သျှမ်းပြည်တောင်ပိုင်း ဖယ်ခုံမြို့နယ်အတွင်း တိုက်ပွဲဖြစ်ပွားမှုမရှိဘဲ စစ်ကောင်စီဘက်မှ လက်နက်ကြီး ရမ်းသမ်းပစ်ခတ်မှုကြောင့် လအိကျေးရွာနေထိုင်သည့် ကလေးတစ်ဦးအပါအဝင် အရပ်သား (၃)ဦးထိခိုက် လဒဏ်ရာရရှိကြောင်း စုံစမ်းသိရသည်။
ယမန်နေ့ (နိုဝင်ဘာ ၉) ရက် ည ၉ နာရီခွဲတွင် စစ်ကောင်စီဘက်မှလက်နက်ကြီး ရမ်းသမ်းပစ်ခတ်မှုကြောင့် နေအိမ်အချို့ ပျက်စီးခဲ့ပြီး ကလေးတစ်ဦး အပါအဝင် အရပ်သား(၃)ဦး ထိခိုက်ဒဏ်ရာရရှိခဲ့ပြီး စိုးရိမ်ရကြောင်း ဖယ်ခုံမြို့နယ် ပြည်သူ့အုပ်ချုပ်ရေးအဖွဲ့မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
ထိုလက်နက်ကြီးထိမှန်သည့်သူများသည့် အသက် (၈)နှစ်အရွယ်ရှိ ကလေးနှင့် အမျိုးသမီး (၂)ဦးဖြစ်သည် အသက် (၈၁)နှစ်အရွယ် ဒေါ်မူထန့် နှင့် အသက် (၄၄)နှစ်အရွယ် ဒေါ်မူမားသ တို့ဖြစ်ပြီး အသက် (၅၆)နှစ်အရွယ် ဦးကိုင်တို့ဖြစ်ကြောင်း ၎င်းက ပြောသည်။
“ စစ်တပ်ဘက်က လက်နက်ကြီး (၂)လုံးပစ်ခဲ့တယ်။ တစ်လုံးကတော့ လူမရှိတဲ့နေအိမ်ကိုကျတယ်။ နောက်တစ်လုံးက လူနေတဲ့အိမ် ကျတယ်။ ဒါ့ကြောင့် ကလေးတစ်ယောက်နဲ့ လူကြီး (၃)ယောက်ထိတယ်” ပြည်သူ့အုပ်ချုပ်ရေးအဖွဲ့မှ တာဝန်ရှိသူတစ်ဦးက ဆိုသည်။
လက်နက်ကြီးကြောင့် အသက်(၅၆)နှစ်အရွယ်ရှိ ဦးကိုင်၏ ဗိုက်ကိုထိမှန်ခဲ့ပြီး စိုးရိမ်ဒဏ်ရာရရှိကာ ကျန်သူများမှာ စိုးရိမ်စရာမရှိကြောင်းလည်း သိရသည်။
ဖယ်ခုံမြို့နယ်ထဲတွင် စက်တင်ဘာလတွင် တိုက်ပွဲအတွင်း အရပ်သား ၆ ဦးသေဆုံးခဲ့ပြီး စစ်ကောင်စီ၏ တစ်ဖက်သတ် လက်နက်ကြီး ပစ်ခတ်မှုကြောင့် အရပ်သား ၃ ဦး ထိခိုက်ဒဏ်ရာရရှိခဲ့ကြောင်း သိရသည်။
လက်ရှိဖယ်ခုံမြို့နယ် အနောက်ဘက်ကမ်းဘက်တွင် စစ်ကောင်စီ လက်အောက်ခံ Non CDM ဝန်ထမ်းများ ၎င်းနယ်မြေထဲ နေထိုင်ခွင့်မပြုတော့ဘဲ ပြည်သူများကိုယ်တိုင် ကိုယ်ထူကိုယ်ထကျောင်းများဖွင့်လှစ်လာပြီးနောက် စစ်ကောင်စီဘက်မှ လက်နက်ကြီး ရမ်းသမ်းပစ်ခတ်ခဲ့ခြင်းဖြစ်ကြောင်း သိရသည်။
“ အနောက်ဘက်ကမ်းက ကျနော်တို့လက်နက်ကိုင်တွေကြီးစိုးတဲ့နေရာဆိုရင်တော့ Non CDM ကို သိပ်လက်မခံတော့ဘူး။ ကိုယ်ဘာသာကိုယ့်ကျောင်းတွေဖွင့်တယ်။ ကျောင်းတွေအများကြီးထဲလည်း လက်နက်တွေကျနိုင်ဆိုပြီး ပြချင်လို့လား မသိဘူး။ အဲကြောင့် လက်နက်ကြီးတွေ ပစ်နေတာလား မသိဘူး” ဟု ၎င်း တာဝန်ရှိသူ တစ်ဦးက ဆက်လက်ပြောသည်။
ဖယ်ခုံမြို့နယ်ထဲတွင် လက်ရှိ စစ်ကောင်စီ နှင့် ပြည်သူ့ကာကွယ်ရေးကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားမှု မရှိခဲ့သည်မှာ ၁ လကျော်ကြာဝန်းကျင်ရှိပြီဖြစ်သော်လည်း စစ်ကောင်စီဘက်က တစ်ဖက်သတ် လက်နက်ကြီး ပစ်ခတ်နေကြောင်း သိရသည်။
Leave a Comments