွေကြောင့် စိတ်ညစ်တယ်လို့ မကြာခဏ ပြောဖူး တယ်၊ အခုလည်း အဲ့ဟာတွေကြောင့် စိတ်ဓာတ်ကျပြီး လုပ်တာလို့ ထင်တယ်” ဟု နီးစပ်သူ အမျိုးသား တစ်ဦးက ပြောသည်။
အဆိုပါ သေဆုံးသူ ပြည်သူ့စစ်တပ်ဖွဲ့ဝင်သည် အသက် ၂၀ ကျော်ရှိ မိုင်းယိုင်ဝီ ဆိုသူဖြစ်ပြီး မန်တုံမြို့နယ် နားအော် ကျေးရွာမှ ဒေသခံဖြစ်ကြောင်းလည်း သတင်းသိရသည်။
သေဆုံးသွားသည့် Dead Body ကိုမူဆယ်မြို့ ဂရုဏာလူမှုကူညီရေးအသင်းက သွားရောက် သယ်ဆောင်ခဲ့ရခြင်း ဖြစ်ပြီး မူဆယ်မြို့ ပြည်သူ့ဆေးရုံ ရင်ခွဲရုံသို့ ပို့ဆောင် ပေးခဲ့ကြောင်း ၎င်းအသင်းမှ တာဝန်ရှိသူ တစ်ဦးက သျှမ်းသံတော်ဆင့်ကို ပြော သည်။
“ကျနော်တို့ကို ဖုန်းဆက်အကူအညီ တောင်းလာလို့ ရောက်သွားတဲ့အချိန် ၉ နာရီကျော်လောက်တော့ ရှိပါပြီ။ အဲ့နောက်တော့ ဆေးရုံကိုပို့တယ်၊ ဆေးရုံကနေ ရင်ခွဲရုံကို ပို့တယ်၊ ဘာကြောင့် သေရတယ် ဆိုတာတွေတော့ ကျနော်တို့ မသိပါဘူး” ဟု ဂရုဏာလူမှုကူညီရေးအသင်းမှ တာဝန်ရှိသူက ပြောသည်။
မူဆယ်မြို့နယ်သည် မြန်မာ – တရုတ် နယ်စပ်မြို့ ဖြစ်သည့်အတွက် ကုန်သည် စီးပွားရေး လုပ်ငန်းရှင်များနှင့် လောင်းကစားဝိုင်းများ ပေါများသည့် မြို့ဖြစ်သည့် အပြင် ပြည်သူ့စစ် အဖွဲ့အစည်းများလည်း ပေါများသည့် မြို့လည်း ဖြစ်ကြောင်း သိရသည်။
အဆိုပါ လောင်းကစားဝိုင်းများတွင် ပြည်သူ့စစ်တပ်ဖွဲ့များမှ ပါဝင်ပတ်သက်နေပြီး၊ မူဆယ်မြို့နယ်အတွင်း လှုပ်ရှားနေသည့် ပြည်သူ့စစ်များသည် တရုတ်လူမျိုး ဖြစ်ကြကြောင်း ဒေသခံများထံမှ သိရသည်။
လောင်းကစားဝိုင်းများကို စစ်ကောင်စီ နှင့် ပြည်သူ့စစ်တို့ ပူးပေါင်းပြီး လွတ်လပ်စွာဖွင့်ခွင့်ပေးထား သောကြောင့် သူခိုး၊ ဓားပြ နှင့် ပြန်ပေးဆွဲမှု ပိုများပြားလာနိုင်ကြောင်း မူဆယ်မြို့ ဒေသခံများက ပြောဆို သုံးသပ်နေကြသည်။
