သျှမ်းပြည် မြောက်ပိုင်း ကွတ်ခိုင်မြို့နယ်တွင် တောထဲသို့ ဟင်းရှာထွက်သည့်သူနှင့် စပါးရိတ်သည့် ပြည်သူများ မြွေကိုက်ခံရမှု များပြားလာကြောင်း သတင်းသိရသည်။

ယခုနှစ် နိုဝင်ဘာလ ၈ ရက် မနက်ပိုင်း ၉ နာရီဝန်းကျင်တွင် နမ့်ဖတ်ကာနေ အသက် ၄၁ နှစ်ရှိ ဦးလောရွှေက လယ်ထဲ စပါးရိတ်နေစဥ် မြွေကိုက်ခံရပြီး ကွတ်ခိုင်ပြည်သူ့ဆေးရုံသို့ တက်ရောက်ကုသ နေရကြောင်း နီးစပ်သူ ဆွေမျိုးတစ်ဦးက သျှမ်းသံတော်ဆင့်ကို ပြောသည်။

“စပါးရိတ်နေတဲ့အချိန် ဘယ်ဘက်လက်ကို မြွေကိုက်ခံရတာပါ၊ သူကမြွေကိုက်ခံရတယ်လို့ အော်လိုက်တော့ အနီးမှာ ရှိတဲ့သူတွေက မြွေကိုလိုက်ဖမ်းပြီး အဲ့မြွေနဲ့အတူ ကွတ်ခိုင်ဆေးရုံကို ပို့ပေးကြတာ၊ ဆေးရုံရောက်တော့ မြွေဆိပ် က တော်တော်ပျံ့နေပြီ၊ သွေးတွေလည်း အန်တယ်။ ဆီးသွားရင်တောင် သွေးပဲဖြစ်နေတာ”ဟု မြွေကိုက် ခံရသူ၏ ဆွေမျိုးတစ်ဦးက သျှမ်းသံတော်ငဆ့်ကို ပြောသည်။

မြွေကိုက်ခံထားရသည့် နေရာတွင် ညိုမည်းယောင်ကိုင်းနေပြီး သွေးအန်နေသည့်အတွက် အရေးပေါ် သွေးသွင်း ရန် အကူအညီ လိုအပ်နေကြောင်း သတင်းသိရသည်။

အဆိုပါ အမျိုးသားကို ကိုက်သည့်မြွေသည် အစိမ်းရောင်ဖြစ်ပြီး အမြီးပိုင်းတွင် အနီရောင်သန်းနေကြောင်း အထက်ပါ ဆွေမျိုးက ဆက်ပြောသည်။

“သူ့ကိုကိုက်တဲ့မြွေက သာမာန်ကြည့်လိုက်ရင် အဆိပ်မရှိတဲ့ မြွေစိမ်းလိုမျိုးပဲ၊ ဒါပေမဲ့ သေချာကြည့်ရင်တော့ ခန္ဓာကိုယ်ထက် ခေါင်းက နည်းနည်းကြီးတယ်၊ အမြီးမှာလည်း အနီရောင်သန်းနေတယ်၊ မြွေစိမ်းမြီးနီလို့ ခေါ်တယ်လို့ သိရတယ်၊ တော်တော်အဆိပ်ပြင်းတဲ့မြွေတဲ့” ဟု ၎င်းက ပြောသည်။

လက်ရှိတွင် မြွေကိုက်ခံရသည့် အမျိုးသားသည် တစ်နေ့လုပ်တစ်နေ့စားသာ ဖြစ်ကြသည့်အတွက် နောက်ထပ် သွေးအလှူရှင်နှင့်အတူ ဆေးဖိုးဝါခ ကူညီထောက်ပံ့ပေးမှုလည်း လိုအပ်နေကြောင်း သိရသည်။

အလားတူပင် ပြီးခဲ့သည့် အောက်တိုလာအတွင်းတွင်လည်း မော်ဟစ်ကျေးရွာမှ အမျိုးသားတစ်ဦး တောထဲ ဟင်းရှာထွက်စဥ် မြွေကိုက်ခံရပြီး ဆေးရုံသို့ တက်ရောက်ဆေးကုသမှုခံယူနေစဥ် သေဆုံးသွားခဲ့သည့် ဖြစ်စဥ် ဖြစ်ပွားခဲ့ကြောင်း လည်း သိရသည်။

ယခု အောက်တိုဘာလဆန်းပိုင်းတွင်လည်း ကွတ်ခိုင်မြို့ ရပ်ကွက် ၂ မှ အမျိုးသမီး တစ်ဦးလည်း မြွေကိုက်ခံရပြီး ဆေးရုံသို့ ၅ ရက်ခန့် တက်ရောက်ဆေးကုသမှု ခံခဲ့ရကြောင်းလည်း သိရသည်။

ယင်းကဲ့သို့ မြွေကိုက်ခံရသည့် ဒဏ်ရာရရှိပါက အကိုက်ခံရသော နေရာအား ရေခဲ (သို့မဟုတ်) အခြားအေးစေသော မည်သည့်အရာကိုမျှ မတင်ရန်နှင့် အနာပေါ် တင်းကျပ်စွာ ကြပ်စည်းခြင်း မပြုလုပ်ရန်လည်း ကွတ်ခိုင်မြို့နယ် မှ ပရဟိတ အသင်းဝင်တစ်ဦးက သျှမ်းသံတော်ဆင့်ကိုပြောသည်။

“မြွေကိုက်ဒဏ်ရာကို ရေခဲ တွေကပ်တာမျိုးတွေ မလုပ်သင့်ပါဘူး၊ အနာပေါ်ကို တင်းကျပ်စွာ ကြပ်စည်းခြင်းက သွေးကြောကို ပိတ်သွားစေလို့ အကိုက်ခံရတဲ့ နေရာကို သွေးမရောက်တော့ အဲ့နေရာက သွေးခဲပြီး ခြေလက်ဆိုရင် ဖြတ်ရတဲ့ အထိ ဖြစ်နိုင်တယ်” ဟု အထက်ပါ ပရဟိတက ပြောသည်။

ကွတ်ခိုင်မြို့နယ်အတွင်း အောက်တိုဘာမှစတင်ပြီး ယနေ့အချိန်ထိ မြွေကိုက်ခံသည့်သူ ၅ဦးရှိပြီး၊ထိုထဲမှ ၂ဦးသေဆုံး သွားကြောင်း သိရသည်။

သျှမ်းပြည် အပါအဝင် မြန်မာပြည် တစ်ဝန်းလုံးရှိ မြို့ရွာများ၌ နှစ်စဉ် မေလနှင့် ဇွန်လများတွင် မြွေကိုက်ခံရမှု အဖြစ်များလေ့ရှိပြီး တောရွာများတွင်မူ စိုက်ပျိုးရိတ်သိမ်းချိန်ဖြစ်သော အောက်တိုဘာလမှ ဒီဇင်ဘာလများ အတွင်းတွင် ပိုမိုဖြစ်ပွားတတ်ကြောင်းလည်း သိရသည်။