သျှမ်းပြည် တောင်ပိုင်း နမ့်စန်မြို့  အမှတ်(၁) အထက်တန်းကျောင်းသား အချင်းချင်း ခိုက်ရန် ဖြစ်ပွားရာမှ သေဆုံးသွားသည့် ကျောင်းသား မောင်အောင်မော်ဟိန်းအတွက် ကျောင်းနှင့် ကျောင်းအကျိုးတော်ဆောင်များမှ ငွေကြေး ၁၁ သိန်းခွဲကျော် ကူညီထောက်ပံ့ခဲ့ကြောင်း သတင်းသိရသည်။ 

ပြီးခဲ့သည့် နိုဝင်ဘာလ ၂ ရက်တွင် နမ့်စန် အမှတ်(၁) အထက်တန်းကျောင်းမှ ကျောင်းသား အချင်းချင်း ခိုက်ရန်ဖြစ်ပွား ပြီး မောင်အောင်မော်ဟိန်း သည် ရရှိသည့် ဒဏ်ရာဖြင့် နိုဝင်ဘာလ ၅ ရက် နံနက် ၂ နာရီဝန်းကျင်၌သေဆုံး သွားခဲ့ရသည့်အတွက် ကျောင်းမှ ငွေကြေး ၁၁ သိန်းခွဲကျော် ကူညီထောက်ပံ့ပေးခဲ့ကြောင်း နမ့်စန် အထက်တန်းကျောင်းမှ ဆရာမများက သျှမ်းသံတော်ဆင့် ကိုပြောသည်။ 

“ကျောင်းအုပ်ကြီး အပါအဝင် ဆရာ/ဆရာမတွေ၊ ကျောင်းအကျိုးတော်ဆောင်တွေ စုပေါင်းပြီးတော့ မောင်အောင်မော်ဟိန်း အတွက် ကူညီထောက်ပံ့ပေးငွေ ၁၁ သိန်းခွဲကျော်ကို သူ့အမေလက်ထဲ အပ်လိုက်ပါပြီ၊ မောင်လူမင်းထက် မိသားစုက ကူညီတဲ့ ပိုက်ဆံ ၁ သိန်းကိုတော့ မိခင်က လက်မခံဘူးဆိုလို့ အဲ့ပိုက်ဆံက ဆရာမ လက်ထဲမှာပဲ ရှိသေးတယ်” ဟု အထက နမ့်စန် အထကမှ ဆရာမ ဒေါ်ခင်မာဦးက  သျှမ်းသံတော်ဆင့်ကို ပြောသည်။

လက်ရှိတွင် သေစေတဲ့ အထိ ရိုက်နှက်မှု ပြုလုပ်သည့် ကျောင်းသားကို ကလေးသူငယ် ပုဒ်မ ၃၀၂ (က) ဖြင့် နမ့်စန်မြို့ မှ ရဲစခန်းတွင် ဖမ်းဆီးထိန်းသိမ်းထားကြောင်းလည်း သတင်းသိရသည်။ 

ကျောင်းဝန်းအတွင်း ခိုက်ရန်ဖြစ်ပွားရာမှ အသက်သေဆုံးသည်အထိ ဖြစ်ပွားရခြင်းနှင့် ပတ်သက်ပြီးကျောင်းအုပ် ဆရာမကြီး မှ စိတ်မကောင်းကြောင်း သျှမ်းသံတော်ဆင့်ကို ပြောသည်။ 

“ကိုယ့်ကျောင်းသား အချင်းချင်းပဲ ဖြစ်နေကြတယ်ဆိုတော့ နှစ်ဦးနှစ်ဖက်လုံးအတွက် စိတ်မကောင်းဘူးပေါ့” ဟု နမ့်စန် အထက ကျောင်းမှ ကျောင်းအုပ်ဆရာမကြီး ဒေါ်မူမူမြင့်က သျှမ်းသံတော်ဆင့်ကို ပြောသည်။ 

ခိုက်ရန်ဖြစ်ပွားသည့် နိုဝင်ဘာ ၂ ရက်တွင် မောင်အောင်မော်ဟိန်းမှ ရရှိသည့် ဒဏ်ရာဖြင့် သတိလစ်သည့် အတွက် နမ့်စန်ဆေးရုံမှ တောင်ကြီးဆေးရုံသို့ ညတွင်းချင်းပို့ဆောင်ခဲ့ပြီး ဆရာဝန်များ၏ ညွှန်ကြားချက်အရ ဦးခေါင်းခွဲစိတ်ကုသမှု ပြုလုပ်ရန်အတွက် နိုဝင်ဘာ ၃ ရက်တွင် နေပြည်တော်ဆေးရုံသို့ ပို့ဆောင်ခဲ့ရာ နေပြည်တော်တွင် သေဆုံးသွားခဲ့ကြောင်း သိရသည်။

မောင်အောင်မော်ဟိန်း၏ ရုပ်အလောင်းကို နမ့်စန်မြို့မှ လူမှုကူညီရေး ပရဟိတအသင်းများ၏ အကူအညီဖြင့် နေပြည်တော်မှ နမ့်စန်မြို့သော် ပြန်လည်သယ်ယူခဲ့ပြီး ယမန်နေ့ နိုဝင်ဘာလ ၈ ရက်နေ့တွင် သင်္ဂြိုဟ်လိုက် ကြောင်း ဆွေမျိုးနှင့် နီးစပ်သူက သျှမ်းသံတော်ဆင့်ကို ပြောသည်။ 

“ကလေးကို မနေ့ကတော့ သင်္ဂြိုဟ်လိုက်ပြီ၊ ကျောင်းက သူ့သူငယ်ချင်းနဲ့ ဆရာ/ဆရာမတွေနဲ့ မြို့နယ် ပညာရေး မှူးရုံးကလည်း ရောက်လာကြတယ်၊ သူ့အမေကတော့ ငိုလို့ မဆုံးဘူး၊ ငွေကြေးလည်း မပြည့်စုံတော့ ဆေးဖိုးတွေ စားရိတ်တွေ အားလုံးကလည်း အကြွေးနဲ့ပဲ ယူထားရတယ်၊ ကျောင်းကလာကူညီပေးတာတော့ ကျေးဇူးတင် ပါတယ်၊ လုပ်တဲ့သူကိုတော့ ဥပဒေအရ လုပ်စေချင်ပါတယ်” ဟု ဆွေမျိုးနှင့် နီးစပ်သူက သျှမ်းသံတော်ဆင့်ကို ပြောသည်။

နစ်နာသူ မိသားစုဝင်များက အသက်သေဆုံးသည်အထိ ရိုက်နှက်သည့် ကျောင်းသားကို ကျောင်းမှ အရေးယူပေးစေလိုကြောင်း နှင့် ကျူးလွန်သူ ကျောင်းသးမိသားစုများကိုလည်း တာဝန်ယူမှုရှိစေလိုကြောင်း မိသားစုဝင်များက ပြောဆိုနေကြသည်။ 

နမ့်စန်မြို့သည် စစ်တပ်အခြေစိုက် မြို့ဖြစ်သည့်အတွက် စစ်တပ်အသိုင်းအဝိုင်း ဖြစ်သဖြင့် ပြည်သူများက ကြောက်လန့်နေရကြောင်းလည်းသိရသည်။